برسێتی هه‌‌ڕه‌شه‌ له‌ یه‌ک ملیۆن سوری ده‌کات

به‌رنامه‌ی خۆراکی جیهانی سه‌ر به‌ نه‌ته‌وه‌ یه‌کگرتوه‌کان رایگه‌یاند: یه‌ک ملیۆن هاوڵاتی سوریا هه‌‌ڕه‌شه‌ی برسێتیان له‌سه‌ره‌ و به‌ ئاسانی خۆراکیان ده‌ستناکه‌وێت.ئیلیزابێس پێرز، وته‌بێژی به‌رنامه‌ی خۆراکی جیهانی رایگه‌یاند: رێکخراوی مانگی سوری سوریا هاوکاری خۆراکی گه‌یاندوته‌ یه‌ک ملیۆن و پێنج سه‌د هه‌زار سوری، له‌ کۆی دو ملیۆن و نیو، له‌به‌رئه‌وه‌ یه‌ک ملیۆنیان هاوکاری خۆراکیان پێنه‌گه‌یشتوه‌ و هه‌‌ڕه‌شه‌ی برسیتیان له‌سه‌ره‌.

ئاماژه‌ی به‌وه‌شکردوه‌: ناتوانرێت خۆراک بگه‌یه‌نرێته‌ ئه‌و که‌سانه‌ی پێویستیانه‌، به‌هۆی به‌کارنه‌هێنانی به‌نده‌ری ته‌‌ڕتوس، له‌به‌ر بارودۆخی ئاسایشی ئه‌و ناوچه‌یه‌. وته‌بێژی به‌رنامه‌ی خۆراکی جیهانی رایگه‌یاند: کارمه‌ندانی به‌رنامه‌ی خۆراک به‌هۆی خراپی بارودۆخی ناوچه‌کانی حمس و حه‌ڵه‌ب و قامیشلیه‌وه‌ به‌شێوه‌یه‌کی کاتی له‌و ناوچانه‌ کشاونه‌ته‌وه‌.