lawan


ڕێکخراوی لاوانی خه‌باتی کوردستانی ئێران
Iranian Kurdistan Khabat Youth Organization
         
پێک هێنانی کۆبوونەوەیەک لەلایەن رێکخراوی لاوانی خەباتی کوردستانی ئێران
رۆژی سێشەممە رێکەوتی 25ی خەرمانان لە بنکەی رێکخراوی لاوانی خەباتی کوردستانی ئێران بە ئامادەبوونی بەشێک لە ئەندامانی دەستەی بە رێوەبەری رێکخراوی لاوان کۆبوونەوەیەک بۆ بەشێک لە کادر و ئەندامانی رێکخراوی لاوانی خەبات پێک هێنرا. کۆبوونەوەکە تەرخان کرابوو بۆ باسکردن لە بارودۆخی ئێستای لاوان لە ناوچەکە بەگشتی و کوردستانی ئێران بەتایبەتی و هەروەها کار و بەرنامەکانی رێکخراوی لاوانی خەباتی کوردستانی ئێران بۆ داهاتوو.
سەرەتای کۆبوونەوەکە بە ساتێک بێدەنگی بۆ گیانی پاکی شەهیدانی کوردستان بەگشتی و سازمانی خەبات بە تایبەتی دەستی پێکرد و لە پاشاندا لەلایەن خاتوو سەحەری قاسم زادە ئەندامی دەستەی بەرێوەبەری رێکخراوی لاوان برگەکانی کۆبوونەوەکە بۆ ئامادەبووان شیکرایەوە.
برگەی یەکەمی کۆبوونەوەکە تەرخان کرا بۆ راپۆرتی سیاسی و تەشکیلاتی بەرپرسی یەکەمی رێکخراوی لاوانی خەبات کە لە لایەن بەرێز کاک ئارام سلێمانی پێش کەش کرا. بەرێز سلێمانی لە ووتەکانی دا تیشکی خستە سەر چەندین بابەتی هەستیار و گرینگی پێوەندیدار بە لاوان و ئاماژەی بە بارودۆخی نەخوازراوی لاوان بە هۆی شەر و بوونی دەسەڵاتە دیکتاتۆرەکان و گرووپە ترۆریستیەکان لە ئاستی ناوچەکە کرد. بەرێز سلێمانی وێرای ئاماژە بۆ رەهەندەکانی کێشە و کۆسپەکانی بەردەم لاوان ووتی: ئەوەی کە زۆر گشگیرە و کێشەی زۆربەی لاوانە بریتیە لە بێکاری و نەبوونی ژیانێکی سەقامگیر و باشە. جێبەجی نەکردنی ویست و داواکاریەکانی لاوان لە لایەن دەسەلات دارانەوە و یان خود پەرەسەندنی شەر و کێشەکانی ئەو ژینگەیە وای کردووە کە بەشێکی بەرچاو لە توێژی لاوان رووبکەنە ولاتانی ئەوروپا بۆ مەبەستی بەدەست هێنانی ژیانێکی باشتر. بەرێز سلێمانی رووکردنە دەرەوەی ولاتی بە چارەسەر نەزانی بۆ کێشەکانی لاوان و لەو پەیوەندیەدا ووتی: کە چوونی لاوان بۆ دەرەوەی ولات جگە لەوەی کە دەبێت هۆی ئەوەی کە ئەو لاوانە رووبەرووی مەترسی زۆر ببنەوە و زۆرجار کە گەیشتنە ئەو خەیالانەی کە کۆشکیان لەسەر بونیات نابوون بەو دەرئەنجامە ناگەن کە خوازیاری بوون. لە بەشێکی تری قسەکانی بەرپرسی گشتی رێکخراوی لاوان سەبارەت بە رەوشی لاوان لە کوردستانی ئێران بە وردی قسەی کرد و لەبەشێک لەو تەوەرە وتی کە رەوشی لاوان لە کوردستانی جیاوازترە لەو بارودۆخەی کە لە پارچەکانی تری کوردستان هەیە بە داخەوە لە کوردستانی ئێران بە هۆی بوونی رژێمی ئاخوندی لە سەر دەسەلات ئاماری توشبووان بە مادەی