لەو پێوەندییەدا ئێمە رێکخراوەکانی لاوانی کوردستانی ئێران بە ئاگاداری هەموو لایەک رادەگەیەنین کە بەشداری وەها کۆنفرانسێک ناکەین و بە پێی کۆمەڵێک پێوەری جۆراوجۆر کە بوونەتە لەمپەرێک لە راستای گەشە کردنی بیری نەتەوەیی لاوانی کورد و بەتایبەت ئەو خاڵانەی خوارەوە کە واقعی ئەمڕۆی ناوچە و رۆژئاوای کوردستانە بە کەشێکی گونجاو لە پێناو بەرژەوەندی خەڵکی کوردستان و لاوانی کورد نابینین .
١- وڵاتی سووریە کە ئێستا تووشی شەڕێکی خوێناوی لە نێوان ێژیمی بەعسی سووریە و ئەنجوومەنی نیشتمانی و سوپای ئازادی ئەو وڵاتە بووەتەوە و پاش بەهاری عەرەبی رۆژانە دەیان کەس لە خەڵکی بێتاوان دەبنە قوربانی سیاسەتی دژە مرۆڤانەی بنەماڵەی ئەسەد ، ئەوەش دەرخەری ئەو راستییە کە لە ئێستادا شوێنێکی گوونجاو لە باری ئەمنییەتییەوە نییە بۆ بەرێوەچوونی وەها کۆنفرانسێک.
٢- بە پێی بڕیاری کۆنفرانسی دووهەمی لاوانی چوارپارچەی کوردستان، رێکخراوەکانی لاوانی رۆژئاوای کوردستان دەبوایە ئەو کۆنفرانسەیان بەڕێوە بردبا ! بەڵام ئێستا پارتی کرێکارانی کوردستان pkk رێڕەوی بەڕێوەچوونی کۆنفرانسەکەی بە دەستەوە گرتووە و لاوانی رۆژئاوای کوردستان هیچ ڕۆڵێکیان لە راستای بەڕێوەبردنی ئەو کۆنفرانسەدا نییە.
٣- بە پێی دوایین زانیارییەکان بەشێکی زۆری رێکخراوەکانی تایبەت بە لاوان لە هەرچوارپارچەی کوردستان بەشداری لەو کۆنفرانسەدا ناکەن ، کەواتە ناکرێت وەکوو سێهەمین کۆنفرانسی لاوانی کوردی چوارپارچەی کوردستان ناودێر بکرێت.
٤- لە کاتێکدا بە هەزاران کەس لە هاونیشتمانانی کوردی رۆژئاوای کوردستان ئاوارەی باشووری کوردستان و لە کەمپەکانی دۆمیز و ......هتد نیشتەجێن ئایا نەدەکرا ئەو کۆنفرانسە بە شێوەیەکی سەمبولیک لەو شوێنە بەرێوە بچێت ? یان ئەوەی کە پێداگری لەسەر ئەوە بکرێ کە لە ناو خۆی رۆژئاوای کوردستان بگیردرێت و دەبینین رۆژانە بەهۆی نا ئەمنییەوە رێژەیەکی بەرچاو لە خەڵکی بێ تاوانی کورد ئاوارە دەبن و دەبنە قوربانی !
لە کۆتایدا ئەوە دووپات دەکەینەوە کە وەها کۆنفرانسێک ناتوانرێ بە کۆنفرانسی لاوانی کوردی چوارپارچەی کوردستان بناسێنرێت ، بەڵکوو هەوڵێکی حیزبیانە و لە پێناو ئەهدافی حیزبیانەیە کە pkk بۆی تێدەکۆشێت .
بژی کورد بژی کوردستان
-ناوەندی لاوانی پێشڕەو
-یەکیەتیی لاوانی دێموکراتی کوردستانی ئێران
-کۆمەڵەی لاوانی رۆژهەڵات
-لاوانی یەکیەتی شۆرشگێرانی کوردستان
-ناوەندی لاوانی خەباتی کوردستانی ئێران
-لاوانی یەکیەتی دێموکراتیکی کوردستان
