زیندانییه‌کی سیاسیی کورد له زیندانی میناب هه‌وڵی خۆکوژی دا
زیندانییه‌کی سیاسیی کوردی خه‌ڵکی کرماشان به‌نیشانه‌ی ناڕه‌زایه‌تی ده‌ربڕین به حوکمی دوورخرانه‌وه‌ی له زیندانی سنه‌وه بۆ زیندانی میناب له ئوستانی
هورموزگان و باردوخی ناله‌باری ئه‌و زیندانه، ده‌ستی دایه خۆکوژی. که‌مپه‌ینی نێونه‌ته‌وه‌یی مافی مرۆڤ له ئێران له زاری سه‌رچاوه‌یه‌کی ئاگاداره‌وه بڵاوی کرده‌وه، رۆژی چوارشه‌ممه رێکه‌وتی ١٢ی پووشپه‌‌ڕ "ئه‌فشین سوهراب‌زاده" زیندانیی سیاسیی کوردی خه‌ڵکی کرماشان که ماوی ساڵ و نیوێک پێش ئێستا له زیندانی ناوه‌ندیی شاری سنه‌وه بۆ زیندانی میناب دوور خرایه‌وه، به خواردنی "شووشه‌ی لامپ و بڕینی ده‌ماری ده‌ست"ی هه‌وڵی خۆکوژی دا. پاش راگواستنی ئه‌و زیندانییه بۆ بێهداریی نێو زیندان، به‌هۆی ناجێگیربوونی باری ته‌ندروستیی ناوبراو و که‌میی ئیمکانات، ره‌وانه‌ی یه‌کێک له ناوه‌نده ده‌رمانییه‌کانی شاری میناب کراوه که‌پاش شۆردنه‌وه‌ی "گه‌ده"ی ده‌ستبه‌جێ گه‌‌ڕێندرابوویه‌وه بۆ زیندان. ئه‌فشین سۆهراب زاده ته‌مه‌ن ٢٣ ساڵ و خه‌ڵکی کرماشان به تاوانی ئه‌ندامه‌تی له یه‌کێک له حیزبه کوردییه‌کانی ئۆپۆزسیۆنی حکوومه‌تی ئێران، له‌لایه‌ن دادگای ئینقلابی شاری سنه‌وه به ٢٥ ساڵ زیندانی ته‌عزیری و دوور خرانه‌وه بۆ زیندانی میناب له ئوستانی هورموزگان حوکم دراوه.