هۆشبەر و بەتایبەت لە نێو توێژی لاوان و خوێندکار و نەبوونی دەرفەتی کار و پیشەیەکی گونجاو و فشار و سەرکوتی رژێم رۆژ لە دوایی رۆژ زیادتری کردووە و بۆتە هۆی دروست بوونی مەترسی گەورە بۆ سەر ژیان و داهاتوویان . بەرپرسی گشتی رێکخراوی لاوان، رژێمی ئاخوندی بە هۆکاری هەموو ئەو کێشانە زانی و رایگەیاند کە رژێم بە هیچ شێوەیەک لە هەولی چارەسەرکردنی ئەو کێشانەدا نیە و بەڵکوو هۆکارێکی سەرەکیە لە زیادکردنی کێشەکانی لاوان .لە بەشێکی دیکەی قسەکانی بەرێز کاک ئارام سلێمانی تیشک خرایە سەر کار و بەرنامەی رێکخراو بۆ لاوانی کوردستان و رایگەیاند کە لە ئێستادا ئەرکی سەرەکی ئێمە هەوڵدانە بۆ وشیارکردنەوەی لاوان لە پلان و بەرنامەکانی رژێم و دەرخستنی راستیەکانە. بەرێز سلێمانی جارێکی دیکە پێی لەسەر ئەوە داگرتەوە کە بە دڵنیاییەوەتەنیا چارەسەری کێشەکانی وەڵاتی ئێران لە ناوبردنی دەسەڵاتی ئاخوندییە و بە رووخانی رژێمی ئاخوندی بەشێکی زۆر لە کێشەکان چارەسەر دەبن و وەدی هاتنی ئەو خەونەشی بە هەوڵ و تێکۆشانی سەرجەم چین و توێژەکانی کۆمەڵگا و بە تایبەتی چینی لاوان زانی.
هەر سەبارەت بە رەوشی لاوان لە درێژەی کۆبوونەوەکەدا کاک سارۆ حوسێنی ئەندامی دەستەی بەرێوەبەری رێکخراوی لاوان بابەتێکی سەبارەت بە کۆچی لاوان بۆ دەرەوەی ولات و و هۆکار و دەرئەنجامەکانی پێش کەش کرد.
لە کۆتایی کۆبوونەوەکەدا ئامادەبوان بە سەرنج و تیب٠Žینی و پێشنیارەکانیان کۆبوونەوەکەیان دەوڵەمەندتر کرد .
ژنێکی کورد لە شاری شنۆ بە هۆی خۆکوژییەوە گیانی دا
ژنێکی کوردی خەڵکی ناوچەی شنۆ لە رێگای خۆهەڵواسینەوە دەستی دایە خۆکوژیی و لەو رێگایەوە گیانی دا.بەپێی راپۆرتی سەرچاوەکانی هەواڵ، ژنێک بە ناوی “زارا مەجیدی” تەمەن 40 سال و خەڵکی یەکێک لە ئاواییەکانی سەر بە شاری شنۆ بەهۆی کێشەی بنەماڵەییەوە دەستی داوەتە خۆکوژیی و لە ئاکامدا گیانی داوە.ئەو ژنە ماوەی یەک ساڵ لەمەوبەر لە هاوسەرەکەی جیا بووەتەوە و لە ماڵی باوکی دەژیا و دەوترێت کە لەم دواییانەدا ئەو ژنە ویستبووی بگەڕێتەوە لای مێردەکەی، بەڵام ماڵی باوکی “زارا” دژایەتیان لەگەڵ گەڕانەوەی بۆ لای مێردەکەی کردووە و چەندین جار لێیان داوە و هەر بەو هۆیەوە زۆر کەوتووەتە ژێر زەخت و گوشار و شەوی رابردوو کۆتایی بە ژیانی خۆی هێناوە.جێگای ئاماژەیە، نەهامەتیی و کێشەکانی ژیان لە رۆژهەڵاتی کوردستان و ئێران وای لە ژیانی هاوڵاتییان کردووە، کە چەندەها گیر و گرفتی جیاجیا بەرۆکی پێیان گرتووە و زۆر جار بە هۆی ئەم گرفتانە و نەریتی بوونی کۆمەڵگا، پەنا بۆ دیاردەی نەشیاوی خۆکوژیی دەبەن و لەم نێوەشدا کچان و ژنان یەکەم قوربانییانی ئەم دیاردەیەن.
