هاونیشتمانیانی تێکۆشەر!
لاوانی هێژا و خۆڕاگر!
سی پووشپەڕی ئەمساڵ ۱۵ ساڵ بەسەر کۆچی دوایی مامۆستا شێخ جەلال حوسەینی، ڕێبەر و دامەزرێنەری سازمانی خەبات ی کوردستانی ئێران تێدەپەڕێت.
مامۆستا شێخ جەلال حوسەینی یەکێک بوو لەکەسایەتیە لێهاتوو، خۆشناو وە بەناوبانگەکانی کورد، کە لەڕێگەی سەربەستی و ڕزگاری گەلی کورد لەکوردستان و ئێران زۆربەی هەرە زۆری ژیانی تەرخانکردو بیروهزری بووە چوڵە چرای ڕێگەی ئازادی و نیشتمانپەروەری ومافخوازی.
مامۆستا شێخ جەلال لە ۳۰ی گوڵانی ساڵی ۱۳۰۶ی کۆچی خۆری لەشاری بانەو لەخانەوادەیەکی ئائینی و نیشتمانپەرەوەر چاوی بە ژیان هەڵێناو بەهۆی نیشتمانپەروەری خانەوادەکەی، هەر لەسەرەتای لاویەتیەوە خولیای موبارزە بۆ ستاندنەوەی مافی گەلی کوردی زوڵملێکراوی لەدڵدا چەکەرەی کرد.
بەڕێزیان وێڕای خوێندنی ئەلفوبێ و دەرس و وانەی ئائینی، لە تەمەنی ۱۶ ساڵیدا بڕیاریدا ببێتە ئەندام لەکۆمەڵەی ژێکاف و لەساڵی ۱۳۲۳ لەو ڕێکخراوەدا کە یەکەمین ڕێکخراوی فەرمی کوردستانی لەکوردستانی ڕۆژهەڵات بوو، شانازی ئەندامەتی وەرگرتو ئەم جارە چەخماخەی کاری سیاسی لەچوارچێوەی کۆمەڵەی ژێکافدا دەست پێکرد.
مامۆستا شێخ جەلال وێڕای ئەوەی کە کەسایەتیەکی ئائینی و موبارزێکی سیاسیی بوو، یەکێک لەبلیمەتەکانی ئەدەب و زمانناسی کوردی بوو کە خزمەتێکی گەورەی بەپاراستن زمانی پاراوی کوردی و بەرهەمە ئەدەبی و هۆنراوەکانی ئێستاش وەک سەرچاوەیەکی گرنگی نەتەوەیی و لەلایەن مامۆستایانی ئەدیب و زمانناس کەڵکی لێوەردەگیرێت.
مامۆستا شێخ جەلال پاش هەڵوەشاندنەوەی کۆمەڵەی ژێکاف، لەخەبات و موبارزە بەردەوام بوو و لەشۆڕشەکانی ساڵی ۴۶ و ۴۷ و هەروەها لەشۆڕشی گەلانی ئێران لەساڵی ۱۳۵۷دا ڕۆڵێکی سەرەکی بوو.
جەنابی مامۆستا لەدەیەی چلەمداو پێش ڕووخانی دەسەڵاتی پاشایەتی لەئێران، وەکوو خاوەن نەزەرو جێی متمانە بوو بۆ هەموو چالاکانی سیاسی، دژبە دەسەڵاتی پاشایەتی و یارمەتیدەری نەیارانی ئەو دەسەڵاتە بوو، بەجۆرێک کە له‌‌‌ڕۆژنامه‌‌‌ی ژمارە ٧١٨ی"کوردستان"ی زمانحاڵی حیزبی دیموکراتی کوردستاندا له‌‌‌سه‌‌‌ر ده‌‌‌ور و نه‌‌‌قشی که‌‌‌سایه‌‌‌تی جەنابی مامۆستا به‌‌‌و شێوه ده‌‌‌نووسێ که مامۆستا شێخ جەلال حوسەینی، لەتەواوی ئەو ساڵانەدا لەگەڵ ئەوەی بۆخۆی ڕاستەوخۆ پێوەندی بە حیزبی دیموکرات و کاری حیزبیه‌ەوە نەبوو، بەڵام حوجرەی مزگەوتەکەی بە تایبەت لە ساڵەکانی دەیەی چلی هەتاوی و سەرەتای پەنجاکاندا، بەردەوام جێگەی داڵده‌دان و حەوانەوەی تێکۆشەرانی سیاسی بوو. لەتەوای ئەو ساڵانەدا نە تەنیا قەت دەستی بە ڕوویانەوە نەنا، بەڵکوو لەپشتیوانی و یارمەتیی فکری و ماڵی بێبەشی نەکردن. ئەو هەڵسوکەوتەی مامۆستا لەباوەڕی قووڵی بەخەبات لەدژی ڕژیمی پاشایەتی و هەوڵدان بۆ بەدیهێنانی مافە ڕەواکانی گەلی کورد، سەرچاوەی دەگرت.
