بە بۆنەی هاتنی ساڵی نوێی 2713ی کوردی و جەژنی نەتەوەیی نەورۆز پیرۆزبایی پێشکەش بە هەموو خەڵکی کوردستان بە گشتی و بنەماڵەی سەربەرزی شەهیدان و بنەماڵەی زیندانیانی سیاسی کوردستان بەتایبەتی دەکەین .
هیوادارین بە هاتنی سالی نوێی کوردی و جەژنی نەورۆز هیوا و ئاواتەکانی میللەتی کورد لە هەرچوار پارچەی کوردستان بێتە دی و کۆتایی بە دەسەڵاتی دیکتاتۆری رژێمی ئاخووندی بێت و نەتەوەکەمان وەک باقی نەتەوەکانیتر جەژن و شادی لە زێدی باب و باپیرانی خۆی بگێرێت.
ئێمە لەکاتێکدا پێشوازی لە سالی نوێی کوردی دەکەین کە جیهان و ئێران بەگشتی و کوردستان بەتایبەتی بە بارودۆخێکی هەستیاردا تێدەپەرێت و چاوەروان دەکرێت ئەمساڵ ساڵی قەیراناوی بێت بۆ دەسەڵاتدارانی سەرکۆتگەری رژێمی ئاخووندی ، هەروەها بەهۆیی نزیک بوونەوەی هەڵبژاردنەکانی سەرۆک کۆماری لە ئێران کێشە و ئالۆزی توند کەوتووەتە ناو باڵەکانی رژێم و هەر رۆژە قەیرانێک لە ناو ئەو دەسەڵاتەوە سەر هەڵدەدات، هەر وەک دەبینین رژێم لە کوردستان بەهەمووشێوەیەک یاد کردنەوە و بەرێوەچوونی ئاهەنگەکانی نەورۆزی قەدەغەکردووە و سزایی توندی بۆ ئەو کەسانە دانەوە کە سەرپێچی دەکەن ،ئەمەش لەکاتێکدایە کەهەڵاوسانی ئابووری و خراپی باری گوزەرانی خەلکی ئێران بە گشتی و زیادکردنی گەمارۆکان بۆسەر ئێران وای لە کاربەدەستانی رژێم کردووە لە ترسی خۆپیشاندان و نارەزایەتی لەبەرامبەریان هەموو رێوشوێنێکی ئەمنی توند بگرنەبەر.
ئێمە وەک ناوەندی لاوانی خەباتی کوردستانی ئێران دووبارە پیرۆزبایی خۆمان پێشکەش بە گەلی کورد بەگشتی دەکەین ،هیوادارین سالی نوێ سالی هاتنەدی ئامانجەکانمان بێت و یەکگرتن و یەکریزی لە ناو هێزە شۆرشگێرەکانی کوردستانی ئێران درووست بێت و ئاشتی و ئارامی باڵ بەسەر وڵاتەکەمان و ناوچەکەدا بکێشێت .
ناوەندی لاوانی خەباتی کوردستانی ئێران
دەستەیی بەرێوەبەری
30ی رەشەمەی 1391
