lawan


ڕێکخراوی لاوانی خه‌باتی کوردستانی ئێران
Iranian Kurdistan Khabat Youth Organization
         
به‌شداری رێکخراوی لاوانی خه‌بات و رێکخراوی ئافره‌تانی خه‌باتی کوردستانی ئێران له‌ خۆپیشاندانی پشتگیری کردن له‌ کوردستانی ئێران
ئه‌مرۆ یه‌ک شه‌مه‌ 20ی بانه‌مه‌ری 1394 له‌ به‌رده‌م په‌رله‌مانی کوردستان له‌ شاری هه‌ولێر به‌به‌شداری ئه‌ندامان و لایه‌نگرانی حیزب و رێکخراوه‌ مه‌ده‌نیه‌کانی کوردستانی ئێران خۆپیشاندانێکی فراوان به‌مه‌به‌ستی ناره‌زایه‌تی ده‌ربرین له‌ مه‌رگی فه‌ریناز خوسره‌وانی و پشتکیری کردنی خۆپیشاندانه‌کانی کوردستانی ئێران هه‌روه‌ها ئیدانه‌کردنی سیاسه‌تی زه‌بر و زه‌نگی رژێمی ئاخوندیی ده‌رحه‌ق به‌ کوردستانی ئێران به‌رێوه‌چوو.
له‌و خۆپیشاندانه‌د په‌یامی رێکخراوه‌کانی ئافره‌تان له‌لایه‌ن خاتوو فاتیمه‌ عوسمانی خوێندرایه‌وه‌ که‌ وێرایی مه‌حکوم کردنی گیان له‌ده‌ستدانی فه‌ریناز خوسره‌وانی ، داوای به‌سزادانی ئه‌نجام ده‌رانی ئه‌و تاوانه‌ کرا و هه‌روه‌ها پشتگیری و پشتیوانی خۆشیان بۆ خه‌لکی کوردستانی ئێران ده‌ربری و داوایان ئه‌وه‌بوو که‌ فریوی سیاسه‌ته‌کانی رژێمی ئاخوندی نه‌خۆن. هه‌ر له‌و خۆپیشاندانه‌دا سۆران عومه‌ر سه‌رۆکی لێژنه‌ی مافی مرۆڤی کوردستان و چه‌ند په‌رله‌مانتارێکی دیکه‌ی کوردستان پشتیوانی خۆیان بۆ خۆپیشانده‌ران ده‌ربری و هه‌روه‌ها رایگه‌یاند که‌ داواکاری خۆپیشانده‌ران ده‌گه‌یه‌ننه‌ له‌لایه‌نه‌ په‌یوه‌ندیداره‌کان. له‌ به‌شێکی دیکه‌ی ئه‌و خۆپیشاندانه‌ چه‌ندین دروشم له‌له‌لایه‌ن ئاماده‌بوانه‌وه‌ وترانه‌وه‌ وه‌ک (مهاباد ته‌نیا نیه‌) و ( بژی رۆژهه‌لآت )(رۆژهه‌لآت وشیاره‌ له‌ داگیرکه‌ر بێزاره‌ ) وه‌ به‌ چه‌ندین دروشمی دیکه‌ کۆتایی به‌و خۆپیشاندانه‌ هات.
شه‌یانی باسه‌ ژماره‌یه‌کی به‌رچاو له‌ ئه‌ندامانی رێکخراوی لاوانی خه‌بات به‌سه‌رپه‌رشتی به‌رێز ئارام سلێمانی به‌رپرسی رێکخراو و هه‌روه‌ها رێکخراوی ئافره‌تانی خه‌بات به‌سه‌رپه‌رشتی به‌رێز خاتوو زێنه‌ب حوسێنی به‌رپرسی رێکخراوی ئافره‌تان له‌و خۆپیشاندانه‌دا به‌شداربوون.
11 ی بانەمەر چوارەمین سالرۆژی دامەزراندنی رێکخراوی لاوانی خەباتی کوردستانی ئێران پیرۆزبێت
لاوانی تێکۆشەری کوردستان
بنەماڵەی سەربەرزی شەهیدان
ئەندام و دۆستانی رێکخراوی لاوانی خەبات
بەبۆنەی چوارەمین سالرۆژی دامەزراندنی رێکخراوی لاوانی خەباتی کوردستانی ئێران لەلایەن دەستەی بەرێوەبەری رێکخراوەکەمان گەرمترین پیرۆزبایی پێشکەش بە سەرجەم لاوانی کوردستان ی ئێران و ئەندامانی رێکخراوەکەمان دەکەین و هیوادارین ئەم یادە لەداهاتوویێکی نزیک لە کوردستانی ئازادکراو دا بکەینەوە.
11ی بانەمەری 1390 ئەو رۆژەیە کە بەهەوڵ و ماندووبوونی بەشێکی بەرچاو لە لاوانی تێکۆشەری ریزەکانی سازمانی خەبات و بە هاوکاری و پاڵپشتی رێبەرایەتی سازمان و بەهەستکردن بە گرینگی و رۆڵی لاوان لە کوردستاندا و کۆکردنەوەی وزە و توانای لاوانی ریزەکانی سازمان بریاردرا کە رێکخراوێکی تایبەت بە لاوان بە ناوی رێکخراوی لاوانی خەباتی کوردستانی ئێران دابمەزرێ . لەگەڵ ئەوەی کەگومانی تێدا نییە دامەزراندنی رێکخراوێکی لەم چەشنە زەروور بوو، بەڵام بەردەوامی و چۆنیەتی تێکۆشان و دەور و پێگەی رێکخراوەکەش بەهەمان رێژە و زیاتریش بایەخ و گرینگی خۆی هەیە. جێگەی دڵخۆشیە کە لە سەرەتای دامەزراندنیەوە تا ئێستا توانراوە سەرەڕای کەم و کورییەکان زۆرکار و چالاکی تایبەت بەو توێژەی کۆمەڵگاکەمان بەرێوە ببەین و لە رێگاری جۆراوجۆر ئامانج و کارو چالاکیەکانی رێکخراوەکەمان بە لاوانی کوردستانی ئێران بگەێنین و رێکخراوی لاوانی خەبات ببێتە مەکۆیێک بۆ پێگەیاندن و پێگەیشتنی لاوانی خەباتکار و لە پێناو بەرەوپێش بردنی ئامانجەکانی لاوان و هەروەها بزووتنەوەی رزگاریخوازانەی نەتەوەیی هەنگاوی شیاو هەڵگرین.
هاونیشتیمانیانی خۆراگر!
ئێمە لە کاتێکدا ئەم یادە دەکەینەوە لە ئێران بە گشتی و لە کوردستان بە تایبەتی لاوان لە بارودۆخێکی نالەباردان و زیاتر لە رابردوو لە لایەن رژێمی دیکتاتۆر و دواکەوتووی ئاخوندییەوە دەچەوسێنەوە و لە لایێکی دیکەشەوە بەردەوام و لەرێگەی جۆراوجۆر وهاوتەریبی هەوڵە پاکەکان لە هەوڵدایە کە هێز و بیر و توانایی لاوان بەلای خۆیدا راکێشێت و توانا و پوتانسیلی لاو پووچەڵ بکاتەوە. لاوان لە هەموو رەهەندەکانی سیاسی و ئابووری و کلتووری و کۆمەلایەتی زۆرترین رێژەی ستەمی دەسەڵاتدارانی ئاخوندیان بەرکەوتووە و بچووکترین جم و جولیان توندترین سزا و زیندان و شکەنجە و ئیعدامی بە دوا دا دێ‌ . دیاردە و خەسارەتە کۆمەلایەتیەکان رۆژ لە دوای رۆژ پەرەدەستێنێ‌ و مادە هۆشبەرەکان بیکاری وەک هۆکاری سەرەکی هەموو بشێوییەکان لە لایەن سیستەمی ئاخوندییەوە پەرەی پێ دەدرێ‌ و لاوان گیرۆدە دەکات. لەگەڵ هەموو ئەو راستیانەش مایەی خۆشحاڵیە کە چینی لاو ئاستی ووشیاری نەتەوەیی و سیاسی و لە هەموو پانتاییەکانی دیکەش لە هەڵکشانی زیاتر دایە و شەرێکی قورس لە لایەن لاوانی پێشرەو و وریا لەگەڵ دەسەڵاتدارانی ئاخوندیی لە ئارادایە.
