میسرØ› توندوتیژیه‌کان‌ سه‌ریهه‌ڵدایه‌وه‌و ژماره‌یه‌ک خۆپیشانده‌ریش کوژران

بڕیاری‌ دادگای‌ میسر بۆ سه‌پاندنی‌ سزای‌ له‌سێداره‌دان به‌سه‌ر ٢١ که‌س له‌تۆمه‌تبارانی‌ روداوی‌ یاریگه‌که‌ی‌ پۆڕسه‌عید ناڕه‌زایه‌تی‌ لێده‌که‌وێته‌وه‌‌و به‌هۆی‌ پێکدادانه‌وه‌ له‌گه‌ڵ هێزه‌کانی‌ پۆلیس دو که‌س ده‌کوژرێن‌و نۆ که‌سی‌ دیکه‌ش بریندار ده‌بن. دوای‌ ده‌رچونی‌ حوکمی‌ له‌سێداره‌دان بۆ ٢١ که‌س له‌تۆمه‌تبارانی‌ روداوی ‌"ره‌شه‌کوژییه‌که‌ی‌ پۆرسه‌عید" شه‌پۆلێک ناڕه‌زایه‌تی‌‌و توندوتیژی‌ له‌هه‌ردو شاری‌ قاهیره‌ی‌ پایته‌خ‌و پۆرسه‌عد له‌میسر ده‌ستیپێکرده‌وه‌. به‌وته‌ی‌ سه‌رچاوه‌ پزیشکییه‌کان له‌میسر، به‌هۆی‌ گازی‌ فرمێسکڕێژه‌وه‌ که‌ له‌لایه‌ن هێزه‌ ئه‌منییه‌کانه‌وه‌ به‌کارهێنراوه‌، دو خۆپیشانده‌ر له‌ناوچه‌ی‌ که‌ناری‌ نیل له‌قاهیره‌ی‌ پایته‌خت کوژراون‌و نۆ که‌سی‌ دیکه‌ش برینداربون.

رۆژی‌ شه‌ممه‌ دادگای‌ تاوانه‌کانی‌ میسر له‌سه‌ر دۆسییه‌ی‌ روداوی‌ یاریگاکه‌ی‌ پۆرسه‌عید له‌یاری‌ نێوان هه‌ردو یانه‌ی‌ ئه‌هلی‌‌و یانه‌ی‌ میسری‌ که‌ تێیدا ٧٤ که‌س له‌ هانده‌رانی‌ یانه‌ی‌ ئه‌هلی‌ کوژران، سزای‌ له‌سێداره‌دانی‌ بۆ ٢١ که‌س ده‌رکرد‌و حوکمی‌ زیندانی‌ هه‌تا هه‌تایشی‌ بۆ پێنج که‌سی‌ دیکه‌ ده‌رکرد له‌گه‌ڵ ده‌رکردنی‌ سزای‌ زیندانی‌ جیاجیا بۆ ١٩ که‌سی‌ دیکه‌ که‌ له‌نێویاندا به‌رپرسانی‌ ئه‌منی‌ هه‌یه‌.