به‌پێی ئامارێکی وه‌زاره‌تی ته‌ندروستی ئێران له مانگی ئاداری ٢٠ ١٢وه ٢٤ هه‌زار و ٢٩٠ که‌س له ئێراندا گیرۆده‌ی ڤایرۆسی ئایدز بون و کرماشانیش له‌ریزبه‌ندی توشبواندا یه‌که‌مه.
له رێورەسمێکدا که به بۆنه‌ی به‌ره‌نگاری نه‌خۆشی ئایدز له شاری کرماشان له رۆژهه‌ڵاتی کوردستان به‌‌ڕێوه‌چو، ئامارێک راگه‌یه‌ندرا که به‌پێی ئه‌وه ژماره‌ی توشبوان به ڤایرۆسی ئایدز له ماوه‌ی ساڵی ٢٠ ١٢ له شاری کرماشان ده‌گاته (٣) هه‌زار که‌س.
هه‌ر به پێی ئه‌و ئاماره پارێزگای کرماشان به پله‌ی یه‌که‌می ریزبەندی له توشبون به ڤایرسی ئایدز له ئێراندا هه‌یه. ئه‌وه له کاتێکدایه له ماوه‌ی رابردودا به‌رپرسانی ته‌ندروستی ئێران رایانگه‌یاند، به لانی که‌مه‌وه ٩٠ هه‌زار که‌س له ئێراندا توشی نه‌خۆشی ئایدز بون و ته‌مه‌نی توشبوان به‌و نه‌خۆشیه بۆ ١١ ساڵ دابه‌زیوه.
