دووشهمه 15 جۆزهردان 2723
هه‌واڵی نوێ
- محەممەد مێهدی کەرمی و محەممەد حوسەینی لەسێدارەدران هه‌واڵ
- ٢٩هەمین رۆژی شۆرشی ژینا و کاردانەوە جیهانیەکان هه‌واڵ
- کورتەی هەواڵەکانی هەفتەی ڕابردووی کوردستان و ئێران هه‌واڵ
- کورت کراوەی هەواڵەکانی حەوتوی ڕابردوو سەبارەت بە کوردستان و ئێران هه‌واڵ
- کورتکراوەی هەواڵەکانی هەفتەی ڕابردوو سەبارەت بە کوردستان و ئێران هه‌واڵ
لة يادى شیمیاباران كردنى سه‌رده‌شتى سه‌رسه‌وزدا
ڕێکه‌و 2012-06-27 15:09:29
به‌شی ( وتار )
خاكى كوردستان و هه‌رچى چه‌كى قه‌ده‌غه‌كراوى غه‌یره موته‌عاریفه له‌م وه‌لاَته تاقیان كردۆته‌وه. له‌كاتى شه‌رِى ئێران _عێراق كه به‌شێك له‌كوردستان به‌سه‌ر ئه‌م دوو وه‌لاَته‌دا دابه‌شكراوه، زۆرترین زیانى ئینسانى ومادى به‌ر ئه‌م ناوچه كه‌وت و له‌م شه‌رِه ماڵ وێرانكه‌ره‌دا كه ٨ ساڵى خایاند،گه‌لى كورد زۆرترین ئازارى چێشت و له‌م ماوه‌دا چه‌ندین زام كه‌وته جه‌سته‌ی كه تا هه‌تایه سارِێژ نابێت. یه‌كێك له‌و زامانه‌ى كه تا ئیستاش هه‌ربه‌قوڵى ماوه‌ته‌وه، شیمیاباران كردنى سه‌رده‌شتى هه‌میشه سه‌ر سه‌وز بووكه له‌م شه‌رِه‌دا چه‌كى شیمیایى له‌سه‌ر تاقى كراوه و له‌ماوه‌ى چركه‌ساتێكدا سه‌دان نه‌فه‌ر شه‌هید وهه‌زاران كه‌سیش بریندار بوون. ئه‌م تاوانه به‌ڵگه‌یێكى دیكه‌یه بۆسه‌رتاوانه‌كانى دژمنانى كوردستان كه ده‌یانهه‌وێ ئه‌م نه‌ته‌وه قرِ بكه‌ن وئاسه‌وارى نه‌هێڵن. ئه‌م شێوه سه‌ركوت و هێرشه بۆ سه‌ر نه‌ته‌وه‌یێكى زیندووى وه‌ك كورد، ده‌چێته خانه‌ى جینۆسایدكردنى نه‌ته‌وه‌یێك و پێویسته كار بۆ ئه‌وه بكرێت كه ئه‌م پرس وكاره‌ساتانه‌ى كه مێژووى كوردى له‌سه‌ر بونیاد نراوه،بكرێته بابه‌تێكى گشتى و له كۆر و كۆمه‌ڵه نێونه‌ته‌وه‌ییه‌كاندا به جینۆساید وپاكتاوكردنى نه‌ته‌وه‌ى كورد ئه‌ژماربكرێت. به‌هۆى ده‌سه‌لاَتى رِژیمى ئاخوندى ئه‌م تاوانه سه‌رپۆش كراوه و وه‌ك پێویست شیمیاباران كردنى سه‌رده‌شت وكوشتن وبرینداربوونى زیاتر له٧٠٠٠كه‌س به‌گوێره‌ى پێویست رِه‌نگى نه‌داوه‌ته و به‌داخه‌وه ته‌نیا له رِۆژى خولقاندنى ئه‌م كاره‌ساته ،بیرمان ده‌كه‌وێته‌وه. تا ئێستاش به‌ركه‌وتوانى چه‌كى شیمیایى سه‌رده‌شت به‌ده‌ست نه‌خۆشیه‌وه ده‌ناڵێن و رِۆژانه ده‌مرن و به‌پێى پێویست چاره‌سه‌ر نه‌كراوون. ئه‌گه‌رچى رِژیمى رِووخاوى