رێورەسمی هەشتەمین ساڵرۆژی دامەزراندنی رێکخراوی لاوانی خەبات بەرێوە چوو

دوانیوەرۆی رۆژی هەینی 13ی بانەمەری 1398، هەشتەمین ساڵرۆژی دامەزراندنی رێکخراوی لاوانی خەبات، بە ٸامادەبوونی بەرێز کاک بابەشێخی حسێنی سکرتێری گشتی سازمانی خەبات، ٸەندامانی سەرکردایەتی و کادر و پێشمەرگەکانی سازمانی خەبات و رێکخراوی لاوان لە بارەگای ناوەندی سازمانی خەبات بەرێوە چوو.
سەرەتای رێورەسمەکە بە دەقەیەک بێدەنگی بۆ رێزگرتن لە رۆحی پاکی هەموو شەهیدانی رێگای رزگاری کورد و کوردستان و لە سەروشیانەوە رێبەری نەتەوەیی گەلی کورد و دامەزرێنەری سازمانی خەبات جەنابی مامۆستا شێخ جەلالی حسێنی دەستی پێکرد.
دواتر بەرێز کاک بابەشێخ حسێنی پەیامێکی بەو بۆنەوە پێشکەش کرد، سکرتێری گشتی سازمانی خەبات لە پەیامەکەیدا وێڕای پیرۆزبایی بە بۆنەی هەشتەمین ساڵیادی دامەزراندنی رێکخراوی لاوانی خەبات، دەور و نەقشی لاوانی لە هەموو گۆرانکاریەکاندا بە ٸەرێنی ناو برد و رایگەیاند کە لاوان هێزی گۆرانخواز و پێشکەوتووی هەر کۆمەڵگاێکن. بەرێز کاک بابەشێخ لە بەشێکی دیکە لە وتەکانی دا ٸاماژەی بەوە کرد کە هەرچەندە سازمانی خەبات لە لایەن کۆمەڵێک لە شۆرشگێرانی بەٸەزموون دامەزرا، بەڵام هەر لە سەرەتاوە لاوان دەورێکی کاریگەریان لە بەرەوپێشچوونی سازمانی خەبات گێراوە و چاوخشاندنێک بە ناوی شەهیدانی قارەمانی سازمانی خەبات سەلمێنەری ٸەو راستیەن و تا بە ٸەمرۆش سازمانی خەبات پاڵپشت و پشتیوانی لاوان چ لە ناو ریزەکانی سازمانی خەبات و چ لە ناوخۆی کوردستانی ٸێران بووە و لاوانیش بە بیرێکی نەتەوەیی و شۆرشگێرانە درێژەدەری سیاسەت و بەرنامەکانی سازمانی خەبات بوون. کاک بابەشێخی حسێنی لە درێژەی وتەکانیدا وێرای دەستخۆشی لە دەستەی بەرێوەبەری و ٸەندامانی رێکخراوی لاوان، هیوای خواست کە ساڵی داهاتوو بتوانین ٸەم یادە لە کوردستانی رزگارکراوی خۆماندا بە شکۆی هەرچی زیاتر بەرێوە بەرین.
لە بەشێکی دیکەی مەراسمەکەدا پەیامی رێکخراوی لاوانی خەبات لە لایەن بەرێز فواد جەعفەری بەرێوەبەری رێکخراوی لاوان خوێندرایەوە. لە بەشێکی دیکەی رێورەسمەکەدا پەیامی رێکخراوی ٸافرەتانی خەبات لە لایەن خاتوو شایستە محەممەدی خوێندرایەوە.
لە برگەیەکی دیكەی رێورەسمەکەدا شێعرێکی جەنابی مامۆستا شێخ جەلالی حسێنی لە لایەن کاک هێرش یوسفی ئەندامی رێكخراوەوە خوێندرایەوە. جێگەی باسە کە بە مەبەستی سوپاس و پێزانین بۆ بەرێزان، کاک بابەشێخی حسێنی، کاک رەشید سلێمانی و رێکخراوی ٸافرەتان کە پاڵپشت و هاندەری رێکخراوەکەمان بوون، لەوحی رێزلێنانیان لە لایەن رێکخراوی لاوانەوە پێشکەش کرا. لە دواتر دا کورتە فیلمێک کە لە سەر کار و چالاکی لاوان لە ناوخۆ و دەرەوەی وڵات ٸامادە کرابوو پێشکەش کرا، و هەروەها كۆمەڵێك گۆرانی لەلایەن كۆری هونەریەوە پێشكەش كرا.
رێورەسمەکە بە شایی و هەڵپەرکێ کۆتایی پێهات
ڕێکه‌و 2019-05-04 22:22:15
به‌شی ( چالاکیه‌کان )







سیاسی