%20ی خوێندکاران لە ئێران ماددە سڕکەرەکان بەکاردەهێنن
ئاماری خوێندکارانی تووشبوو بە ماددە سڕکەرەکان لە ئێران رۆژ لە دوای رۆژ رووی لە زیادبوون دایە و ئەوەش مەترسییەکی جیددیە بۆسەر توێژی خوێندکار لەزانکۆکانی ئێراندا.بەرپرسێکی بەرنگاربوونەوەی ماددە سڕکەرەکانی کۆماری ئیسلامی ئێران رایگەیاندووە، 9% کوڕان و 11% کچانی خوێندکار لەزانکۆ دەوڵەتییەکان ماددە سڕکەرەکان بەکار دێنن.ئەو بەرپرسە رایگەیاندووە، زیاتری خوێندکاران جۆری ماددەی “حەشیش و کۆدۆئین” بەکار دێنن و ئاماری گیرۆدەبوون بە ماددە سڕکەرەکان لە زانکۆکانی ئێراندا جێگای نیگەرانییە.ئەو بەرپرس حکومەتییە لەدرێژەدا رایگەیاندووە 76%ی خوێندکارانی زانکۆ دەوڵەتییەکان ئیمکاناتی خوێندنیان نییە ئەوەش هۆکارێکە کە تووشی ماددە سڕکەرەکان دەبن.هەواڵدەریی حکومەتیی “ئیسنا” لەزاری بەرپرسێکی حکومەت بڵاوی کردووەتەوە کێشەی سیاسی، ئابووری و کۆمەڵایەتی سەرەکیترین هۆکاری راکێشانی خوێندکاران بۆ تووشبون بە ماددە سڕکەرەکانن.سەرۆکی رێکخراوی “بێهزیستی ئێران” لەو پێوەندییەدا رایگەیاندووە، 57%ی ئەو کەسانەی ماددە سڕکەرەکان بەکاردێنن کاریان هەیە کە لەو رێژەیە 64%یان ئاستی خوێندەواریان دیپلۆم و 21%ی ئەو کەسانەش بڕوانامەی کارناسیان هەیە.بەپێی ئامارەکان لەساڵی 1390ی هەتاویدا لەکۆی حەشیمەتی 15 هەتا تەمەن 64 ساڵ لەئێراندا 2.65%یانن گیرۆدە بە ماددە سڕکەرەکانن.رێژەی لاوانی تووش بوو بە ماددە هۆشبەرە سەنعەتییەکان لە ئێران و گیان لەدەستدان بە هۆی بەکارهێنانی ئەم ماددە هۆشبەرەانە لە ماوەی ئەم چەند ساڵەدا بە توندی رووی لە زۆر بوون کردووە.ئامارەکانی رێکخراوی پزشکیی یاسایی باس لەوە دەکەن کە رۆژانە لانیکەم 11 کەسی تووشبوو بە ماددە هۆشبەرەکان گیانیان لەدەست دەدەن.لە ماوەی ساڵی 1392ی هەتاوی، دوو هەزار و 957 کەس بەهۆی بەکارهێنانی ماددە هۆشبەرەکان لە وڵاتی ئێران گیانیان لە دەست داوە کە لە ئەم ئامارەدا 2 هەزار و 727 کەس پیاوان و 230 کەسیان ژنان پێکیان هێناوە.