به‌عس ئه‌م كاره‌ساته‌ى خولقاند،به‌لاَم رِژیمى ئاخوندى له‌به‌رپێرِانه‌گه‌یشتن و ئاورِنه‌دانه‌وه له وه‌به‌ركه‌وتووانى ئه‌و چه‌كه،زامى خه‌لكى ئه‌و شاره‌ى قوڵتر كردۆته‌وه و ئازارى پاشماوه‌ى ئه‌و خه‌ڵكه‌ى رۆژله‌دواى رۆژ زیاتر كردوه. له‌لایێكى دیكه‌وه رِژیم هه‌وڵى ته‌واوى داوه ئه‌م جۆره كاره‌ساتانه‌ى كه به‌سه‌ر كورد هاتوون په‌رده‌پۆش بكات و به‌درێژایى مێژووى ده‌سه‌لاَتداریه‌تى هه‌وڵى داوه ده‌نگ ورِه‌نگ ومه‌زلومیه‌تى كورد به هیچ جێگه‌یێك رِانه‌گات. ئه‌م كاره‌ساتانه‌ى دیزه به‌ده‌رخۆنه‌كردوه و تا ئێستا هه‌وڵى نه‌داوه ئه‌م رِووداوه‌ى سه‌رده‌شت وقه‌تڵى عامى خه‌ڵكى ئه‌و شاره وه‌ك خۆى به دنیاى ده‌ره‌وه بناسینێَت. رِژیم به قازانجى خۆى ساڵانه هێندیك كۆرِوكۆبوونه‌وه سه‌باره‌ت به‌وكاره‌ساته گرێ ده‌دات و له‌جیاتى گرینگیدان به‌چۆنیه‌تى رِوودانى ئه‌و كاره‌ساته وسارێژكردنى زامى برینداران ، هێندێك بابه‌تى نه‌ویستراو دووباره بۆوه دێنێته ئاراوه و پێخۆرى ته‌بلیغاتى پێوه‌ده‌كات. دیاره رِژیم به‌هیچ جۆرێك نایهه‌وێ ئه‌و كاره‌ساته وه‌ك خۆى بگوازرێته‌وه و به‌قازانجى نه‌ته‌وه‌ى كورد ته‌واوببێت، بۆ ئه‌وه‌ى دۆزى رِه‌واى نه‌ته‌وه‌ى كورد هه‌روا قه‌تیس بمێنێت وجیهانى ده‌ره‌وه له نه‌هامه‌تى وهه‌روه‌ها جینایه‌تى داگیركه‌ران سه‌باره‌ت به‌م گه‌له، ئاگادار نه‌بن هه‌وڵ ده‌دات ئه‌م رِووداوانه‌ى كه‌به‌سه‌ر نه‌ته‌وه‌كه‌ماندا هاتووه بچووك بكاته‌وه و ئه‌گه‌ر بۆشى سه‌ربچێت ئه‌وا باسێك بۆ ئه‌م پرسانه نه‌هێڵێت. بۆ به‌رپه‌رچدانه‌وه‌ى ئه‌م سیاسه‌ته‌ى رِژیم،پێویسته هه‌موو ئازادیخوازان وبه‌تایبه‌ت هێزه خه‌باتكاره‌كانى كوردستان ،گرینگى زیاتر به‌م كاره‌ساتانه بده‌ن وبه‌كۆكردنه‌وه‌ى به‌ڵگه و دیكوَمێنت ،هه‌وڵه‌كانى خۆیان بۆ زیاتر ناساندنى ئه‌م تاوانانه به دنیایى ده‌ره‌وه زیاتر چرِ بكه‌نه‌وه. پێویسته چه‌نده بۆ به‌جینۆسایدكردنى شیمیاباران كردنى هه‌ڵه‌بجه‌ى شه‌هید هه‌وڵدرا،ئه‌وه‌نده‌ش بۆ سه‌رده‌شت هه‌وڵ بدرێ، چونكه ئه‌م دووكاره‌ساته رِه‌مز و هێماى قرِكردنى نه‌ته‌وه‌یێكى ژێرده‌ست وچه‌وساوه‌ن كه به درێژایى مێژوو به‌م شێوه غه‌دریان لێكراوه و هه‌تا ئێستاش ناتوانن پر ِبه گه‌روى خۆیان هاوارى ئازادیخوازى سه‌ربده‌نَ.
ڕێکه‌و 2012-06-27 15:09:29
به‌شی ( وتار )
سیاسی