دەسەڵاتدارانی ئاخوندی وەڵاتی ئێرانیان بە هۆی سیاسەتە ناعەقلانیەکانی خۆیان بەرەو دارمان بردووە و بۆ کۆنترۆڵی خرۆشانی جەماوەریی ئاستی ستەم و چەوسانەوەیان زیاتر لە رابردوو بەرەوسەر بردووە و ئەو دۆخە هەموو چین و توێژێکی کۆمەڵگا و بەتایبەتی لاوانی ئازادیخواز لە پێ,ەند بە بەرەوسەر بردنی هەوڵ و تێکۆشان و یەکانگریی هێز و تواناکان وەئاگا دێنیتەوە و هەر بۆیە زەورە هەموو رێکخراو و دامەزراوە و تاکەکانی سەر بە کۆمەڵگای لاو لە کوردستانی ئێران لە پێناو ئامانجە بەرزەکنانمان زیاتر لە رابردوو هەست بە بەرپرسیارەتی بکەین و ریزەکانمان پتەوتر بکەین و ئاگری خەباتمان دژی دیکتاتۆری ئاخوندی و پێشیلکردنی مافەکانمان بە گڕ تر بکەین.
رێکخراوی لاوانی خەباتی کوردستانی ئێران لەسەر ئەو راستیە پێداگری دەکاتەوە کە بە بێ رووخانی رژێمی ئاخوندی ئاستەمە بتوانرێت ژیان و گوزەرانی خەڵکی ئێران بەگشتی و کوردستان بەتایبەتی باشتر بێت، بۆیە لە پێناو بە ئامانجگەیاندنی خەباتی رەوای گەلەکەمان و رزگاری یەکجارەکی لەدەست رژێمی ئاخوندی لە خەبات و تێکۆشان بە پشتیوانی هێزی لەبن نەهاتووی نەتەوەکەمان بەردەوام دەبین ، وە باوەرمان وایە کە بەبێ هاوکاری و لێکنزیکبوونەوەی لایەنە سیاسیەکانی کوردستانی ئێران ناتوانین بە ئامانجە نەتەوەییەکانمان بگەین بۆیە بە پێویستی دەزانین کە داوا لە سەرجەم لایەنەکانی رۆژهەلات بکەین کە لەو پێناوەدا زیاتر هەوڵبدەن چونکە دووبەرەکی و ناکۆکی بۆتە هۆی ئەوەی کە شۆرشی نەتەوەکەمان لە کوردستانی ئێران کەم رەنگتر بێتەوە .
دووبارە لەسالیادی دامەزراندنی رێکخراوی لاوانی خەباتی کوردستانی ئێران پیرۆزبایی خۆمان پێشکەش بە سەرجەم لاوانی نیشتیمانپەروەری کوردستان دەکەین و هیوامان وایە کە لە سالی داهاتوودا ئەمیادە پیرۆزە لە کوردستانی ئازادکراوی خۆماندا ئەنجام بدەین
رێکخراوی لاوانی خەباتی کوردستانی ئێران
دەستەیی بەرێوەبەری
11 ی بانەمەری 1394
کۆبوونەوەی بەرێز کاک بابەشێخ حوسێنی لەگەڵ رێکخراوی لاوانی خەباتی کوردستانی ئێران
سەرلەبەیانی رۆژی هەینی کاتژمێر 10 لە بارەگای ناوەندی سازمانی خەبات لە ناحیەی رزگاری بەرێز کاک بابەشێخ حوسێنی بەرێوبەری گشتی سازمانی خەباتی کوردستانی ئێران بەمەبەستی پیرۆزبایی کردن بەبۆنەی 11ی بانەمەر چوارەمین سالرۆژی دامەزراندنی رێکخراوی لاوانی خەبات لەگەڵ بەرپرس و بەرێوەبەران و بەشێک لە ئەندامانی رێکخراوی لاوان کۆبوویەوە.
لە سەرەتای کۆبوونەوەکەدا بەرێز کاک بابەشێخ بەبۆنەی 11ی بانەمەر چوارەمین سالرۆژی دامەزراندنی رێکخراوی لاوانی خەبات پیرۆزبایی لە ئەندامان و دۆستانی لاوانی خەباتی کرد و هیوای سەرکەوتنی زیاتری بۆ خواستن وکاروچالاکیەکانی رێکخراوی لاوانی لەماوەی ساڵانی رابردوو بەرز نرخاند و ووتی ، پێویستە زیاتر لە جاران کاروچالاکی بکەن بۆ خزمەتکردنی لاوانی کوردستان هەر لەو پەیوەندیەشدا چەندین پێشنیاری جێگەی بایەخی خستە روو. هەر لەو کۆبوونەوەیەدا بەرێز کاک بابەشێخ دەورونەخشی لاوانی لە بەرەوپێشبردنی کۆمەلگا و شۆرش و بەرگریکردن لە مافەرواکانی نەتەوەکەمان بە جێی شانازی وەسف کرد و هیوای خواست لاوان لەپاڵ ئەرکە شۆرشگێرییەکەیان ،خۆیان لە زانست و خوێندن بێبەش نەکەن و گرینگی زیاتر بدەن بەو بوارە.
لە پاشاندا بەرێز کاک ئارام سلێمانی بەرپرسی رێکخراوی لاوانی خەباتی کوردستانی ئێران خۆشحال خۆیی بەو سەردانەی بەرێزیان دەربڕی و وێرای باسێک سەبارەت بە بارودۆخی لاوان لە ئێران بەگشتی و کوردستان بەتایبەتی لە پێوەند بە کاروچالاکیەکانی رابردوو و داهاتووی رێکخراوی لاوان قسەی کرد و هیوای خواست کە سازمانی خەبات زیاتر لە رابردوو پالپشت و هاوکاریی بەرنامە و پرۆژەکانی رێکخرای لاوانی خەبات بێ.
لە کۆتایی کۆبوونەوەکە بەرێز کاک بابەشێخ دووبارە پیرۆزبایی خۆی بەبۆنەی11 ی بانەمەر ساڵرۆژی دامەزراندنی رێکخراوی لاوان پێش کەش کرد و پێشتیوانی خۆشی بۆ رێکخراوی لاوانی خەبات دووپات کردەوە.
خوێندکارێک و دوو هاووڵاتیی کورد، حوکمی سێدارەیان بۆ بڕایەوە
