هیندستان: بەبەرچاوی هاوسەرەکەیەوە، چوار کەس دەستدرێژی دەکەنە سەر ژنێکی سویسری

ئەمڕۆ شەممە پۆلیسی هیندستان ئاشکرایکرد، کە چوار کەس دەستدرێژی سێکسیان کردوەتە سەر ژنە گەشتیارێکی سویسری بە بەرچاوی هاوسەرەکەیەوە.
بەپێی بەیاننامەیەکی پۆلیسی ئەو وڵاتە، روداوەکە شەوی رابردو لە ویلایەتی (مادهیا برادش) لە ناوەڕاستی هیندستان رویداوە لە کاتێکدا ئەو ژنە سویسریە و هاوسەرەکەی لە چاردگەیەکدا پشویان داوە.
ئاماژە بەوەشدراوە: لە روداوەکەدا (7) کەس هێرشیان کردوەتە سەر ئەو ژن و پیاوە و چواریان دەستدرێژی سێکسیان کردوەتە سەر ژنەکە، ئەمە جگە لەوەی سەرجەم کەلوپەلەکانیان دزیون و لەئێستاشدا ژنەکە لە نەخۆشخانەیە و هیچ کەسێکیش بەو تۆمەتە دەستگیرنەکراوە.

ئەم روداوە دوای سێ مانگ دێت لە روداوی دەستدرێژیکردنە سەر کچە خوێندکارێکی هیندی لەلایەن شەش کەسەوە و دواتر کوشتنی کە دەنگدانەوە و نارەزایەتی توندی بەدوایخۆیدا هێنا و پۆلیسی ئەو وڵاتە تاوانبارەکانیان دەستگیر کرد و لە چەند رۆزی رابردودا تاوانباری سەرەکی ئەو روداوە لە زیندان خۆی کوشت.

بەپێی ئامارەکانی ئەو وڵاتە هەمو (20) خولەکێک لە هیندستان ژنێک روبەروی دەستدرێژی سێکسی دەبێتەوە.