بە وتەی لێپرسراوی رێکخراوی "نێهزەتی فێرکاری"ی ئێران، لەو وڵاتە ٩ میلیۆن و ٧١٩ هەزار هاووڵاتیی نەخوێندەوار هەیە.
عەلی باقرزادە لە لێدوانێکدا لەگەڵ "هەواڵدەریی فارس" وتوویەتی، ئاماری نەخوێندەواری لە ئێران، بەپێی ئامارەی حەشیمەتی ساڵی ١٣٩٠ بڵاو کراوەتەوە و بێگومان زیاتریش بووە.
باقرزادە ئاماژەی بەوەش داوە، نزیک بە ٤ میلیۆن لە نەخوێندەوارانی ئێران تەمەنیان لە نێوان ١٠ هەتا ٤٩ ساڵ دایە و راشیگەیاندووە، گرینگیی ئەم مەسەلەیە لەوە دایە چونکە ئەو کەسانە لەناو ریزە تەمەنی بەرهەمهێنەر و کارای کۆمەڵگای ئێران دان.
لێپرسراوان رێکخراوی "نێهزەتی فێرکاری"ی ئێران وتوویەتی کە ئێران لەباری ئاماری نەخوێندەوارییەوە لە وڵاتانی وەک: "قەتەر، عەرەبستان، بەحرەین و تورکیە"ش زیاترە.
رێژە و چوونە سەری ئاماری نەخوێندەواریی لە ئێران لە کاتێکدا بە بەراوردی ساڵی ١٣٩٠ رووی لە زیادبوون کردووە، کە بەرپرسان و لێپرسراوانی پەروەردەیی ئێران بەردەوام باس لە بنبڕکردنی نەخوێنەواری لە ئێران دەکەن.
مامۆستایان و چالاکانی فەرهەنگی لەو باوەڕە دان ئاماری ١٠ میلیۆن نەخوێندەواری لە ئێران بەپێی ئامارە فەرمییەکان بڵاو کراوەتەوە کە ئامارە غەیرە فەرمییەکان باس لە رێژەیەکی لەوە زیاتر دەکەن.