دەزگای قەزایی رژێمی ئاخوندی ئێران، سێ هاووڵاتیی کوردی خەڵکی شاری مەهاباد کە لە زیندانی ناوەندیی ورمێ لە دەستبەسەریدان، بە سێدارە مەحکووم کرد. بەپێی راپۆرتی هەواڵدەرییەکان، سابیر شێخ عەبدوڵڵا، چالاکی خوێندکاریی کوردی زانکۆی عەلامە تەباتەبایی تاران و دوو زیندانیی سیاسیی دیکەی کورد بەناوەکانی دیاکۆ رەسووڵزادە و حوسێن عوسمانی لەلایەن دەزگای قەزاییرژێمی ئاخوندی ئێرانەوە، حوکمی لەسێدارە درانیان بۆ بڕایەوە. ئەو سێ هاووڵاتییە کوردەی خەڵکی مەهاباد، بە تۆمەتی "ئەنجامدانی تەقینەوە" و "ئەندامەتی لە حیزبێکی کوردیدا"، حوکمی لەسێدارە درانیان بۆ بڕاوەتەوە. سابیر شێخ عەبدوڵڵا، تەمەن ٢٨ ساڵ، کوڕی مستەفا، حوسێن عوسمانی تەمەن ٥٠  ساڵ و دیاکۆ رەسووڵزادە تەمەن ٢٣ ساڵ، مانگی رەشەمەی ساڵی ١٣٩٢ی هەتاوی لەلایەن هێـزە لیباس شەخسییەکانەوە لە شاری مەهاباد دەستبەسەر کران. جێگەی باسە کە، دەزگای ئیتلاعاتی رژێمی ئاخوندی ئێران مانگی بانەمەڕی ساڵی ٩٣، ئەو سێ هاووڵاتییە کوردەی بە ئەنجامدانی تەقینەوەی کۆتایی مانگی خەرمانانی ساڵی ٨٩ی شاری مەهاباد و ئەندامەتی لە "کۆمەڵە"دا، تۆمەتبار کرد.
لەمزگەوتێکدا لە سەقز، نزیک بە ٣٠ ٠  کەس لەلایەن ئیتلاعاتەوە دەستبەسەر کران
هێزە ئیتلاعاتییەکانی شاری سەقز، لە رۆژانی پێنج‌شەممە و هەینیی حەفتەی رابردوودا دەیان هاووڵاتییان لە مزگەوت و ماڵەکانی گەرەکی حاجیاوای ئەو شارەدا دەستبەسەر کرد. بەپێی راپۆرتی هەواڵنێری کوردپا، دوابەدوای تەواوبوونی نوێژی ئێوارەی رۆژی پێنج‌شەممە رێکەوتی ٢٠ ی خاکەلێوە، هێزەکانی سەربە ئیتلاعاتی سوپای پاسداران لە شاری سەقز، ٢٦٧ کەسیان لە مزگەوتی حاجیاوای ئەو شارەدا دەستبەسەر کرد.ەروەها رۆژی هەینیش ١٢ کەسی دیکەیان لە گەرەکی حاجیاوادا دەستبەسەر کردووەو دەیان کەسی دیکەش لە ترسی دەستبەسەر کران، نێوشاریان بەجێهێشتووە. بە گوتەی هاووڵاتییانی شارەکە، ‌هێزە ئیتلاعاتییەکان لە ژێر ناوی "دەستبەسەرکردنی سەلەفییەکان"دا هێرشیان کردۆتەوە سەر ئەو مزگەوتە، ئەوەش لە کاتێکدایە کە ژمارەیەکی بەرچاو لە دەستبەسەرکراوان پەیوەندییان بە رەوتە سەلەفییەکانەوە نەبووە. سەرچاوەیەکی ئاگادار راگەیاند: بڕیاری دەستبەسەرکردنی سەلەفییەکان لە شاری سنەوە دەرچووەو هەنووکە هەر چەشنە کۆبوونەوەیەکی چەند کەسی لە نیو شار و بەتایبەت گەڕەکی حاجیاوای شاری سەقز، لەلایەن ‌هێزە ئەمنییەکانەوە بڵاوەی پێدەکرێ.
کرانه‌وه‌ی به‌شی زمان و وێژه‌ی کوردی له‌ زانکۆی کوردستان
سه‌رۆکی زانکۆی کوردستان وتی: به‌شی زمان و وێژه‌ی کوردی له‌ زانکۆی کوردستان ده‌کرێته‌وه‌ و مانگی ڕه‌زبه‌ری ئه‌مساڵ خوێندکار وه‌رده‌گرێت. به‌پێی راپۆرتی هەوتاڵدەرییەکان، دوکتۆر فه‌ردین ئه‌خلاقیان ڕایگه‌یاند: به‌ ڕاگه‌یاندنی چارتی نوێی زانکۆی کوردستان له‌ ڕۆژه‌کانی کۆتایی ساڵی ڕابردوو، تێده‌کۆشین به‌پێی ئه‌م چارته‌ که‌موکوڕییه‌کانی زانکۆ له‌ بواری هێزی مرۆڤی و کارناس و لێژنه‌ی زانستی قه‌ره‌بوو بکرێته‌وه‌. ناوبراو له‌ کرانه‌وه‌ی به‌شی زمان و وێژه‌ی کوردی له‌ مانگی ڕه‌زبه‌ری ئه‌مساڵ هه‌واڵی دا و زیادیشی کرد: به‌ سه‌رنجدان به‌ ده‌وڵه‌مه‌ندی زمان و وێژه‌ی کوردی و پێشوازی خه‌ڵک و لاوان و فه‌رهه‌نگ دۆستان له‌م کاره‌ و جه‌ختکردنه‌وه‌ی له‌سه‌ر زمانی کوردی وه‌کوو سه‌رمایه‌یه‌کی نه‌ته‌وه‌یی، دانانی به‌شی زمان و وێژه‌ی کوردی له‌ ڕیزی کار و به‌رنامه‌کانی زانکۆی کوردستان دایه‌.
مادەی سڕکەر گیانی دوو هاووڵاتیی کوردی ستاند
لەشارەکانی روانسەر و ورمێ دوو گەنجی کوردی تووشبوو بە مادەسڕکەرەکان، گیانیان لەدەست دا. بەپێی راپۆرتی هەواڵدەریی کوردپا، رێکەوتی ١٩ی خاکەلێوە لاوێکی خەڵکی شاری روانسەر بە ناوی وەفا گوڵمحەمەدی تەمەن 18 ساڵ بە هۆی بەکارهێنانی مادەی سەنعەتیی سڕکەر لەیەکێک لەشاخەکانی دەورووبەری ئەو شارە کۆتایی بەژیانی هاتووە. بەپێی ئامارە فەرمییەکانی ناوەندی بەرەنگاربوونەوەی مادەسڕکەرەکان زیاتر لە یەک ملیۆن و ٤٠ ٠  هەزار موعتاد لە ئێراندا بوونی هەیە و ئەمە لەحاڵێکدایە کە ئامارە نافەرمییەکان باس لەبوونی چوار ملیۆن تووشبوو بە مادەسڕکەرەکان لەئێران دەکەن. هەر لەو پێوەندییەدا هاووڵاتییەکی دیکەی کوردی خەڵکی ناوچەی تەرگەوەر کە لەبەکارهێنەرانی مادە سڕکەرەکان بووە گیانی لەدەست داوە.نوورەدین حوسێن‌پوور خەڵکی ئاوایی "مەوانا"ی ورمێ بە مەبەستی وازهێنان لە بەکارهێنانی تریاک بردراوەتە کەمپەکانی تەرک و دەوترێت بەهۆی راوەستانی دڵییەوە گیانی لەدەست داوە.
پەیامی هاوبەشی رێکخراوی ئافرەتانی خەباتی کوردستانی ئێران و رێکخراوی لاوانی خەباتی کوردستانی ئێران بەبۆنەی جێژنی نەتەوەیی نەورۆز و ساڵی نوێی کوردی
هاونیشتیمانیانی خۆراگر!
کچان و کوڕانی تێکۆشەر !
بەبۆنەی جێژنی نەتەوەیی نەورۆز و نوێبوونەوەی ساڵی تازەی کوردی گەرمترین پیرۆزبایی خۆمان پێشکەش بە نەتەوەی کورد بەگشتی دەکەین، هیواخوازین کە سالی نوێی 2715 سالی پێشکەوتن و بەدیهاتنی مافە رەواکانی نەتەوەکەمان بێت لە هەرچوارپارچەی کوردستان .
بەرێزان !