زۆرانبازێکی کورد میداڵی بورۆنزی جیهانی بە دەستهێنا
وەرزشکارێکی کورد بە سەرکەوتن بەسەر وەرزشکارێکی خەڵکی قەزاقستان توانی پلەی سێهەمی لە کێبڕکێی زۆرانبازیی فەرەنگی جیهان لە وڵاتی ئامریکا(٢٠ ١٥)بۆ خۆی دەستبەر بکات.یووسف قادریان لە کێشی ٨٠  کیلۆ لە ئێران لەگەڵ وەرزشکارێکی خەڵکی قەزاقستان بەرەووڕو ببووە و لە ئەنجامدا توانی دوو بە سیفر بەسەر زۆرانبازی قەزاقی سەرکەوێت و میداڵی بورۆنزی ئەو کێبرکێیە بەدەست بێنێت.ئەو وەرزشوانە کوردە لەگەڵ ٢٧وەزشوانی دیکە لە وڵاتانی جیهان لە کێشی ٨٠  کیلو چوونەتە سەر قەپان.یووسف قادریان کە لاوترین وەزشوانی ئێرانی بەشدار لەو کێبڕکێیانە دێتە ئەژمار بە بردنەوەی میداڵی بورۆنزی لە لاسوێگاسی ئامریکا، پلەی نۆیەمی لەئاست جیهان مسۆگەر کرد.یوسف قادریان خەڵکی شاری سەقز لە رۆژهەڵاتی کوردستانە و چەند ساڵێکە لە شاری تاران نیشتەجێیە.یانەی زۆرانبازی فەرهەنگی ئێران لە کۆتایی رۆژی دووهەمی کێبرکێی زۆرانبازی جیهان لە لاسوێگاسی وڵاتی ئامریکا بە بردنەوە دوو میداڵی زێو و بورۆنز و بە دەستهێنانی ٢٣ ئیمتیاز دوای وڵاتانی روسیە، ئازەربایجان و ئۆکراین پلەی چوارم لە جیهاندا بۆ خۆی دەستەبەر کرد.وڵاتی ئیڕان لە کێبڕکێ‌کانی ساڵی رابردوو لە زۆرانبازی فەرەنگی بوو بە پاڵەوانی ئەو کێبڕکێیە و لە زۆرانبازی ئازادیشدا پلەی دووهەمی بۆ خۆی دەستبەر کرد.
35 خەباتى بێ ووچان لە پێناو گەل و نیشتمان
سازمانی خەباتی کوردستان ئەم ساڵ پێدەنێتە 36ساڵەی تەمەنی کار و تێکۆشانی خۆی لە پێناو رزگاری نەتەوەی کورد لەدەست رژێمی دیکتاتۆری ئاخوندی ئێران. ئەو رژێمەی کە تائێستاشی لەگەڵدابێت بەرداوامە لە سەر سیاسەتی حاشا لە مافی گەلانی ئێران بەگشتی و کورد بەتایبەتی ، سازمانی خەبات لەماوەی ئەو 35 ساڵەدا یەکێک بووە لەو رێکخراوانەی کە تائێستا سەری بۆ ویست و داواکارییەکانی دوژمنی کورد دانەنواندووە و شێلگیرانە هەوڵی رزگاری و سەرخستی خەباتی ڕەوای گەلەکەمانی داوە و لەو پێناوەشدا دەیان قارەمانێتی و داستانی خوڵقاندووە کە بوونەتە جێگەی شانازی بۆ گەلەکەمان.



سازمانی خەبات لە هەل و مەرجێکی ناسک و هەستیار دا بوونی خۆی وەک هێزێکی تێکۆشەری کورد لە کوردستانی ئێران راگەیاند. لەبەرانبەر رژیمێکدا تاوی دایە خەبات و تێکۆشان کە بچووکترین بروای بە مافی گەلانی ئێران نەبوو و هەر لەسەرەتای هاتنە سەرکاری بە بیانووی جۆراوجۆر کەوتە زیندانی کردن و شکەنجەدان و شەهیدکردنی ئەو کەسانەی کە داوای مافی خۆیان و نەتەوەکانیان دەکرد، بەتایبەتی کورد کە یەکێکە لەو نەتەوانەی زۆرترین پێشێلکاری و ستەمی لەبەرانبەر داکراوە. رژێم کە گەلی کوردی وەک وەک گەلێکی دیموکرات و حەقخواز و وریا و ئاشنا بە مافەکانی بە گەورەرترین دژمنی خۆی دەبینی، لە ژێر ناوی جیاخواز و کافر هەموو هەولێکی بۆ کپ کردنی دەنگی مافخوازانەی بە کار هێنا.
