هاووڵاتیانی ئازادیخواز!
لاوانی تێکۆشەری ئێران و کوردستان!
لە ۱۷ی دیسامبەری ۱۹۹۹ی زائینی، ڕۆژی ۱۲ی ئاگۆست بەرانبەر بە ۲۱ی گەلاوێژ، لەلایەن ڕێکخراوی یونێسکۆ، بە ڕۆژی جیهانی لاوان دیاری کراوە. بەم بۆنەوە گەرمترین پیرۆزبایی پێشکەش بە لاوانی هێژاو ئازادیخواز لە سەرانسەری جیهان، ئێران، کوردستان و بەتایبەتی لاوانی تێکۆشەر لە ڕیزەکانی ڕێکخراوی لاوانی خەباتی کوردستانی ئێران دەکەین.
لاوان هێزی بزوێنەر و هێماو پۆتانسیێلی هەر کۆمەڵگەیەکن و بە ورەو وزەیان دەتوانن هەر چەشنە گۆڕانکاریەک لە کۆمەڵگەدا ساز بکەن. ئەو توانا کە لەلاواندا هەیە، بۆتە هۆی ئەوەی کە کۆمەڵگە دیمۆکرات و پێشکەوتنخوازەکان، هەوڵ بدەن هەر لە منداڵیەوە بارهێنان و ڕاهێنانی ئەو توێژە بکەن و بۆ گەشە پێدانی وڵات و نیشتمانەکەیان لە داهاتوودا کەڵکی بەجێیان لێ وەربگرن و ڕۆژ لەدوای ڕۆژ وڵاتەکەیان زۆرتر سەربخەن. ئەو سیاسەت و پەیڕەوە لەلایەکەوه بایەخدار بوونی لاوان ئەنوێنێت و لەلایەکی دیکەوە ئەو توێژە دڵخۆش دەکات بە کاریگەریان و هەنگاونان بۆ پێشخستنی وڵات و کۆمەڵگە مسۆگەر دەکات. بەڵام بەداخەوە لاوان لە ئێران و بەتایبەتی لە کوردستانی ئێران، بەهۆی بوونی دەسەڵاتی دیکتاتۆر و چەوسێنەر، لەو مافە بێبەشن و ڕێگری لە هەر چەشنە پێشکەوتنێکیان دەکرێت کە بە پێچەوانەی ویستی دەسەڵات بێ. دەسەڵاتی ئاخوندی ئێران، مەبناو ئەساسی سیاسەتەکانی خۆی لەسەر پەیڕەوکردنی یاساو ڕێکارەکانی ویلایەتی فەقیە داڕشتوەو دەست بەسەر بلیمەتی لاوان بۆ ویستە ئاژاوەگێڕانەکانی خۆیدا دەگرێت. زانستەکانی لاوان بۆ بەکارگرتنی لە چەکی ناوەکەیی، بەلاڕێدا بردنی مێژوو، چەواشەکاری سیاسی و هێزی سایبری هان ئەدات و ڕێگەنادات ئەو بلیمەتیانە لە ناو ئێراندا خزمەت بە تێکڕای خەڵک بکەن و لە ڕێگەی دروست و شیاودا کاریان پێی بکرێت. ئەو سیاسەتە دژمنانەی دەسەڵات بوەتە هۆی لەناوچوونی بلیمەتیەکان یان کۆچ کردنی نایاسایی لە وڵات و ئاوارەگی هاووڵاتیانێک کە بە خولیای سەرکەوتن و پێشکەوتنیان، یان ئاوارەی وڵاتان دەبن و یان له دەریاکاندا دەخنکێن.
لاوانی بەهەڵوێست و ڕزگاریخواز!