جەنابیان پاش ڕووخانی دەسەڵاتی پاشایەتی و هەلوومەرجی هاتنە سەرکاری ئاخوندەکان، هەستیان بە دڕندەیی ئەو دەسەڵاتە کرد و پاش هێرشی هێزی گاردی جاویدان بۆ سەر کوردستان و فەرمانی جیهادی خومەینی بۆ قەتڵ و عامی نەتەوەی کورد، هەروەها بەهەڵوەشاندنەوەی دەفتەری مامۆستا شێخ عیزەدین حوسەینی، زۆرتر هەستی بە بەرپرسایەتی لەو دۆخە هەستیارەدا کردو دوای لێدانی هێزی گاردی جاویدان لەساڵی ۱۳۵۸ی کۆچی خۆریداو تێکشکاندنی ئەو هێزە، لەڕۆژی ۵ی خەرمانانی ۱۳۵۹، لەگەڵ چەند مامۆستای ئائینی دیکەدا، سازمانی نەتەوایەتی و ئیسلامی خەباتیان دامەزراند کە ڕەوتێکی نوێی بۆدژایەتی حکومەتی دژە کوردی تازە بەدەسەڵات گەیشتوو لەئێران بوو کە دەکرێ وەک یەکێک لەسەرەکیترین دەسکەوتی ژیانی جەنابیان کە ڕێگەیەکی پڕ لەمرۆڤایەتی و نیشتمانپەروەریەو توانیویەتی هەموو چین و توێژەکانی کۆمەڵگەی کوردستان لەخۆدا جێ بکاتەوە.
جەنابی مامۆستا ڕەهەندە فکریەکانی زۆر پێشکەوتووتر لەسەردەمی خۆی بوو، بۆیە باوڕی تایبەتی بەمافی چین و توێژەکانی کۆمەڵگە بوو. بەتایبەت لاوان و ئافرەتان و لەدامەزراندنی سازماندا، لاوان ڕۆڵیان گێڕاو لە فکری سەردەمانەیان کەڵک وەرگیردرا. سەبارەت بەئافرەتانیش دەبێ بوترێ جەنابیان لەو سەردەمەی کە ژمارەیەک خەڵک لەکوردستان ناردنی کچانیان بۆ قوتابخانەو خوێندن پێی عەیب و عار بوو، جەنابیان ڕەچەشکێنی ئەو نەریتە ناشیرینە بوون و کچەکانی خۆی بۆ خونێندن دەناردو هاندەری کچان و ئافرەتان بوو بۆ خوێندن و بەرەوپێشچوون.
ژیانی مامۆستا شێخ جەلال حوسەینی، لێوانلێوە لەشانازی، سەروەری، خزمەتی لەخۆبردوانەو خۆنەویستی لەڕێگەی ئازادی و ڕزگاری نەتەوەی کوردو مرۆڤایەتی بوو و پاش ۶٥ ساڵ خەباتی بێوچان و پڕدەسکەوت، لەساڵی ۱۳۸۹ی کۆچی خۆری لەشاری هەولێر خۆری ژیانی ئاوا بوو، و بۆ هەمیشە بەجەستە بەجێی هێشتین.کۆچی دوایی مامۆستا شێخ جەلال حوسەینی کەلێنێکی گەورەیە بۆ ئازادیخوازان و ڕێبوارانی ڕێگەی رزگاری و مرۆڤایەتی و تێکۆشەرانی سازمانی خەبات.
ڕێکخراوی لاوانی خەباتی کوردستانی ئێران، وێڕای دەربڕینی خەم و پەژارەی بۆ یادی ۱۵ ساڵەی کۆچی دوایی مامۆستا شێخ جەلال حوسەینی، بەڵێنی ئەوە ئەدات کە لەسەر ئەو ڕێبازە پڕ شانازی و پڕ سەروەریە پێداگر بێت و تەواوی هەوڵ و توانای خۆی بکاردێنێ تا بتوانێت بیروهزرەکانی جەنابی مامۆستا وەک چۆڵەچرای ڕێگەی ئازادی و ڕزگاری نیشتمانی داگیرکراو، بباتە ناو کۆمەڵانی خەڵکی کوردستان و پەرە پێی بدات تا میللەتی کورد بتوانێ کەڵک لەو ڕێگە مرۆڤانەو ئینسان دۆستانە وەربگرێ و نیشتمان و گەلی کورد بەرو ئازادی بەڕێت.
ڕێکخراوی لاوانی خەباتی کوردستانی ئێران
دەستەی بەڕێوەبەری
۲۸ی پووشپەڕ ۱۴۰۴ کۆچی خۆری