رژێمی ئاخوندی لە ماوەی 36 سالی رابردوو نەک نەیتوانی و نەیویست خزمەتی خەڵکی ئێران بکات بەڵکو تەنانەت خەیانەتی لە کەسە نیزیکەکانی خۆیشی کرد و ئەوانەی لە خەیاڵی بووژانەوە و شۆڕشی ئیسلامی دەستیان لە هیچ جینایەتێک بۆ مانەوەی ئەو دەسەڵات نەپاراست ئەمرۆ هەست بە پەشیمانی و شکست دەکەن. ئێرانی ئەمرۆ ولاتێکی دیکتاتۆر لێدراوە کە دانیشتووانی زیاتر لە هەر کاتێکی تر هەست بەو راستیە دەکەن، کە ئەم حکومەتە پێویستی بە گۆرانێکی بنچینەیی و ئێران پێویستی بە شۆڕشێکی سیاسی و فەرهەنگی یە و خۆپیشاندان و نارەزایەتیە بەرەوامەکان لە دژی رژێمی ئاخوندی بەشێکیان دەنگدانەوەی جیهانی بە دوای خۆیدا هێناوە زەنگی ئاگادارکردنەوەی دەسەڵاتدتارانی ئاخوندییە.
گەلی کورد هەر زوو ناوەرۆکی راستەقینەی ئاخوندانی بۆ دەرکەوت و خەبات و تێکۆشان لە دژی ئاخوندانی مێشک ووشک و جینایەتکاری دەست پێکرد. یەکێک لەو رێکخراوانەی کە لەپێناو ئەو ئامانجەدا دامەزرا سازمانی خەباتی کوردستان بوو کە لەسەرەتاوە بە ناو و ئارم و بەرنامەیەکی جیاوازتر لە حیزب و رێکخراوەکانی تری کوردستانی ئێران لە 5ی خەرمانانی 1359 بە رامبەر بە 27 ئاگۆستی 19980 بە دەست پێشخەری کۆمەلێک مامۆستا لە پێش هەمووشیانەوە مامۆستا سید جەلال حوسێنی هاتە ناو مەیدانی خەبات و تێکۆشانی دژبە رژێمی ئاخوندی ئێران و بەشێوەیەکی بەرچاو لەلایەن نیشتیمان پەروەرانەوە پێشوازی لێکر.
دامەزراندنی سازمانی خەبات دەرفەتێکی نوێ بوو بۆ زۆرێک لە خەلکی کوردستان کە دەیانویست لە پێناو ئامانجە بەرزەکانی نەتەوەکەمان خەبات بکەن و لەسەر ئەو بیر و باوەرەی کە هەیانە خزمەتی گەل بکەن. لەماوەی ئەو ساڵیانەی سازمانی خەبات لە تێکۆشاندا بووە زۆر سادقانە و راستگۆیانە بۆ گەیشتنی گەلەکەمان بە مافەکانی لە هەوڵدابووە و خاوەنی دەسان داستانی قارەمانەتی و حەماسەی نەبەردی پێشمەرگانەیە و هەروەرها خاوەنی کاروانێکی دوردرێژی سەروەرانی گەل ، شەهیدانی سوورخەڵاتی کوردستانە کە لە ریزەکانی سازمانی خەبات گیانی پاکیان پێش کەش بە کوردستان کردووە. یەکێک لەو هەوڵانەی کە لەلایەن سازمانەوە درا بۆ پێشخستنی خەباتەکەی و گەیاندنی دەنگی گەلەکەمان ئەوەبوو کە پاش چەند سالێک لە دامەزراندنی توانی هەم رۆژنامەیەک بە ناوی تێکۆشان دەربکات وهەمیش رادیۆیەک بە ناوی رادیۆ دەنگی خەباتی کوردستانی ئێران دابمەزرێنن کە دەورونەخشێکی بەرچاویان بینی لە گواستنەوەی هەواڵ و چالاکی پێشمەرگە و هەروەها دەرفەتێک بۆ ئەوەی کە لە رێگەی ئەم دەزگایانەوە پەرە بە بواری رۆشنبیرکردن و ئاشنا کردنی خەلکی بە ماف و ئەرکەکانیان و هەروەها دەرخستنی تاوانەکانی رژێم بدرێت.
ئەوەی جێگەی دڵخۆشیە لەگەڵ هەموو سەختی و هەوراز و نشێوەکانی مەودای خەباتی ، بە بەردەوامی ریساڵەتی مێژوویی خۆی وەک هێزێکی تێکۆشەری نەتەوەیی و نیشتمانی بەرەو پێش دەبات سەربەرزانە لە مەیدانی خەبات و تێکۆشان و خزمەت بە گەل و نیشتیمان ماوەتەوە و رۆژ بەرۆژیش زیاتر بەرەو پێشتر دەچێت .