ئەمساڵ لە کاتێکدا یادی ڕۆژی جیهانی لاوان دەکەینەوە کە لاوانی وڵاتەکەمان له ئێران و کوردستان لە خراپترین دۆخی خۆیاندان و جگە لە فشارەکانی پێشتر، پاش شەڕی ۱۲ ڕۆژەی ڕژیمی ئێران لەگەڵ ئیسرائیلدا، بە دەیان بیانوی ناڕاست و بێ بنەما فشاریان خراوەتە سەر و تەنگیان پێ هەڵچنیون. نەبوونی ئاو، برق و گرانی زۆرتر و هەڕەمەکی، لە ئێستادا فشارەکانی وەک بێکاری، کۆڵبەری، فشاری سیاسی، ئابوری، خەفەقان و هتد ... زۆرتر کردوە. ڕۆژانە ڕژیمی ئێران برق لە خەڵک ئەبڕێت و لە مەزرەعەکانی بیت کۆینداو بۆ قەرەبوو کردنی خەسارەکانی شەڕ و داهات بۆ سەرلەنوێی سازکردنی چەکی ناوکەیی سەرف دەکات، بەرزبوونەوەی نرخی دۆلار بۆ گرانکردنی کەلووپەل، داخستنی شوێنەکانی کار، پێڕانەگەیشتن بە نیازەکانی خەڵک، سیاسەتی برسی کردن و شەڕی دەروونی و ڕەوانی و چەندین ئاژاوەی دیکە کە کارەساتی زۆر زیاتر دەخوڵقێنیت، لە پەیڕەوەکانی ڕژیمی ئێرانە کە بۆ مانەوەی خۆی لە دەسەڵاتدا دەیکات.
لەوەها هەلوومەرجێکدا، ڕۆڵی خەڵکی وڵات و بەتایبەتی لاوان بۆ ڕێگری کردن لە خەساری زیاتر بە کۆمەڵگە، زۆرتر دێتە ئاراوەو دەبێ وەک چۆن لە دوای شەهید بوونی سێ کەس لە ئاگرەکەی ئاویەری شاری سنە، دەرکەوت دەسەڵاتدارانی ڕژیم هیچ بایەخێک بۆ وڵات و هاووڵاتیانمان دانانێن، هەر بۆیە خەڵک بۆ خۆیان قۆڵیان لێ هەڵماڵن و پرۆسەی ڕووخانی ئەو دەسەڵاتە ستارت لێ بدەن. ئەمڕۆ خەڵکی وڵات و نیشتمانی داگیرکراو زۆر ئاگاترن و بە پووچەڵکردنی ئاژاوەگێڕیەکانی ڕژیمی ئێران بە یەکگرتوویی وێڕای بوونی جیاوازی لە بیر و هزر و باوڕەکانیان، تەنیا یەک دژمنی سەرەکیان هەیەو ئەوەش حکومەتی دژە خەڵکی ئاخوندەکانەو دەبێ دەست لە دەستی یەکتر هەنگاو بۆ ئازاد کردنی نیشتمان لەدەستی داگیرکەری دژ بە وڵات و نیشتمان، بەرەو پێش بڕۆن.
لەڕاستیدا تەنیا بەلەناوچوونی حکومەتی ئاخوندی و جێگرکردنی بە حکومەتێکی دیمۆکراتیک و خەڵکی، خەڵکی ئێران و کوردستان تامی ئازادی و ڕزگاری دەچێژێت و سەربەستی بۆ خۆی و نەوەی داهاتوومان مسۆگەر بکات.
هیوادارین کە لە داهاتویەکی نزیکدا ئەو سەربەستی و ڕزگاریە لە وڵاتەکەماندا ببینین و بینەری شادی و خۆشی میللەت و لاوانی هێژا لە وڵاتەکەماندا بین.
بڕۆخێ ڕژیمی دژە مرۆڤی ئاخوندی
سەرکەوێ بزاڤی ڕەوای ئازادیخوازی
ڕێکخراوی لاوانی خەباتی کوردستانی ئێران
دەستەی بەڕێوەبەری