ئێمە لە کاتێکدا پێشوازی لە نەورۆز و نوێبوونەوەی ساڵی کوردی دەکەین کە نەتەوەکەمان لە باشوور و رۆژئاوای کوردستان لە رووبەرووبونەوەیەکی سەختدایە لەگەل رێکخراوی تیرۆریستی داعش کە بەخۆشیەوە توانراوە خۆراگرییەکی کەم وێنە پیشان بدرێ‌ و پاشەکشە بەم گروپە ترۆریستیە لە خاکی کوردستان بکرێت. بێگومان ئەم سەرکەوتنانەی هێزەکانی پێشمەرگەش بێ‌ قوربانیدان نەبووە و رۆلە بە ئەمەکەکانی نەتەوەکەمان بە گیان و رۆح خۆیان فیدای خاکەکەیان کردووە و پارێزگاری لێدەکەن ، کە ئەمەش بۆتە جێی سەرنجی زۆربەی وڵاتانی جیهان و بە چاوێکی رێزەوە لە پێشمەرگە دەڕوانن ، لە سایەی خوێنی شەهیدانەوە دۆزی رەوای نەتەوەکەمان زیاتر بۆ جیهان روونبۆتەوە و رۆژبەرۆژیش پێشتیوانی و هاوکاری بۆ نەتەوەکەمان زیاتر دەبێت.
بە چاوخشاندنێک بەسەر مێژووی نەتەوەکەمان دا بۆمان روون دەبێتەوە کە ئاگری نەورۆز لە سەختترین رۆژگارەکانی نەتەوەکەمان بە شکۆ و رێزەوە بەرێوەچووە، چونکە نەورۆز بۆ کورد هێمای یەکبوون و ئازادی و رزگاریی لە ستەم و چەوسانەوە بووە، هەربۆیە لەم رۆژەدا لاوان و کچانی ئازادی خواز بە کردنەوەی ئاگری نەورۆز بەلێن دووپات دەکەنەوە کە تا ئازادی و رزگاری یەکجارەکی لەدەست داگیرکەران خەباتی رەوای نەتەوەکەمان درێژە پێدەدەن و بە بەردەوامی بلێسەی ئەو ئاگرە بە گەشاوەیەی دەهێڵننەوە.
رژێمی ئاخوندی لەماوەی ساڵانی حکوومەتداری بیزاری و دژایەتی خۆی لەگەڵ نەورۆز نەشاردۆتەوە بە بەردەوامی هەوڵیانداوە بە رێگای جۆراوجۆر وەک گرتن و بانگێشتکردنی چالاکان و هەروەها هەڕەشە و ترس وتۆقاندن خەڵکی لە بەرێوەبردنی رێورەسمی نەورۆز رابگرێت. بەڵام سەرەڕای ئەو بارودۆخەش ساڵ بە دوای ساڵ ئەم یادە لەلایەن خەلکی تێکۆشەری نەتەوەکەمان بە شێوەیەکی بەرفراوانتر بەرێوەدەبن و بە کردنەوەی ئاگر ئەوە دووپات دەکەنەوە کە هەرچەند بارودۆخ نالەباتر و ستەم و نادادپەروەرییەکان زیاتر بێت ئاگری نەورۆزی نەتەوەکەمان بە تین تر دەبێت .
ئێمە وەک رێکخراوی لاوانی خەباتی کوردستانی ئێران و رێکخراوی ئافرەتانی خەباتی کوردستانی ئێران لەم بۆنەیەدا سلاو دەنێرین بۆ رۆحی سەرجەم شەهیدانی سورخەڵاتی کوردستان بەگشتی و شەهیدە سەربەرزەکانی سازمانی خەبات بە تایبەتی و هەوەرها درود دەنێرین بۆ کەس وکاری سەربەرزی شەهیدان و زیندانیە خۆراگر و ئازاکانی نەتەوەکەمان کە لە چاڵەرەشەکانی رژێمی ئاخوندیدا لە ژێر زەبر و شکەنجەی جەستەیی و دەرونیدان بەڵام چۆکیاندانەداوە بۆ دوژمن و هەروەها سلاو دەنێرین بۆ خەلکی خۆراگری کوردستان.
مەرگ و نەمان بۆ رژێمی ئاخوندی
سەرکەوێ‌ خەباتی نەپساوەی نەتەوەکەمان
رێکخراوی لاوانی خەباتی کوردستانی ئێران
رێکخراوی ئافرەتانی خەباتی کوردستانی ئێران
28ی رەشەمەی 1393
بەشداری بەرپرسی پەیوەندیەکانی رێکخراوی لاوانی خەباتی کوردستانی ئێران لە کۆبونەوەی ئەندامان و لایەنگرانی سازمانی خەبات لە شاری سلێمانی
رێکەوتی ٢٢ ی رەشەمەی ساڵی ١٣٩٣ کۆچی خۆری لە بنکەی پەیوەندییەکانی سازمانی خەبات ی کوردستان لە شاری سلێمانی بە بەشداری ژمارەیێک لە ئەندام و لایەنگران کۆبونەوەیەک بە مەبەستی رێکخستنەوەی کۆمیتەی لایەنگرانی سازمان بەشی سلێمانی و هەروەها بۆ باس لەسەر دوایین پێشهاتە سیاسیەکانی جیهان و ناوچەکە بە گشتی و کوردستان و رۆلی سازمانی خەبات لە ناوخۆ و دەرەوەی وڵات بە تایبەتی ساز درا.
سەرەتای کۆبوونەوەکە بە دەقیقەیێک وێستان بۆ رێزگرتن لە گیانی پاکی شەهیدان دەستی پێکرد. دواتر بەرێز کاک رەحمان پوورکەریمی بەرپرسی پێوەندیی سلێمانی سازمانی خەبات ی کوردستان قسەی کرد و بە گشتی وێنایێکی لەسەر سیاسەت و بەرنامەی سازمانی خەبات لە رابردوو و ئێستا پێش کەش بە ئامادە بووان کرد و یەکریزی و تەبایی ئەندامان و لایەنگرانی سازمان لەسەر بناغەی وەفاداریی بۆ رێبازی جەنابی مامۆستا سەیید جەلالی حوسێنی بە زامنی بەرەو پێش چوونی زیاتر و خزمەتی زیاتر بە گەل و نیشتمان زانی.
بەرێز کاک جەمال عەلی پوور ئەندامی دەستەیی بەرێوەبەری و بەرپرسی پەیوەندیەکانی رێکخراوی لاوانی خەباتی کوردستانی ئێران لەو کۆبوونەوەیەدا بەشداری کرد و لە برگەیەکدا کە تەرخان کرابوو بۆ بەرێزیان بابەتێکی سیاسی لەسەر دوایین رووداو و ئاڵوگۆرە سیاسیەکانی جیهان و ناوچەکە بەگشتی و ئێران و کوردستان بەتایبەتی پێش کەش کرد و لە بەشێک لە ووتەکانیشی دا تیشکی خستە سەر کۆنگرەی دووەمی رێکخراوی لاوانی خەبات (کۆنگرەی یەکریزی و سەرکەوتن) و لەسەر دوایین گۆرانکاری و بریارەکانی کۆنگرە کاروچالاکیەکانی رێکخراو بۆ بەشداربووان ئاخاوتوو و و پییان راگەیەندرا .
هەر لەو کۆبوونەوەیەدا چەندین بابەت و برگە پێشکەشکران لە کۆتایی کۆبوونەوەکەش خەڵاتی رێز لینان پێشکەش بە دایە ئامینە نادری دایکی دوو شەهیدی سەربەرزی سازمان بەناوەکانی شەهید مەلاعەلی و شەهید ساڵح رەسوڵی کرا و رێز لە هەوڵ و تێکۆشانی ئەو دایکە نیشتمانپەروەرە لەراست گەل و نیشتمان و سازمانی خەبات گیرا.
بەشداری رێکخراوی لاوانی خەبات کوردستانی ئێران لە کۆنفڕانسی رێگای ئاشتی و دێموکراسی ،میانەڕەوی دژ بە توندڕەوی
