59 سال لەمەوبەر لە رۆژی 16ی سەرماوەزی 1332 خوێندکارانی زانکۆکانی تاران بە دژی هاتنی نیکسۆن جێگری ئایزنهاور سەرۆک کۆماری ئەو کاتی ئەمریکا بۆ ئێران، رژانە سەر شەقامەکان و دەنگی نارەزایەتی خۆیان لەدژی رژێمی پاشایەتی و هەروەها هاتنی نیکسۆن و کودەتا چیەکان بەرزکردەوە ، هێزە ئەمنیەتی و سەرکوتکەرەکانی رژێمی پاشایەتی بە شێوەیەکی درندانە کەوتنە تەقەکردن لە خۆپیشاندەران و لە ئەنجامی ئەوەشدا سێ خوێندکار کوژران و 27 کەسیتریش برینداربوون. و لە دوای ئەو رووداوە خوێنینە رۆژی 16ی سەرماوەرز وەک رۆژی خوێندکاران لە ئێران دیاری کراو هەموو سالێکیش سەرەرای بوونی کەش و هەوایەکی ئەمنیەتی توند بەسەر زانکۆکاندا، بەلام خوێندکارانی نیشتمان پەروەر بە گروتینێکی زۆرەوە یادی ئەو رۆژەدەکەنەوە و وەک هێمایەک بۆ دژایەتی کردنی ستەم و زۆرداری دەسەلاتداران سەیردەکەن .
دیارە بە هاتنی رژێمی ئاخوندیش نەک هەر فشارەکان بۆ سەر خەڵکی ئازادیخواز و بە تایبەت خوێندکاران کەم نەبووەتەوە بگرە چەند ئەوەندە زیادی کردووە و کاربەدەستانی رژێمی ئاخوندی بە زانینی ئەو راستیە کە زانکۆکان لانکەی شۆرش و بەرخۆدانن و چینی ئاگا و وشیاری خوێندکاری لە ستەم و ناعەداڵەتیەکان سڵ ناکەنەوە و دەنگی نارەزایەتی خۆیان دەردەبرن هەر لە سەرەتاوە زانکۆکانیان میلیتاریزە کردووە و تاکوو ئەمرۆ دەیان جینایەتیان لە زانکۆکان خۆڵقاندووە و بە سەدان بەربەستیان لە پێش خوێندکاران و ئەو چینە وشیارەی کۆمەڵگا درووست کردووە بەڵام هەنووکەش دەبینین کە خوێندکارانی ئێران بە گشتی و خوێندکارانی کورد بە تایبەتی لە هەر بۆنە و مەراسمێکی نەتەوەییدا دەور و نەقشی خۆیان دەگێرن و سەرای دەستبەسەر کردن و هەرەشەکردن لێیان قەد سەریان لە ئاست سیاسەتەکانی ئەو رژێمە تۆتالیترە دانەنەواندووە و بە حەق دەبێت بڵێین پێشرەوی کۆمەڵگا دەکەن بە مەبەستی وشیارکردنەوە و بەدەست هێنانی مافە نەتەوایەتیەکانیان.
خوێندکارانی خۆشەویست !
ئێمە لە کاتێکدا ئەم یادەدەکەینەوە کە رژێمی ئاخوندی بە هۆی فشاری گەمارۆ نێونەتەوەییەکان و تەریک کەوتنەوەی لە نێو کۆمەڵگای جیهانی و پەرەسەندنی ناکۆکی نێوان باڵەکانی رژێم رۆژ بە رۆژ لە شکست و لە ناووچوون نزیک دەبێتەوە. هەر بۆیە دەستی داوەتە پەلەقاژێ و بە نانەوەی ئاژاوە لە وڵاتانی دەرەکی و پاڵپشتی لە تیرۆریسم و هەروەها وەرێخستنی شەپۆلی ئیعدامەکان و گرتن و بێ سەروشوێنکردنی گیراوان و شکەنجەدانی زیندانیانی سیاسی و بێرێزی کردن بە کەمایەتیە نەتەوەیەکان دەیەوێت لە ژێر باری ئەو هەموو فشارانە خۆی رزگار بکات. بێگومان رژێمی ئاخوندی بەردەوام دەبێت لە فشارەکانی بۆ سەر خوێندکاران و لەو پێناوەشدا رێوشێنی توندی ئەمنیەتی لە زانکۆ و زانستگاکانی ئێران بە گشتی و کوردستان بە تایبەتی پەیرەو دەکات و بانگهێشت کردن و گرتنی بەردەوامی چالاکانی خوێندکاری لەلایەن ئیتلاعاتەوە سەلمێنەری ئەو راستیانەن.
ئێمە وەک ناوەندی لاوانی خەباتی کوردستانی ئێران وێرای پیرۆزبایی بە سەرجەم خوێندکارانی نیشتیمان پەروەر و ئازادیخواز بۆ بۆنەی 16ی سەرماوەز ، پشتیوانی تەواوی خۆمان بۆ خوێندکارانی نەتەوەکەمان و داوا و مافە رەواکانیان دەر دەبڕین و هیوادارین کە ئەم یادە ببێتە هۆیی زیاتر یەکریزی و تەبایی نەتەوەکەمان هەر بەم بۆنەیەشەوە سڵاو دەنێرین بۆ سەرجەم ئەو خوێندکارانەی کە گیانی خۆیان پێشکەش بە ئازادی خاک و نیشتیمانیان کردووە .
ناوەندی لاوانی خەباتی کوردستانی ئێران
دەستەیی بەرێوەبەری
15ی سەرماوەزی 1393
