رۆژانی ١٨ی پوشپه‌ر تا ١٠ ی گه‌لاوێژی ١٣٨٤ کۆچی خۆری قۆناغێکی زێرین بوو که ده‌سکه‌وتێکی مه‌زنی له ده‌فته‌ری مێژووی گه‌له‌که‌مان له کوردستانی ئێران تێدا تۆمار کرا. یه‌کێکه له‌و قۆناغه مێژوویانه‌ی که ده‌رخه‌ری لوتکه‌ی ووریایی و تێگه‌یشتنی سیاسی و یه‌کگوتاری و یه‌ک هه‌لوێستی میلله‌تی کورد بوو له‌کوردستانی ئێران. ١٨ پوشپه‌ر سه‌ره‌تای ئه‌و قۆناغه پڕبایه‌خه بوو که بێده‌نگی نه‌ته‌وه‌ی کوردی له‌راست سته‌م و چه‌وسانه‌وه‌ی.ده‌سه‌لات شکاند و له به‌رامبه‌رجینایه‌ته‌کانی رژێمی ئێران راپه‌رین و بێزاری جه‌ماوه‌ریی هات رێکخستن.
ئه‌م راپه‌رینه له ئه‌نجامی کوشتنی لاوێکی کورد به‌ناوی که‌ماڵی ئه‌سفرام ناسراو به شوانه ی سه‌ید قادر له‌لایه‌ن کاربه‌ده‌ستانی رژێمی ئێران له شاری مه‌هاباد هه‌لگیرسا،
ئه‌گه‌ر چی رژێمی ئێران هه‌ر له‌سه‌رتای هاتنه سه‌رکارییه‌وه به جینایه‌ت و کوشتار خۆی ناساند و ده‌ستی سوره به‌خوێنی هه‌زاران لاوی کورد، به‌لام شکه‌نجه‌دان و کوشتنی شوانه به شێوه‌یه‌کی جینایه‌تکارانه و له پاشاندا راکێشانی به‌ماشین و خولقانی دیمه‌نێکی هه‌ژێنه‌ر، بووه هۆی ناره‌زایه‌تی به‌رچاوی خه‌لکی شاری مه‌هابادو له‌و پێناوه‌شدا خه‌ڵکی بوێری شار رژانه سه‌ر شه‌قامه‌کان و به‌دروشم و راپه‌رینی ئه‌و کرده‌وه‌یان محکوم کرد. کاربه‌ده‌ستانی رژێمی ئێران هه‌ر له سه‌ره‌تاوه هه‌ولی کپ کردنه‌وه‌ی ده‌نگی ناره‌زایه‌تی خۆپیشانده‌رانیان دا به‌لام ئیراده‌ی له‌بران نه‌هاتووی جه‌ماوه‌ر شکستی به هه‌وڵه‌کانی ده‌سه‌لات هێنا و نه‌ته‌نیا نیتوانی هاواری رزگاریخوازانه‌ی خه‌ڵک له شاری مه‌هاباد دا ته‌نیا له‌چوارچێوه‌ی ئه‌و شاره قه‌تیس بهێڵێته‌وه به‌ڵکو بلێسه‌ی ئه‌م راپه‌رینه زۆربه‌ی شاره‌کانی کوردستانی گرته‌وه و هه‌ر له ماکۆوه تا ئیلام شاره‌کانی کوردستان بوونه مه‌یدانی رووبه‌رووبوونه‌وه له به‌رانبه‌ر ده‌سه‌لاتداره ملهور و سته‌مکاره‌کانی ئاخوندی. کاربه‌ده‌ستانی رژێمی ئێران چاوه‌روانی ناره‌زایه‌تی یه‌کی له‌و چه‌شنه‌یان له خه‌لکی نه‌ده‌کرد بۆیه له‌ترسی په‌ره‌سه‌ندن ئه‌و ئاگره سووتێنه‌ره دا کوێر کوێرانه که‌وتنه گیان خه‌ڵکی کوردستان و به کۆپتر و چه‌کی قورس و سووک ئاگر و ئاسنیان به‌سه‌ر جه‌ماوری خۆپیشانده‌ر دا باراند و به داخه‌وه له ئه‌نجامی ئه‌و رووبه‌روو بوونه‌وه‌یه دا به‌ده‌یان که‌سیان شه‌هید و بریندار کرد و سه‌دان که‌سیشیان ره‌وانه‌ی گرتووخانه‌کان کرد. به‌لام هه‌موو ئه‌و هه‌وڵه ترسنۆکانه‌یه‌ش نه‌بوونه ایه‌ی چاوترسێن کردنی خه‌ڵک و هه‌ر رۆژه شارێک خۆپیشاندان و ناره‌زایه‌تی تێدا به‌رێوه ده‌چوو. خۆپیشانده‌ران زیاتر سوربوون له‌سه‌ر به‌ره‌نگاربوونه‌وه‌ی ده‌سه‌لات و هه‌ربۆیه کاربه‌ده‌ستان که بۆیان ده‌رکه‌وت ناتوانن له‌رێگه‌ی فیشه‌ک و زه‌بر و زه‌نگ ناتوانن به‌رامبه‌ر خۆپیشانده‌ران بوێستنه‌وه، به به‌لێنی درۆیی و سزادانی تاوان بارانی ئه‌و جینایه‌ته، هه‌ولی کپکردنه‌وه‌ی ناره‌زایه‌تی خۆپیشانده‌رانیان دا.
راپه‌رینی هاوینی ساڵی ١٣٨٤ ئه‌زموونێکی سه‌رکه‌وتوو و نموونه‌یی بوو بۆ گه‌لی کورد و ئه‌و راستیه‌ی دووپات کرده‌ووه که هه‌رکات میلله‌ت یه‌کگرتوو و یه‌ک هه‌لوێست بێت زیاتر له سه‌رکه‌وتن نزیک ده‌بینه‌وه هه‌روه‌ها وانه‌یێکی پڕبایه‌خیش بوو بۆ رژێمی ئێران که گه‌لی کورد له‌و ده‌سه‌لاته بێزاره و له هه‌رچه‌شنه ده‌رفه‌تێک سوود وه‌رده‌گرێت بۆ رووبه‌رووبونه‌وه‌ی سته‌مکاران.
له کۆتایدا سلاو ده‌نێرم بۆ شوانه سه‌ید قادر که هۆکارێک بوو بۆ سه‌رهه‌ڵدانی ئه‌و راپه‌رینه شکۆداره و هه‌روه‌ها سلاو ده‌نێرین بۆ گیانی پاکی سه‌رجه‌م شه‌هیدانی کوردستان و هیوادرام به یه‌کگرتوویی و یه‌کریزی گه‌له‌که‌مان و حیزب و لایه‌نه سیاسیه‌کانی کوردستانی ئێران به‌رهه‌می ره‌نج و ماندووبوونی چه‌ندین ساڵه‌ی خه‌باتکاران و گه‌ل بێته دی .