رۆژی هەینی 24ی رێبەندانی 1393 کۆنفڕانسێک لە ژێر ناوی رێگای ئاشتی و دێموکراسی، میانەڕەوی دژ بە توندڕەوی، لە شارێ سلێمانی بەرێوە چوو. ئەم کۆنفڕانسە کە بە هاوکاریی رێکخراوی ئازادیی لاوان و کۆمەڵەی خوێندکارانی کوردستان ساز درابوو تێیدا رێکخراوی لاوانی خەبات بانگهێشت کرابوون. هەیئەتێکی رێکخراوی لاوانی خەبات بە سەرپەرشتی بەرێز کاک ئارام سلێمانی بەرپرسی رێکخراوی لاوانی خەبات ی کوردستان لەو کۆنفرانسەدا ئامادە بوون.
رۆژی کردنەوەی کۆنفرانس بە وتاری مەکتەبی پەیوەندییەکانی یەکیەتیی نیشتمانیی کوردستانەوە دەستی پێکرد و هەوەرها دواتریش وتاری سکرتێری لاوانی سوسیال دێموکراتی جیهان لەلایەن 'ئەڤین ئینجێر' و پاشان وتاری 'مەلا بەختیار'، کارگێڕی مەکتەبی سیاسیی یەکیەتیی نیشتمانیی کوردستان پێشکەش کرا. دوایین ووتاریش وتاری لاوانی سوسیال دێموکراتی عەرەب بوو. لە ماوەی کاری دوو رۆژی کۆنفرانس 6 پانێل لە پێوەند بە مژاری کۆنفرانسەکە بەرێوەچوو کە تێیدا رێکخراوی لاوان لەرێگەی تێبینی و سەرەنجەکانیان بەشدارییان تێدا کرد.
راپۆرتی بەرێوەچوونی کۆنگرەی دووهەمی رێکخراوی لاوانی خەباتی کوردستانی ئێران (کۆنگرەی یەکریزی و سەرکەوتن )
رۆژی پێنج شەممە رێکەوتی 16ی رێبەندانی 1393 پاش بەرێوەچوونی مەراسیمی کردنەوە، کۆنگرەی دووهەمی رێکخراوی لاوانی خەباتی کوردستانی ئێران کۆنگرەی یەکریزی و سەرکەوتن بە ئامادەبوونی بەشێکی بەرچاو لە نوێنەرانی کۆمیتەکانی رێکخراوی لاوان لە پارێزگا و ناوچەکانی کوردستان بە شێوەیەکی فەرمی دەستی بەکارەکانی کرد .
سەرەتا لەلایەن لێژنەی ئامادەکاری کۆنگرە وتەی بەخێر هاتن خوێندرایەوە و....
دواتر بەشێوەیەکی نهێنی 3کەس بۆ دیوانی بەرێوەبەری کۆنگرە هەڵبژێردران. پاشان داوا لە بەرێز کاک فوئاد جەعفەری بەرپرسی پێشووی رێکخراوی لاوان هەڵبژێردراوی کۆنگرەی یەک کرا ،راپۆرتی گشتی سیاسی و کۆمەڵایەتی دەستەی بەرێوەبەری رێکخراوی لاوانی خەباتی کوردستانی پێش کشە بکات. بەرێز کاک فوئاد جەعفەری بەخێرهاتنی ئەندامانی کۆنگرەی کرد و هیوای سەرکەوتن و بەرەوپێشچوونی زیاتری بۆ رێکخراوی لاوان خواست و هەروەها کۆتایی هاتنی بەرپرسیارێتی ئەندامانی دەستەی بەرێوەبەری هەڵبژێردراوی کۆنگرەی یەکی رێکخراوی لاوانی راگەیاند . لە راپۆرتی گشتی دا بەوردی ئەو کێشانەی لاوان لە بوارەکانی سیاسی ئابوری و کۆمەڵایەتی و کلتووری بە تایبەتی مادەی هۆشبەر و بێکاری کە بەرۆکی لاوانی گرتووە لە کوردستانی ئێراندا باسکران و هەروەها بەشێوەیەکی گشتی ئاور لە دۆخی ئێستای لاوان لە هەرچوارپارچەی کوردستان درابوویەوە. پێش کەش کردنی راپۆرتی گشتی تا نیوە شەو بەردەوام بوو و ئەندامانیش بەسەرنج و تێبینیەکانیان راپۆرتەکەیان زیاتر دەوڵەمەنتر کرد. رۆژی یەکەمی کاری کۆنگرە بەم شێوەیە کۆتایی پێهات .
رۆژی دووهەمی کارەکانی کۆنگرە کاتژمێر 8:30 سەرلەبەیانی بە درێژەدان بە راپۆرتی گشتی سیاسی و کۆمەڵایەتی رێکخراوی لاوان دەستی پێکرد کە پاش وەرگرتنی سەرنج و تێبینی ئەندامان بەدەنگی زۆرینە پەسەندکرا. لە بەشێکی دیکەی کارەکانی کۆنگرە پەیامی رێکخراوەکانی لاوان و کەسایەتیەکان لە لایەن لێژنەی بەرێوەبەری کۆنگرە خوێندرانەوە و هەر لە رۆژی دووەمی کۆنگرە دەست کرا بە پێداچوونەوە بەپەیرەو پرۆگرامی رێکخراوی لاوان لەو بەشەشدا پێشنیارکرا کە ناوەندی لاوان بگۆردرێت بە رێکخراوی لاوان کە بەزۆرینەی دەنگی ئەندامانی کۆنگرە ناوەندی لاوان بوو بە رێکخراوی لاوانی خەباتی کوردستانی ئێران پاشانیش بەچەندین ئاڵوگۆر و زیادکردنی چەندخاڵێک بەتایبەت پەیرەوکردنی سیستەمی کۆتا بۆ کچان و ئافرەتان بۆ بەرێوەبەری لاوان پەیرەو و پرۆگرامی رێکخراوی لاوانی خەبات بە زۆرینەی دەنگی ئەندامان پەسەندکرا .
دواهەمین برگەی کارەکانی کۆنگرە بریتی بوو لە هەڵبژاردنی دەستەی نوێی بەرێوەبەری . هەڵبژاردنەکەش بە شێوەیەکی دیموکراتی و نهێنی بەرێووەچوو کە سەرئەنجام هەر یەکە لە بەرێزان:
جەمال علی پوور
سەحەر قاسم زادە
سارۆ حوسێنی
ئارام سلێمانی
بەیان ئەحمەدی
وەکوو ئەندامانی دەستەیی بەرێوەبەری رێکخراوی لاوان هەڵبژێردران و دەنگی زۆرینەیان هێنا . بەم شێوەیە دووهەمین کۆنگرەی رێکخراوی لاوانی خەباتی کوردستانی ئێران بە بەلێندان بەرۆحی شەهیدان و بەردەوامبوون لەسەر رێبازی مامۆستای خۆشەویستمان مامۆستا سید جەلال حوسێنی و سازمانی خەبات کارەکانی کۆنگرە کۆتایی پێهات .
رێکخراوی لاوانی خەبات ی کوردستانی ئێران
هەیئەتی بەرێوەبەری کۆنگرەی دووهەم
17ی رێبەندانی 1393
رێورەسمی کردنەوەی دووهەمین کۆنگرەی ناوەندی لاوانی خەبات
رۆژی پێنج شەممە رێکەوتی 16ی رێبەندانی 1393 لەبارەگای ناوەندی سازمانی خەبات ی کوردستانی ئێران بە ئامادەبوونی بەشێک لە ئەندامانی سەرکردایەتی رێورەسمی کرانەوەی دووهەمین کۆنگرەی ناوەندی لاوانی خەبات بەرێوە چوو.
رێورەسمەکە بە دەقیقەیێک وێستان بۆ رێزگرتن لە روحی پاکی شەهیدان دەستی پێکرد و ...


