هەڵبژاردنی ناو چوارچێوەی کۆماری ئیسلامی بە هەر پێوەرێکی هەڵسەنگاندن، رەنگدانەوەی خواستی خەڵک نییە و سیستەمی پرۆسەکە و سەرجەم لایەنەکانی بە کاندیدەکانەوە، هەرهەموو بە ماشێنی بیری تەسکی ئەو رژیمە بەرهەم هاتوون و لە کەس شاراوە نییە کە بە تایبەتی لە کوردستاندا گۆشەی زیندان و پای تەنافی دار و ئێعدامی کردووە بە جێگای دڵسۆزانی راستەقینەی خەڵک و جەماوەر. هەروەها ئەگەر سەرنج بدەینە هەڵس و کەوتی ئەو رژیمە لەم دەورەیەش لە شانۆی هەڵبژاردنەکانیدا، ئەوە ئاشکرا دەبێت کە مەیلی دیکتاتۆرانەی ئەو حاکمییەتە ئەوەندە زیادی کردووە کە بە نیسبەت خولەکانی پێشوتریشەوە چەند مەرتەبە زیاترە، بە جۆرێک کە کۆنە هەواڵەکانی خۆشیان جێگای متمانە نەماون بۆیان کە سەردەمێک وێڕای ئەمان و هەرلە سەرەتای کاریانە سەدان و هەزاران جینایەتیان بە هاوبەشی لە دژی خەڵکی کوردستان و ئێران خوڵقاندووە.
بۆیە ئێمە وەک فێدراسیونی رێکخراوەکانی لاوانی کوردستانی ئێران وێڕای ئەوەی کە جارێکی دیکە دیکتاتۆرییەتی کۆماری ئیسلامی و ئاکار و کردەوەکانی مەحکوم دەکەین، هەڵبژاردنەکانی خولی یازدەهەمی سەرکۆماری ئەو رژیمە بە شانۆیەکی دووپاتە و سوک و دژی بەرژەوەندییەکانی خەڵکی کوردستان بەگشتی و لاوانی کورد بەتایبەتی دەزانین و داوا لە لاوانی هوشیاری کوردیش دەکەین کە هیچکات نەکەوتنە بازنەی ئەو جۆرە نمایشانەی کۆماری ئیسلامی کە بێگوومان سووکایەتییە بە هزری سیاسی لاوان و سەرجەم مافەکانیان.
فێدراسیونی رێکخراوەکانی لاوانی کوردستانی ئێران
5/3/1392ی هەتاوی
