لاوانی خەباتکار و ئازادیخوازی کوردستان!
ئەندامان و دۆستانی ناوەندی لاوانی خەبات!
11ی بانەمەڕی 1393ی کۆچی خۆری سێ ساڵ بەسەر دامەزراندنی ناوەندی لاوانی خەباتدا تێدەپەرێت و بەم بۆنەوە پێرۆزبایی لە هەموو لاوێکی کورد و بە تایبەتی ئەندامانی دڵسۆزی ناوەندی لاوان دەکەین.
ناوەندی لاوانی خەباتی کوردستانی ئێران لە 11ی بانەمەری 1390 بە هەوڵ و تێکۆشانی کۆمەڵێکی بەرچاو لە ئەندامان و پێشمەرگەکانی سازمانی خەبات بە مەبەستی کار و تێکۆشان لە پێناو وەدیهێنانی ئامانج و ئاواتەکانی لاوانی ئازادیخوازی نەتەوەکەمان دامەزرا و لە ماوەی سێ ساڵی رابردوودا سەرەڕای کەم و کوریەکانی ،کار و تێکۆشانی خۆی بە بەرنامە و ئەکتیڤتر بەرێوە بردووە. لە سەردەمی بە جیهانیبوون و دۆنیای تەکنۆلۆژی ناساندنی کێشە نەتەوەیی و سەرجەم کێشەکانی لاوان لە کوردستان بە ئەرکی خۆی دەزانێت و لەو پێناوەدا هەنگاو هەڵدەگرێت بە خۆشییەوە دەبێت بڵێین کە لە ئێستادا لە چەندین وەڵاتی ئوروپایی کومیتەی لاوانی خەبات دامەزراوە و سەرقاڵی تێکۆشان و چالاکییە. ناوەندی لاوان لە ماوەی یەک ساڵی رابردوودا لە زۆرێک لە کۆر و کۆبوونەوەکانی تایبەت بە لاوان بەشداری چالاکانەی هەبووە و لە رێخستن و بەرێوەبەری یەکەمین کۆنفرانسی لاوانی رۆژهەڵات ،کە بۆ یەکەم جار بوو کۆنفرانسێکی لەو شێوە بە سەرکەوتووانە بەرێوە بچێت رۆڵی کارای گێڕاوەو بەشداری لە کۆبوونەوەکانی ئامادەکاری چوارەمین کۆنفرانسی نەتەوەیی لاوانی چوارپارچەی کوردستان ، کە ئەرکی بەرێوەبەرییەکەی لە ئەستۆی لاوانی رۆژهەڵاتە و دەیان کۆر و کۆبوونەوەی ناوخۆیی هەڵسوڕانی بووە.
لاوانی تێکۆشەر!
ئەمرۆکە لە ئێران بە گشتی و لە کوردستان بە تایبەتی لاوان لە بارودۆخێکی نالەباردان و زیاتر لە رابردوو لە لایەن رژێمی دیکتاتۆر و دواکەوتووی ئاخوندییەوە دەچەوسێنەوە. ئەمرۆکە زیاتر لە جاران دەسەڵاتدارانی رژێمی ئاخوندی فشاری لەسەر لاوان چڕتر کردووەتەوە و زیاتر لە رابردوو هەولی سرینەوەی لاوان دەدات کە ئەمەش نیشانەی ترسی رژێمە لە هێز و تواناکانی لاوان و دەریدەخات کە ئەو رژێمە لە هەر کاتێک زیاتر لە بەرز بوونەوەی حاستی هۆشیاری لاوان و بیرۆکەی ئازادیخوازانەیان دەترسێت. رژێمی ئاخوندی هەموو هەوڵێکی خستووەتە گەر بۆ لە ناوبردنی لاوان ، و لە هەموو بوارێکدا پێش بە بەرەو پێش چوونی لاوان و دەستراگەیشتنیان بە زانیاری و تەکنۆلۆژیای سەردەم دەگرێت و بە بەردەوامی پەرە بە سیاسەتە پاوانخوازانەکەی دەدات. رۆژ لە دوای رۆژ بڵاوکردنەوەی مادە هۆشبەرەکان لە ئێران زیاتر دەکات و هەر رۆژەو جۆرێک لەو مەوادانە لە ئێران بەرهەم دێنێت تاکوو لەو رێگاوە بەربەرەکانی لەگەڵ پێشکەوتنی لاواندا بکات. لە ئێران کێشە کۆمەڵایەتییەکانی وەک، بێکاری، ئێعتیاد، خۆکوژی، مندالانی سەرشەقام، تەلاق و ...