پاشان سرودی کوردم ئەمن پێش کەش کرا. پاشان بەریز کاک فوئادی جەعفەری بەرپرسی پێشووی ناوەندی لاوانی خەبات پەیامی کردنەوەی کۆنگرەی دووهەمی ناوەندی لاوانی پێش کەش کرد کە تێیدا وێرای بە خێرهاتنی میوانەکان ئاورێکی کورتی لە دامەزران و کار و تێکۆشان و ئەرکەکانی ناوەندی لاوان دایەوە. لە پاش ووتەکانی بەرپرسی پێشووی ناوەندی لاوان پەیامی کومیتەی ناوەندی سازمانی خەبات ی کوردستان لە لایەن بەرێز کاک بێهروز ئەردەڵان کارگێری کومیتەی ناوەندیی پێش کەش کرا. بەرێز ئەردەڵان لە ووتەکانی دا وێرای پیرۆزبایی کردن بە بۆنەی بەستنی دووهەم کۆنگرەی ناوەندی لاوان و هیوای سەرکەوتن و بەرەوپێش چوونی زیاتر لە راست ئەرکەکانی لاوان لە ریزەکانی سازمانی خەبات ی کوردستان ئاماژەی بە زەرورەتی پێکهاتنی ناوەندێک کرد کە هێز و تواناکانی لاوانی تێکۆشەری کوردستانی تێک رێکبخرێ‌ و لەگەڵ ئەوەی کە خەباتی نەتەوەیی بەرەوپێشەوە ببەن ، بۆ ماف و داوا سینفیەکانی لاوانیش لەهەوڵ و تێکۆشاندا بن. کارگێری کومیتەی ناوەندی سازمانی خەبات وێرای چاوخشاندنێک بە سەر چالاکیەکانی ناوەندی لاوان ووتی: پێویستە لەم کۆنگرەیە دا خاڵە لاوازییەکان وەلابنرێن و خاڵە بەهێزەکانیش بە هێزتر بکرێن و سنووری کارو تێکۆشانی لاوان پەرەی پێبدرێ‌. هەروەها پاڵپشتی و پشتیوانی سازمانی خەبات ی کوردستانی بۆ ئەندامانی کۆنگرەی دووهەمی ناوەندی لاوان دووپات کردەوە و هیوای بەستنی کۆنگرەیێکی پڕ لەدەسکەوتی بۆ خواستن.
لەدوای پێش کەش کردنی پەیامی کومیتەی ناوەندی پەیامی رێکخراوی ئافرەتانی سازمانی خەبات لە لایەن بەرێز خاتوو سەحەر قاسمزادە ئەندامی دەستەی بەرێوەبەری رێکخراوی ئافرەتان پێش کەش کرا.
پاشان کورتە فیلمێکی وێنەیی لەسەر کار و چالاکیەکانی نێۆان کۆنگرەی یەکەم تا کۆنگرەی دووهەمی ناوەندی لاوان پێشانی ئامادەبووانی رێورەسمە کرا.
پاشان کۆتایی بە رێورسمی کردنەوە هات و کۆنگرەی دووهەمی ناوەندی لاوان لە ژێر ناوی کۆنگرەی یەکریزی و سەرکەوتن بە رەسمی دەستی بەکارەکانی کرد.
2ی رێبەندان ساڵرۆژی دامەزراندنی کۆماری کوردستان پیرۆزبێت
بەبۆنەی 69 مین سالرۆژی دامەزراندنی کۆماری کوردستان گەرمترین پیرۆزبایی خۆمان پێشکەش بە سەرجەم نەتەوەی کورد لە هەرجێگایەکی ئەم حیهانە دەکەین و هیوادارین ئەم یادە ببێتە هۆی زیاتر لێک نزیکبوونەوی هێز و لایەنە سیاسیەکانی کوردستانی ئێران و هەوڵ بدرێت بە یەکریزی و تەبایی کێشە و گرفتەکانیان چارەسەربکەن و هەول بۆ دامەزراندنی بەرەیەکی هاوبەش بدەن بۆ ئەوەی بزووتنەوەکەمان لە کوردستانی ئێران بەهێزتر و بەتواناتربێت کە ئەمەش دەبێتە هۆی ئەوەی کە هاونیشتیمانیان بە هێز و گۆرو تینێکی زۆرەوە هەوڵ بدەن بۆ سەرخستنی خەباتی رزگاریخوازانەی نەتەوەکەمان.
2ی رێبەندان بۆ گەلی کورد بە رۆژێکی مێژووی و پر دەست کەوت و شانازی دادەنرێت چونکە لەو رۆژەدا گەلی کورد لە کوردستانی ئێران بە هۆی ئەو هەل و مەرجە گونجاوەی هاتە پێشەوە و هەروەها بە خوێندنەوەیەکی دروست لە لایەن قازی محمد و هاورێیانی و بە ئامادەبوونی بە شێکی بەرچاو لە کوردانی بەشەکانی دیکەی کوردستان لە مەیدانی چوارچرای شاری مەهاباد کۆماری کوردستان بە سەرۆکایەتی قازی محمد راگەێندرا و دلی هەموو کوردێکی دڵسۆز و نیشتیمانپەروەری خۆشکرد و خەونی چەندین ساڵای شۆرشی رزگاریخوازانەی نەتەوەکەمانی هێنایەدی لە دوای دامەزراندنیشی توانرا چەندین چاکسازی لە بواەرەکانی پەروەردە و ئابووری و سیاسی و فەرهەنگی دا ئەنجام بدرێت کە کاریگەریەکی بەرچاوی هەبوو لە پێشخستنی کۆماری کوردستان . هەرچەندە کورد لە کاتی دامەزراندنی کۆمار رووبەرووی فشاری زۆری ناوخۆیی و نێودەولاتی بووە بەلام پێشەوا قازی محمد و هاوکارانی رووبەرووی سەرجەم ئەو فشارانە بوونەوە ، و لە ماوەی حۆکمرانی کۆماری کوردستان لەو ناوچانەی کە لە ژێر دەسەلاتی دابوون توانی ئارامی و سەقامگیریەکی باش بۆ دانیشتوانانی دەستەبەربکات بێگومان نابێت رۆڵی بارزانیەکان لە کاتی دامەزراندنی کۆمار لە بیربکەین کە دەورونەخشێکی بەرچاویان هەبوو لە پاراستن و راگرتنی کۆماری کوردستان بەلام مخابن وەک هەمیشە دووژمنانی گەل و نیشتمانەکەمان چاویان بەم پێشکەوتنەی کورد و کۆمار هەڵنەدەهات و هەمیشە لە هەولی لاوازکردن و روخاندنی ئەم کۆمارە ساوەیەدا بوون و تا بە هەولی نگریزی شای ئێران و هەروەها کشانەوەی یەکێتی سۆڤیەت لە سەر بەرژەوەندی تایبەتی خۆی و خۆ بەدەستەوەدانی ئازەربایجان لە بەرامبەر هێزەکانی شای ئێران و خیانەتی چەندین سەرۆک عەشیرەتی کورد و فشارە نێودەولەتییەکان و هەروەها چەندین هۆکاری دیکە کۆماری کوردستانیان روخاند و نەیان هێشت گەلەکەمان لە ژێر سایەی حۆکمرانی خۆیدا بەردەوامبێت و ئەندامان و کاربەدەستانی حکومەتی کۆماریشیان لە پێش هەموو شیانەوە پێشەوا قازی محمد لە ماوەیەکی کەمدا حۆکمی لە سێدارە درا. هەرچەندە دوژمن وای دەزانی بە روخانی کۆمار کوردیش دەروخێت بەلام بە پێچەوانەوە رۆڵە قارەمانەکانی نەتەوەکەمان ساڵ بەدوای ساڵ بە هێزتر و خۆراگرتردەبن لەهەمبەر داگیرکەران و تا ئێستاشی لەگەڵدابێت هەر لە هەولی بەدەست هێنانی مافە رەواکانیەتی .