سازمانی خەبات لە پێناو دامەزراندنی حکوومەتێکی دیموکراتیک و پارلەمانی کە مافی هەموو پێکهاتەکانی کوردستانی تێدا دەستبەر بکرێ‌ تێدەکۆشێ و بۆ وەدی هێنانی ئەو خەونەش لەهیچ گیانبازییەک دریغی ناکات و هەروەها ئامادە نییە بچووکترین لادان و هەڵخلیسکان بکات لە سەر بنەما راستەقینە و ئوسوولیەکانی کە هەر لەسەرەتای دامەزراندنیەوە پێی دەناسرێتەوە. بێگومان ئاسۆی گەلەکەمان بە بوونی هێز و لایەنی تێکۆشەری وەک سازمانی خەبات روونە و دواجار سەرکەوتن بۆ خەڵکی کوردستان و روورەشی و رووخان بۆ دەسەڵاتدارانی ملهوری ئاخوندییە.
سـیاسەتــێکی دیـــکەی رژێــم لـــەدژی لاوانـــی کـــوردســـتان
لەچەند دەیەی دەسەڵاتی رژێمی ئێران زووڵم و زۆرییەکانی لەسەر گەلانی ئێران بۆ هەموو کەس ئاشکرایە و لە پێناو درێژە پێدان بە سیاسەتی ترس و تۆقاندنی خەڵک و زیاتر جێگیرکردنی دەسەڵاتی نارەوای خۆی، دەستی لەهیچ زەبرو زەنگ و ترس و دڵەڕاوکێ و شکەنجەی جەستەیی و دەروونی لەسەر خەڵکی ئێران و بەتایبەتی خەڵکی کوردستان نەپاراستووە و هەموو هەوڵێکی داوە بۆ توواندنەوەی بیری شۆڕشگێڕی و هەوڵی ئازادیخوازی گەلانی ئێران. لەسەرووی هەمووشیانەوە سیاسەتە دژی گەلیەکانی رژیمی ئاخوندی زیاتر لە کوردستان رەنگی داوەتەوە و لە رەهەندەکانی سیاسی و کۆمەڵایەتی و ....


ئابووری و فەرهەنگی هەوڵی لەخشتە بردنی شیرازەی کۆمەڵگای کوردستانی داوە، ئەوەش بۆ ئەوە دەگەرێتەوە کە رژیمی ئاخوندی ئێران ساڵیانێکە بەو قەناعەتە گەیشتووە کە کوردستان و خەڵکەکەی بەتێکڕا، باوەریان بەو رژێمە لە ئێران نەماوە و بە تێکرا بێزاری لەو دەسەلات و سیاسەتە لە کوردستان رەنگی داوەتەوە. لە پێوەند بە سیاسەتە چەپەڵەکانی رژیم لە کوردستان دواترین زانیارییەکان باس لە پیلانێکی کۆن بەلام لە ئاستێکی بەرفراوانتر دەکەن، ئەویش بە ئامانجی بە لارێدابردنی لاوانی خوێن گەرم و شۆڕشگێڕ کە هەموو کات پشتیوانی راستەقینەی خەباتی نەتەوایەتی کوردستان بوونە. بەم پێیە، سیاسەتەکانی ئەمجارەی رژیم لە شارەکانی کوردستان، خۆی لە قەبارەیەکی نوێ و بەرفراوانتر دەبینێتەوە و بەشێوەیەکی زیرەکانە دەیهەێت بیری خەڵک لە رێبازی ئازادیخوازانە دووربکاتەوە و لە رێگای ماددەهۆشبەرەکان و هەروەها هێنانی ژنانی ((بازاری)) لەش فرۆش لە پاڕێزگاکانی دیکەی ئێران خەڵک تووشی گەندەڵی و نەخۆشی و هەزاران نەهامەتی گرێدراوی ئەو خەسارە کۆمەڵایەتیانە بکات. بە پێی زانیارییەکانی ناوخۆی کوردستان ، رژیم بە کردنەوەی ماڵ و بینای سەربە ئیتڵاعات لە ناو شەقامە قەڕەباڵەغەکان و هەروەها لەلای زانکۆکان، لەهەوڵدایە لاوان بەشێوەی جۆراوجۆری سیاسی و سۆزداری و رێگەی ترەوە لەلایەن ئەو لەشفرۆشانەوە رابکێشێ بۆ ناو ئەو ماڵانە و دواتریش باقی کێشە و نەهامەتیەکانی ئەو رەوشە بەرۆکی کۆمەڵگای کوردستان و بە تایبەتیشی چینی لاوان بگرێتەوە. ئەوسیاسەتانەی رژیمی ئێران تەنیا بەوە راوەناستێت و کاتێکیش لاوان