خوێندكارانی زانكۆكانی ئێران لەبەردەم مەترسیەكی گەورەدا ! صورةهەروەك دەزانین خوێندنگا و زانكۆكان لە جیهاندا رۆلێكی زۆر گەورە و گرینگ دەبینن لە پێشخستی كۆمەڵگا وبەرزكردنەوەی  حاستی زانیاری و رۆشنبیركردنی تاكەكان و رۆلێكی گرینگ دەبینن لە چۆنیەتی بەرێوەبردنی كۆمەڵگا و نەتەوەدا. لە زانكۆدا سەرجەم ئەو شتانەی كە ئێمەی مرۆڤایەتی پێویستمان پێیەتی دەخوێندرێت بێگومان هەر خوێندكارێك بارێكی تایبەت تەرخان دەكات بۆ ئەوەی تێدا بخوێنێت وشارەزایی تەواو پیدابكات لەو كارەی كە بۆیی دەخوێنێ‌ كە لە داهاتوودا ببێتە هۆیی سود گەیاندن بە وڵاتەكەی ،لە بەر ئەم هۆیانە لە سەرجەم ولاتانی دنیا گرینگیەكی زۆر دەدرێت بە زانكۆ و خوێندنگاكان و بێ شك ئاستی بەرزی زانكۆكان لە وڵاتێك بۆ وڵاتێكی تر جیاوازی هەیە. بەلام هەر ولاتێك ئاستی خوێندنی لە زانكۆكانی بەرز بێت دەبێتە هۆی ئەوەی كە خوێندكاران لە ولاتانی دیكەی جیهان بەمەبەستی بەدەست هێنانی بروانامەیەكی بەرز رووی تێبكەن  وئەمەش بۆ ئەو وڵاتە دەبێتە هۆی پێش كەوتن و بەرزبوونەوەی پێوەرەكانی داهاتی نەتەوەیی و بوژانەوەی ئابووری و بەدەست هێنانی سەرمایەیكی زۆر و خۆشگوزەرانی بۆ نەتەوەكەی ولە كۆتایشدا بەدەست هێنانی بروانامەیەكی متمانە پێكراو بۆ ئەو خوێندكارە . لە ئێستادا زانكۆكانی ئێران سەرەڕای ئەوە بارودۆخەی كە لەو ولاتەدا هەیە  لە جیاتی ئەوەی زانست و مەعریفەتی تێدا دەستاودەست بكرێت، بوونەتە جێگای دەستاودەست كردنی مەوادی هۆشبەر . بە پێی ئەو هەوال و زانیاریانەی كە لە لایەن دەزگا پەیوەندی دارەكانی رژێم بلاو بوونەتەوە رۆژ بە رۆژ خوێندكارانی توشبوو بە مادەی هۆشبەر زیاتر دەبێت كە ئەمەش جێگەی نیگەرانیە كە توێژێكی گرینكی ئەم كۆمەلگایە لە جیاتی خۆ خەریككردن بە خوێندن و بەدەست هێنانی پلەی بەرز توشی نەخۆشیەك دەبن كە چارەسەرێكی یەكجار دژوارە و پرۆسەێكی مالوێرانەكەرە. بە پێی ئەو ئامارە  كە گومان لە راستی دەكرێت و پێشبینی زیاتری دەكەن  راگەێندراوە كە لە سەدا 20 ی خوێندكارانی زانكۆكانی ئێران توشی مادەی هۆشبەرە بوون كە ئەم ئامارە رێژەیەكی  زۆرە و جێگەی نیگەرانیە و زەنگێكی مەترسیدارە بۆ داهاتووی ئەو لاوانەی كە دەخوێنن.