ئێمە لە کاتێکدا یادی 69 دامەزراندنی کۆماری کوردستان دەکەینەوە کە نەتەوەکەمان لە کوردستانی ئێران لە ژێر دەسەڵاتی رژێمی ئاخوندی دا بە دەیان قەیرانی گەورەدا تێدەپەرن کە کاریگەریەکی زۆری کردۆتە سەر ژیان و گوزەرانی دانیشتوانانی کودستان و تا دێت فشارەکانی رژێم بۆ سەر هاونیشتیمانیان زیاتر دەبێت چ لە باری سیاسی و چ لە باری کۆمەڵایەتی و ئابووریەوە، بەداخەوە لە ئێستادا رێژەیەکی زۆری بێکاری و نەخوێندەواری لە پارێزگاکانی کوردستان بوونی هەیە و هەروەها رێژەی گیرۆدەبوونی لاوان و مێرمندالان بە مادەی هۆشبەر تادێت بەرزتر دەبێتەوە و رژێم هیچ چارەسەرێکی بۆ ئەو قەیرانانە پێ نیە.
ئێمە وەک ناوەندی لاوانی خەباتی کوردستانی ئێران پشتیوانی لە هەر نزیکبوونەوەیەکی زیاتری نێوان هێزو لایەنەکانی کوردستانی ئێران دەکەین وە داواکارین سەرجەم لایەن و هێزەکانی رۆژهەلات دەست لە ناودەستی یەکتری ناکۆکی و دووبەرەکی و بەرژەوەندی تەسکی حیزبی وەلا بنێن و بیرێک لە رێگا چارەیەکی گونجاوبکەنەوە بۆ ئەوەی نەتەوەکەمان لەدەست ستەم و نادادپەروەری رژێمی دیکتاتۆری ئاخوندی ئێران رزگاری بێت ، هەرلەم یادە پیرۆزەدا سڵاو دەنێرین بۆ رۆحی پاکی پێشەوا قازی محمد یەکەم سەرۆک کۆماری کوردستان و هەروەها سەرجەم شەهیدانی رێگای رزگاریخوازانەی کوردستان
ناوەندی لاوانی خەباتی کوردستانی ئێران
دەستەی بەرێوەبەری
2ی رێبەندانی 1393
کوژرانی لاوێکی مەهابادی و رۆیشتنی چەند لاو بە خێزانەوە بە ناو ریزەکانی داعش
لە ماوەی رابردوودا ژمارەیەک لە لاوانی کوردی خەڵکی شارە جیاجیاکانی کوردستان روویان لە ریزەکانی داعش کردووەو چەند کەسێکیشیان لێ کوژراوە. بەپێی راپۆرتی هەواڵدەریی کوردپا، لاوێکی تەمەن ٢٢ ساڵەی خەڵکی مەهاباد، بە ناوی رەحیم بایەزیدی، کوری عومەری قالە رەش، کە بە مەبەستی جیهاد کردن رووی لە ریزەکانی داعش کردبوو، رێکەوتی ٢١ی بەفرانباری ئەمساڵ لە تێکهەڵچوونی نێوان چەکدارانی داعش و هێزەکانی پێشمەرگەدا لە شەنگال کوژرا. بە پێی ئەم راپۆرتە، ژمارەیک لاوی سەقزی، کە بەشێکیان خیزاندار بوون، لەژێر ناوی هیجرەت و جیهاد کردندا، چوونەتە نێو ریزەکانی داعش لە عێراق. سەرچاوەیەکی ئاگادار رایگەیاند، کە چەند رۆژ پێش ئێستا دوو کەس بەناوی فەرزاد محەمەدی و یەعقووب، کە خەڵکی گەڕەکی بەرد بڕانی شاری سەقز بوون، روویان لە نێو داعش کردووە. بە گوتەی ئەو سەرچاوەیە، فەرزاد محەمەدی هاوڕێ لەگەڵ ژنەکەی چۆتە نێو ریزەکانی داعش. جێگەی باسە کە لە ناوەڕاستی مانگی خەزەڵوەری ئەمساڵ لاپەڕەی پشتیوانانی خەلافەت لە تۆڕی کۆمەڵایەتیی فەیسبووک بلاوی کردبوویەوە، " لە ماوەی ١٠  مانگی رابردوودا ٢٣ لاوی کوردی خەڵکی شارەکانی بۆکان، مەهاباد، سەقز و جوانڕۆ کە بە "موهاجیر" ناوی بردبوون، روویان لە نێو خەلافەتی ئیسلامی کردووەو دەستبەجێ ٩ کەسیان خۆیان بۆ کردەوەی ئیستشهادی (خۆ تەقاندنەوە) ئامادە کردبوو".
سینه‌ماکاری کورد سامان حسین پوور خه‌ڵاتی مێهره‌جانی نیۆیۆرکی بۆ خۆی تۆمار کرد
خه‌ڵاتی مێهره‌جانی سه‌ربه‌خۆی نیۆیۆرک به‌ فیلمی "یه‌ک هیچ" له‌ ده‌رهێنانی ده‌رهێنه‌رێکی کورد بە ناوی سامان حسین پوور بەخشرا. به‌پێی راپۆرتی هەواڵدەریەکان، ئه‌مین مورادی، سه‌رۆکی حه‌وزه‌ی هونه‌ری پارێزگای کوردستان سه‌باره‌ت به‌م هه‌واڵه‌‌ ڕایگه‌یاند: کورته‌ فیلمی "یه‌ک هیچ" له‌ ده‌رهێنانی سامان حسێن پوور خه‌ڵاتی باشترین ده‌رهێنه‌ری میهره‌جانی فیلمی سه‌ربه‌خۆی Nielsenی نیۆیۆرکی مسۆگه‌ر کرد. ئه‌مین مورادی زیادی کرد: ئه‌م هونه‌رمه‌نده‌ گه‌نجه‌ی پارێزگای‌ کوردستان‌ وه‌کوو نوێنه‌ری سینه‌مای ئێران خه‌ڵاتی ئه‌م به‌شه‌ له‌ میهره‌جانه‌که‌ی ده‌ست هێناکه‌‌ به‌ ئامانجی تاوتوێ کردنی هونه‌ری سه‌ربه‌خۆ بۆ هونه‌رمه‌رندانی سه‌ربه‌خۆ به‌‌ڕێوه‌چووه‌. مۆرادی وتیشی: کورته‌ فیلمه‌ هه‌ڵبژاردراوه‌کان پاش هه‌ڵسه‌ڵگاندن له‌ ماڵپه‌‌ڕی میهره‌جانه‌که‌ بڵاو ده‌کرێته‌وه‌ و کورته‌ فیلمی "یه‌ک هیچ" له‌ به‌رهه‌مه‌کانی حه‌وزه‌ی هونه‌ری پارێزگای کوردستان و له‌ ده‌رهێنانی سامان حسێن پوور له‌م میهره‌جانه‌دا به‌شدار بوو و له‌گه‌ڵ کورته‌ فیلمی وڵاتانی ئه‌ڵمانیا، ڕووسیا، سویس و هوڵه‌ند، ئه‌مه‌ریکا، مه‌کزیک و ئۆکرانیا ڕکابه‌ری کرد.
دوایین هەواڵەکان
photo
لاوانی خه‌بات
11 مانگ و 12 ڕۆژ و 21 کاتژمێر و 50 خوله‌ک له‌مه‌وپێش‌
photo
ڕێکخراوی لاوانی خەباتی کوردستانی ئێران