هتد زیاتربووە ولاوانی ناچار کردووە کە وڵات بە جێبهێلن و روو لە وڵاتانیتر بکەن. بێگومان رژێمیش زیاتر لە جاران هەست بەوە دەکات کە تەمەنی لە کۆتایی نزیک بووەتەوە و لاوانی ئێمە بەو رادە لە هۆشیاری نەتەوەیی گەیشتوون کە دەزانن بە بێ رووخانی رژێمی ئاخوندی نە تەنیا لاوان بەڵکوو هیچ کام لە پێکهاتەکانی کۆمەڵگا بە مافە رەواکانی خۆیان ناگەن و تاکە رێگای گەیشتن بە ئازادی و بە دێهێنانی مافە سنفی و سیاسیەکانی خەڵکی ئێران بە گشتی و لاوانی کورد بە تایبەتی روخانی ئەو رژێمە و هاتنە ئارای حکومەتێکی دیموکراتیک و پارلەمانییە لە ئێران و شاهێدیش بۆ ئەو قسەیە تەریک کەوتنەوەی رژێمە لە ناو کۆمەڵگای جیهانی و کێشەو ململانێیە ناوخۆییەکانیەتی. بێ شک ناوەندی لاوانی خەبات لەو پێناوەدا تێدەکۆشێت و خەباتی خۆی بۆ ئەو مەبەستە درێژە پێدەدات. ناوەندی لاوان کارو تێکۆشانی لاوانی چاونەترسی نەتەوەکەمان لە ناوخۆی وڵات بە هەنگاوێکی کاریگەر دژ بەو رژێمە دەزانیت و باوەری وایە کە دەبێت لاوانی ناوخۆ کوردستان لێبراوانەتر لە رابردوو خۆیان ماندوو بکەن و پێش بە سیاسەتە دواکەوتووانەکەی ئەو رژێمە بگرن و بۆ بەرەو سەر بردنی حاستی هۆشیاری کۆمەڵایەتی خەڵکی کورد تێبکۆشن و وەک رابردوو یار و خومخۆری لاوانی شۆرشگیر بن و لە یارمەتییە مەعنەوییەکانی خۆیان بێ بەشمان نەکەن. ناوەندی لاوانی خەبات باوەری بە کار و تێکۆشانی هاوبەش هەیە لەگەڵ باقی رێکخراوەکانیتری لاوان و پێی وایە بە نزیک بوونەوە و تێکۆشانی هاوبەش رێگای گەیشتنی لاوان بە ئامانجەکانیان ئاسانتر دەبیت و لەو پێناوەشدا کارمان کردووە و هەنگاومان هەڵگرتووە و هەر لێرەشەوە دەستی هاوکاری و تەبایی خۆمان بۆ هەموو رێکخراوەکانی لاوان لە چوارپارچەی کوردستان و بە تایبەتی رێکخراوەکانی لاوان لە کوردستانی ئێران درێژ دەکەین و ئامادەی هەر چەشنە هاوکاریێکین. باوەرمان وایە کە دەبێت لەم قۆناغە لە جوڵانەوەی رزگاریخوازانەی نەتەوەی کورد کچان و ژنانی تێکۆشەری کوردستان شان بە شانی پیاوان لە هەموو بوارەکانی خەبات چ سیاسی و چ کۆمەڵایەتی دەور و نەقشیان هەبێت و بە دامەزراوە کردنی خەبات و تێکۆشانی لاوان زیاتر لە رابردوو هەستی پێ دەکرێت و ئەوەش راستیێکی حاشا هەڵنەگرە کە لاوان بازووی بە هێزی کۆمەڵگان و بە چالاکی و تێکۆشانی خۆیان دەتوانن گۆران لە هەموو بوارەکانی کۆمەڵگادا بکەن. کۆمەڵگا و بە تایبەتی ئەحزابی شۆرشگێر لەم قۆناغەی ئێستادا دەبێت زیاتر لە رابردوو مەیدان بۆ خۆ دەرخستنی لاوان و مەجال بۆ نیشاندانی هێز و تواناکانیان لە بار بکەن و لە هەموو جۆمگەکانی بەرێوەبەریدا کەڵکیان لێ وەر بگرن. بە بێ شک بە ئاوردانەوەێک لە مێژوو ئەوەمان بۆ دەردەکەوێت کە کۆمەڵگاێک پێشکەوتوو و سەرکەوتوو بووە کە لە بیرو هێزی لاوان بە شێوەی شیاو کەڵکی وەر گرتووە.
جارێکیتر سیهەمین ساڵرۆژی دامەزراندنی ناوەندی لاوانی خەبات لە هەموو لاوێکی خوێنگەرم و تێکۆشەرپیرۆزبێت هەروەها لەم رۆژەدا پەیمان لەگەڵ مامۆستای نەمر و رێبەری نەتەوەکەمان مامۆستا سید جەلال حوسێنی نوێ دەکەینەوە کە تاکوو گەیشتن بە ئامانج و ئاواتەکانی درێژەدەری رێگای پڕ لە شانازی بین و هەوڵەکانمان بۆ گەیشتن بە ئازادی و دابین کردنی کۆمەڵگاێکی دیموکراتیک چڕتر بکەینەوە.
سەرکەوێت شۆرشی رزگاریخوازانەی نەتەوەی کورد!
مەرگ و نەمان بۆ رژێمی داگیرکەری ئاخوندی !
11ی بانەمەڕی 1393ی کۆچی خۆری
ناوەندی لاوانی خەبات دەستەی بەرێوەبەری!