ئەوەی جێگەی سەرنجە بلاوبوونەوەی ئەم ئامارە لەكاتێكدایە كە ولاتی ئێران بە یەكێك لەو ولاتانە دادەنرێت كە زۆرترین رێژەی مادەی هۆشبەری تێدایە كە بە شێوەیەكی تایبەتی لاوان قوربانی ئەو مادانەن و رژێمیش بە هیچ شێوەیەك مەبەستیی چارەسەركردنی ئەو پرسەی نیە و نایەوێت كە لاوان لەو مادانە دووركەونەوە! بێگومان هەموومان ئەو راستیە دەزانین كە رژێم بە هۆی ئەو سیاسەت و بەرنامەیەی كە پەیرەوی دەكات پێویستی بەو پلانەیە  بۆ ئەوەی وەڵات لە بێ ئاگایی دا بێلێتەوە و سیاسەتی نادروستی خۆی درێژە پێبدات . هەر بەپێی ئەو ئامارانەی كە بلاوبوونەتەوە بەرپرسێكی بەرنگاربوونەوەی مادە سڕكەرەكانی رژێمی ئاخوندی  رایگەیاندووە، 9% كوڕان و 11% كچانی خوێندكار لەزانكۆ دەوڵەتییەكان ماددە سڕكەرەكان بەكار دێنن.ئەو بەرپرسە رایگەیاندووە، زیاتری خوێندكاران جۆری ماددەی “حەشیش و كۆدۆئین” بەكار دێنن . دوومادەی زۆر مەترسیدارن بۆسەر ژیانی مرۆڤ بەتایبەتی حەشیش. جێگەی داخە كە وا بڵاو بۆتەوە كە حەشیش نابێتە هۆی گیرۆدەبوون، كە ئەم قسەیە بەپێی ئەو لێكۆلینەوانەی  لەسەر ئەم مادەیە كراوە ئەم زانیاریانە رەت دەكاتەوە .
بە پێی قسەی زۆرێك لە شارەزایان بڵاوبوونەوەی ئەم مادانە بەو شێوە بەربلاوە  زیاتر دەگەرێتەوە بۆ بارودۆخی كۆمەڵایەتی و سیاسی و ئابووری. بێگومان ئەو بارودۆخەی كە لە ئێراندا هەیە و ئەو رێوشوێنە ئەمنیەتیەی  كە سەرانی رژێم سەبارەت بەلاوان و خوێندكاران پەیرەوی دەكەن دەبێتە هۆی ئەوەی كە لاوان و خوێندكاران  رووبكەنە كێشانی ئەو موادە. هەر بەپێی ئەو راپۆرتانەی كە بڵاونەتەوە لە ماوەی ساڵی 1392ی هەتاوی، دوو هەزار و 957 كەس بەهۆی بەكارهێنانی ماددە هۆشبەرەكان لە وڵاتی ئێران گیانیان داوە كە لەم ئامارەدا 2 هەزار و 727 كەس پیاوان و 230 كەسیان ژنان پێكیان هێناوە. هەربۆیە پێویستە سەرجەم خوێندكاران لەوە تێبگەن كە ئەو مادانە هیچ كات سودی نیە و ئەگەر هەشیبێت هەرگیز لە زیانەكەی زۆرترنیە. 
لە كۆتایی ئەم باسەدا ئەوەمان بۆ ئاشكرا دەبێت كە خوێندكارانی زانكۆكانی ئێران  رووبەروو مەترسیەكی گەورەبوونەتەوە و پێویستە خوێندكاران هەول بدەن كە خۆیان لەو بەڵایە رزگار بكەن و ویست و هیواكانی رژێم لە هەوڵدان بۆ پەرەسەندنی ئەم دیاردەیە لە گۆر بنێن و هەولی بەرەنگاربوونەوەی بدەن .ئەمە ئەركە لەسەر شانی هەمووكەسێك كە بۆ نەهێششتنی ئەو دیاردەیە هەوڵبدات بە تایبەتی خێزان كە رۆلێكی زۆر دەبینێت لە وشیاركردنەوەی رۆلەكەیان بۆ دووركەوتنەوە لەم مادە زیان بەخشانە. 


ڕێکه‌و 2015-09-30 14:00:19
به‌شی ( کۆمه‌ڵایه‌تی )







سیاسی