1 ساڵ و 25 ڕۆژ و 15 کاتژمێر و 6 خوله‌ک له‌مه‌وپێش‌
photo
ڕاگەیندراوی ڕێکخراوی لاوانی خەبات

1 ساڵ و 1 مانگ و 6 ڕۆژ و 14 کاتژمێر و 41 خوله‌ک له‌مه‌وپێش‌
photo
ڕاگەیندراوی ڕێکخراوی لاوانی خەبات بەبۆنەی ڕۆژی زمانی زگماگی

1 ساڵ و 1 مانگ و 23 ڕۆژ و 22 کاتژمێر و 45 خوله‌ک له‌مه‌وپێش‌
photo
لاوانی خه‌بات

1 ساڵ و 3 مانگ و 4 ڕۆژ و 21 کاتژمێر و 52 خوله‌ک له‌مه‌وپێش‌
photo
لاوانی خه‌بات

1 ساڵ و 5 مانگ و 13 ڕۆژ و 17 کاتژمێر و 16 خوله‌ک له‌مه‌وپێش‌
photo


1 ساڵ و 5 مانگ و 27 ڕۆژ و 17 کاتژمێر و 39 خوله‌ک له‌مه‌وپێش‌

ده‌رباره‌ی ئێمه به کورتی


لێره‌‌‌ ده‌‌‌رباره‌‌‌ی خۆتان بنووسن به کورتی

په‌یوه‌ندی


تۆڕە کۆمەڵایەتیەکان



٢/ لینکی یوتوب

٣/ لینکی تویته‌‌‌ر