بەرەو ئەو داوە دەبات، دەیەوێت لەناو ئەو ماڵە ترسناکانەەوە لاوان پەلکێشی ماددەی هۆشبەر بکات. دەسەڵاتدارانی رژیم زۆر بێشەرمانە و بە ئاشکرا ئەو پیلانگیرییە دەبەنە پێش و ئاسانکاریی تەواو بۆ راکێشانی سەرەنجی زۆرترین تاک لە لایەن دەسەڵاتەوە بەرێوە دەچێ. بۆ نمونە لەشاری مەهاباد یەکێک لەو کەسانەی کە بەرپرسی هێنانی لەشفرۆش لە پاڕێزگاکانی دیکەی ئێران بۆ کوردستانە، ژنێکە کە بەرەچەڵەکی خەڵکی سەنتەری ئێران و پەروەردەیەکی تایبەتی لەو رووەوە لەلایەن رژیمی ئێرانەوە بینیوە، ئەو ژنە بە بەکرێگرتنی خەڵکی خۆفرۆش ، بە چاپ و بڵاوکردنەوەی ژمارە رەقم و وێنەی ورووژێنەر لەسەر کارتی تایبەت بەو ژنانەی لەشفرۆشن لەسەر شەقامەکان و هەروەها لە کۆڵانەکان و زانکۆکانی کوردستان لەهەوڵدایە بیری زۆرترین خەڵک ڕابکشێت. ئەوە لە کاتێکدایە کە ئەگەر دەسەڵات بخوازێ زۆر بە سانایی دەتوانێ ئەو ماڵانە کۆ بکاتەوە و شارەکان لەو جۆرە ژنانە پاک بکاتەوە. لێرەدایە کە پێویستە ووشیاری کۆمەڵایەتی خێزانەکان پەرەی پێ بدرێ و هەروەها لاوانی نیشتمانپەروەری کوردستان لەو داو و پیلانە شەرئەنگێزانەیەی دەسەڵاتدارانی جینایەتکاری رژیم ئاگادار بکرێنەوە و بە خێرایی جڵەوی ئەو هێرشە درندانەیە بگرین ئەگینا بۆ چەند ساڵی داهاتوو تەوژمێک نەخۆشی جۆراوجۆری کوشندە روو لە کوردستان دەکات کە مایەی سەرسوورمان دەبێ. هەروەها زیان و خەسارەتی بەردەوامی و پێشنەگرتنی ئەو رەوشە دوورکەوتنەوەی بیری شۆڕشگێڕانە لە لاوانی کورد و رووکردنە کۆمەڵیک بابەتی زیانباری ترسناک دەبێ و دواجار دەستی بەکرێگیراوانی رژیم بۆ بردنە پێشەوە سیاسەتە دژی گەلیەکانیان لە کوردستان ئاوەڵەتر دەبێ و پانتایی زیانەکانیش بەرفراوانتر و قەربووکردنەوەی دژوار دەبێ. یەکێک لەو هۆکارە گرینگانەی کە رژێم دەستی بەو سیاسەتە لە شکل و چوارچێوەی نوێ لەهەمبەر خەڵکی کوردستان و بە تایبەتیش لاوان کردووە، بۆ ئەوە دەگەڕێتەوە کە بەدرێژایی هاتنە سەرکاری رژیمی ئاخوندی زیاتری هەوڵەکانی بۆ دابراندنی خەڵکی کوردستان لە شۆڕش و دوورکردنەوەی لاوان لە پەیوەست بوون بە ریزەکانی شۆڕش و بیری نەتەوەخوازی شکستی هێناوە و تەنانەت سێدارە و شکەنجە و بێبەش کردنی خەڵکی کوردستان لە مافە سەرەتاییەکانی ژیان، نەیتوانیوە ئەو خەڵکە لەو بیرە پیرۆزە دوور بکاتەوە بۆیە هەموو هەوڵەکانی خۆی خستووەتە گەڕ بەڵکو بەوشێوەیە و شێوەکانی دیکە بتوانێت خەڵکی کوردستان تووشی سەرلێشێوان و هەروەها لە پێشمەرگەو پارتەسیاسیەکان دابرێ‌، بەڵام بە دڵنیاییەوە ئەو جۆرە سیاسەتانە ناتوانێ وورە و ئیرادەی قایمی گەلی کورد و لاوانی کورد لەرزۆک بکات و ئیتر فریوخواردنی دەست وپەیوەندییەکانی رژیم لە لایەن گەلەوە مەحاڵە و رێبازی شەهیدان و پێشمەرگەی کوردستان تا گەیشتن بە ئامانجە بەرزەکانی نەتەوەکەمان و رووخانی یەکجارەکی رژیمی ئێران بیری ئازادیخوازی بیری زاڵ بەسەر تاکەکانی کۆمەڵگای کوردستان دەبێت.
