لاوانی خۆڕاگری کوردستان
ئەندامانی تێکۆشەری ریزەکانی رێکخراوی لاوان
بەبۆنەی رۆژی جیهانی لاوان گەرمترین پیرۆزباییتان پێشکەش دەکەین و بەو هیوایەی ئەو رۆژە ببێتە هەوێنی گەیشتنی لاوانی ستەملێکراوی کوردستان بە تەواوی ئامانج و مافە رەواکانیان.
لە ساڵی ١٩٩٩ زاینی رێکخراوی نەتەوە یەکگرتوەکان رۆژی ١٢ی ئاگوستی وەک ڕۆژی جیهانی لاوان پەسەندکرد.
بەبۆنەی رۆژی جیهانی لاوان ساڵانە لە زۆربەی وڵاتانی جیهان بە بەرنامە و پرۆگرامی جۆراوجۆر ئەو یادە بەرزڕادەگیرێت، رێکخراوی لاوانی خەباتیش هەر ساڵێک بە پەیام و بەرنامەی جیاواز یادی ئەو رۆژەی کردووەتەوە.
رۆژی جیهانی لاوان دەرفەتێکە بۆ دڵخۆش بوون بەو دەستکەوت و پێشەوەچوونانەی لاوان لەسەرتاسەری جیهان لەزۆربەی بوارەکان پێی گەیشتوون، بەڵام بەداخەوە لە کوردستان و ئێران ئەو یادە نەهامەتی و ئازارەکانی لاوانمان لە سایەی دەسەڵاتی گەندەڵی رژێمی ئاخوندی بیردەهێنێتەوە، رژیمێک کە بۆ ماوەی زیاتر لە ٤٠ ساڵ کاری لەسەر شکاندن و بێهێزکردنی لاوان کردووە و تەنها ئەشکەنجە، زیندان و سێدارەی پێ رەوا بینیون.
لە زۆربەی وڵاتانی پێشکەوتووی جیهاندا لاوان پێداویستییەکانی خوێندن و پەروردە و هەلی کاریان بۆ فەراهەم کراوە بۆ ئەوەی خۆیان ببەنەپێشەوە و بە باشترین شێوە خزمەت بە گەل و نیشتمانیان بکەن.
بەڵام لە ئێراندا نەک هیچ کام لەو مافە سەرەتاییانە بە لاوان رەوا نابیندرێت بەڵکو رژێمی ئاخوندی بە تەواوی توانای خۆی کار بۆ ژێرپێخستی هێز و ورەی لاوانی کوردستان و ئێران دەکات.
بەڵام خۆشبەختانە لاوان سەرڕای تاوانەکانی رژێمی ئاخوندی زۆر چالاکانە لە وەرگرتی زانست و خۆپەروردەکردن بەردەوام بوون و دژ بە پلانە گڵاوەکانی رژێمی ئاخوندی وەستاونەتەوە.
هەر لەسەرەتای قۆرخکردنی دەسەڵات لەلایەن رژێمی ئاخوندی، لاوان دەوری گرینگیان گێڕاوە لە هەڵسوڕاندی ئەرکەکانی خەبات و شۆڕش و ئێستاش لە ناوخۆ و دەرەوەی وڵات پێشڕەوی خۆپیشاندان و رێپێوانەکان دەکەن و لە هەوڵی گەیاندنی دەنگی دانیشتوان و لاوانی کوردستان و ئێرانن بە کۆمەڵگای جیهانی و رێکخراوەکانی مافی مرۆڤ.
رێکخروای لاوان باوەڕی وایە کە تەنها چارەسەر بۆ باردۆخی خراپی لاوان و دانیشتوانی کوردستان و ئیران و گەیشتن بە ئامانج و مافە رەواکانیان بە تەفروتوونابوون و لەناوچوونی یەکجاری رژێمی دیکتاتۆری ئاخوندییە.
رێکخراوی لاوانی خەبات وەک هەمیشە بەردەوام دەبێت لە خزمەت کردن بە لاوانی کوردستان و ئەندامانی ریزەکانی و تاکو گەیشتنی لاوان و هاونیشتمانیان بە مافە رەواکانیان و بە ئامانج گەیشتنی خەباتی رەوای گەلەکەمان و رووخانی رژێمی ئاخوندی لە خەبات و تێکوشان بەردەوام دەبێت.
جارێکی تر پیرۆزبایی رۆژی جیهانی لاوانتان پێدەڵێین و بەهیوای ئەوەی ساڵی داهاتوو ئەو یادە لە کوردستانی ئازادکراو بەرزڕابگرین.
سەرکەوێت خەباتی رەوای گەلەکەمان
بڕوخێت رژێمی دیکتاتۆری ئاخوندی
رێکخراوی لاوانی خەباتی کوردستانی ئێران
دەستەی بەرێوەبەری
١٢ی ئاگوستی ٢٠ ٢١
