مردنی گوماناویی کچە خوێندکارێکی کورد لە زانکۆی نازلووی ورمێ
یەکێک لە کچە خوێندکارانی زانکۆی نازلووی ورمێ بە شێوەیەکی گوماناوی لە خەوتنگەی ئەو زانکۆیەدا گیانی لەدەست دا. بەپێی راپۆرتی هەواڵدەریی کوردپاØ› رۆژی شەممە رێکەوتی ١٠ ی رەشەمە، کاتژمێر ١٢ی نیوەڕۆ تەرمی کچە خوێندکارێکی کورد بەناوی"شەیدا حاتەمی نوی" و کچی عەمەر، خەڵکی گوندی "نوی"ی سەربە شاری ورمێ، لە خەوتنگەی پەیمانگەی ئەندازیاریی کشتوکاڵیی نازلووی ورمێ‌دا دۆزرایەوە.
بەرپرسی زانکۆی نازلووی ورمێ هۆکاری گیان لەدەست دانی ئەو کچە خوێندکارەی بۆ خۆکوژی گەڕاندۆتەوە، بەڵام هاوڕێکانی بە دڵنیاییەوە دەڵێن، کە شەیدا خۆی نەکوشتووە. یەکێک لە نزیکانی بنەماڵەی شەیدا حاتەمی رایانگەیاندووە سەری شەیدا شکێندراوە و دەستیشی بریندار بووە، کە ئەمە نیشانەی ئەوەیە، ویستوویەتی لە بەرامبەر بکوژەکەدا بەرگری لەخۆی بکات. سەرچاوەکە گوتیشیØ› برایەکی شەیدا پارێزەری گرتووە و لە رێگەی یاساییەوە بەدواداچوون بۆ پەروەندەی خوشکەکەی دەکات. شەیدا حاتەمەی تەمەن ٢٤ ساڵ و خوێندکاری کارناسیی باڵا، لە رشتەی "زمین شناسی"ی زانکۆی "نازلوو"ی سەربەو شارە بوو. لەلایەکی دیکەوە رۆژی رابردوو رێکەوتی ١٠ ی رەشەمە کچە خوێندکارێکی خەڵکی نۆدشە بەناوی پەروین حەقیری گیانی لەدەست داوە. هەتا کاتی بڵاوبوونەوەی ئەم هەواڵە زانیاری زیاتر لەسەر چۆنیەتی و شێوە و شوێنی گیان لەدەست دانی ئەو کچە خوێندکارە روون نەبۆتەوە.
