بەداخەوە لە ئێران دا بەبوونی رژیمی دیكتاتۆری ئێستا لاوان بە جێ گوومان چاویان لێ دەكرێ، بەتایبەت ئەو لاوانەی بە چاوێكی كراوە و بە بیرێكی رۆشن لە داهاتووی خۆیان و وەڵاتەكەیان دەروانن، هەر بۆیە هەر لە سەرەتای هاتنە سەركاری ئەو دەسەڵاتەوە بیر و هزری لاوان كرایە ئامانج، بە شێوەیێك كە بە پیلان و بەرنامەی جۆراوجۆر ویستیان مەرامەكانی خۆیان بسەپێنن بە سەر لاواندا و یا خود لە سەر ئەو بەرنامانە رۆیشتن كە لاوان دوور خەنەوە لە بیركردنەوە لە وەڵات و لە حاست مەسەلە گرینگەكانی ئێران بێ دەربەست بن. 

لە كوردستاندا كە هەر لە بەرێ ڕا لاوان پێشڕەو بوون، هۆی بەرەو پێشچوونی كۆمەڵی كوردەواری بوون و هەر چی ئاڵووگۆری فكری و فەرهەنگی و سیاسیە لە سەر دەستی لاوان كراوە، بەڵام به‌داخه‌وه‌ لاوان له‌ كوردستانی ئێران بوونه‌ته‌ قوربانی سیاسه‌ته‌ نادروست و دژمنكارانەكانی ڕژێمی ئێران، ئەو رژیمە بە بەرنامەوە دەستیان دایە بە لارێدا بردنی لاوان و بە برسی هێشتنەوەی كۆمەڵگای كوردستان و بایەخ نەدان بە ژێرخانی ئابووری ئەو ناوچە فشارێكی ئابووری خستە سەر لاوی كورد، هەروەها لە درێژەی ئەو فشارانەدا دیاردە كۆمەڵایەتی و فەرهەنگیەكان وای لە لاوانی كورد كردوە كە ئەو توێژە گرینگەی كۆمەڵگای كوردستان گیرۆدەی دەیان دیاردە بنەوە، بۆ ئەوەی لاوانی كورد نەتوانن بیر لە مەسەلە نەتەوایەتیان و مافەكانیان بكەنەوە. 

ناوه‌ندی لاوانی خه‌باتی كوردستانی ئێران وێڕای پیرۆزبایی ٢٢ی گەلاوێژ له‌ سه‌رجه‌م لاوانی جیهان و ئێران به‌گشتی و لاوانی كوردستانی ئێران به‌تایبه‌تی، داوا له‌سه‌رجه‌م لاوانی خه‌باتكار و شۆڕشگێڕی كوردستان ده‌كات كه‌ ڕیزه‌كانیان یه‌كبخه‌ن و زیاتر له‌ جاران لە به‌رامبه‌ر سیاسته‌ نادروست و دزێوەكانی ڕژێمی ئێران بوه‌ستنەوە، چوونكە بە هاتنی شنەبای ئازادی لە ناوچەكە، ئەركی لاوان لە رابردوو قورستر دەبێ. هەر بۆیە پێویستە لاوان بە شێوەیێكی بەرین ریزەكانی خۆیان یەكخەن و ئامادە بن بۆ ئاڵووگۆڕی بنەڕەتی لە ئێران و راماڵینی پێگەی داگیركەران و دەسەڵاتی دیكتاتۆری ئاخوندی لە كوردستان.

سەركەوێ خەباتی نەتەوەی كورد

هەر بژی لاوی كورد پێشڕەوی بزوتنەوەی مافخوازانەی خەڵكی كوردستان

ناوەندی لاوانی خەباتی كوردستانی ئێران

دەستەی بەرێوەبەری

٢٢ی گەلاوێژی ١٣٩١