فیلمی سینه‌مایی "پێش به‌فر بارین" له ده‌رهێنانی سینه‌ماکاری کورد "هیشام زه‌مان" له ٢٣مین خولی فێستیڤاڵی نێوده‌وڵه‌تی فیلمی "ترۆمسۆ" له وڵاتی نۆروێژ نمایش ده‌کرێت.
به‌پێی هه‌واڵی به‌شی راگه‌یاندنی فیلمی سینه‌مایی "پێش به‌فر بارین" سه‌ر له ئێوارێی رۆژی سێ‌شه‌ممه رێکه‌وه‌تی ٢٦ی به‌فرانبار به ئاماده بوونی ئه‌و ده‌رهێنه‌ره کورده له ٢٣مین خولی فێستیڤاڵی نێوده‌وڵه‌تیی "ترۆمسۆ" له وڵاتی نۆروێژ ده‌چێته سه‌ر په‌رده‌ی نمایش کردن. پێش به‌فر بارین" فیلمێکه سه‌باره‌ت به خێزان، خۆشه‌ویستی، به‌ها و نامووس که به کورتی باس له ژیان و به‌سه‌رهاتی کوڕیکی لاو ده‌کات که به زۆرێک له وڵاتاندا ده‌گڕێ و ده‌که‌وێته ژێر کاریگه‌ریی نه‌ریت و کولتووره بیانییه‌کانه‌وه و گۆڕانکاری به‌سه‌ردا دێت. فستیڤاڵی نێوده‌وڵه‌تیی "ترۆمسۆ" به به‌شداری زۆربه‌ی وڵاتان له ئاستی جیهاندا بۆ ماوه‌ی ٥ رۆژ له ولاتی نۆروێژ به‌‌ڕێوه ده‌چێت که بڕیاره له سه‌ره‌تای کرانه‌وه‌ی ئه‌و فێستیڤاڵه‌دا فیلمی سینه‌مایی "پێش به‌فر باین" نمایش بکرێت.