کـــــــۆمــــاری ســێــدارە
ئیعدام لە ئێران پێشوونەیێکی بە درێژایی هاتنە سەرکاری رژیمی ئاخوندی هەیە و بە بەردەوامی وەکوو سزایێکی رەوا، بۆ تاوانی عەقیدەتی و سیاسی و ئابووری و مادەی هۆشبەر و تەعدا بۆسەر پیرۆزییەکان و کوشتن بە کار هاتووە، بەڵام ئەوەی بەرچاوە پەرەسەندن و بەرەوسەر چوونی بەرێوەبردنی ئەو جۆرە حوکمە لە ساڵەکانی رابردوودایە. بە پێی راپۆرتی لێبووردنی نێونەتەوەیی لە 6 مانگی رابردوو دا لە رێکەوتی 1ی ژانویە تا 1ی ژوئیە 694 حوکمی ئیعدام لە ئێران بەرێوە چووە بە واتایێکی تر لە هەر رۆژێکدا بە نێوەنجی سێ کەس لەسێدار دراون.





لە زمان بی بی سیەوە ئەو 694 حاڵەتە لە 6 مانگی رابردوو دا لەچاو 743 حاڵەتی ئیعدامی هەموو ساڵی رابردووی زایینی مەودایێکی ئەوتۆیان نییە. لەو ژمارەیەش 289 حاڵەت لە مێدیاکانی فەرمی راگەێندراون و 454 حاڵەتیش بە پێی سەرچاوەکانی باوەرپێکراوی دیکە تۆمار کراون.

سەعید بومەدووحە، جێگری کاروباری رۆژهەلاتی ناوین و باکووری ئەفریقا لە لێبووردنی گشتی دەڵێ: ئەگەر لێپرسراوانی ئێرانی کۆتایی بەو رەوتە ترسێهێنەرەی ئیعدامەکان نەهێنن بە ئەگەری زۆر تا کۆتایی ساڵ شاهیدی زیاتر لە 1000 حاڵەتی کوشتنی هاوەلاتیان بە دەستی حکوومەتەکەیان دەبین.

بە هۆی بوونی سەرکووتی توندنی مەدەنی، سانسۆر، نەبوونی ئازادی راگەیاندن و نەبوونی شەفافیەتی نیزامی دادوەری ئێران و نەبوونی راگەیاندن لەسەر دۆخی زیندایان بە هیچ جۆرێک ناتواندرێ‌ سەرژمێرییەکی ورد و دروست لە کۆی سزاکانی ئیعدام لە نێو نەتەوەکانی غەیرە فارس لە وەڵاتی ئێران بوونی هەبێ و ئەو هۆکارە تێچووی ئیعدام لەنێو نەتەوەکانی غەیرە فارسی بۆ دەسەڵات کەم کردۆتەوە و دەستی رژیمی ئاخوندی ئاوەڵاتر کردووە. لەم نووسینە ا ئامانج و بناغەی کار، دەرخستنی ئەو راستیەیە کە ئێران نەتەنیا زۆرترین رێژەی ئیعدامی لەسەرانسەری جیهاندا هەیە بەڵکو ئەو ئیعدامانە رووی لە ئەو نەتەوانەشە کە بۆ گەیشتن بە ئامانجە نەتەوەیی و زمانی و شوناسیان لە رووبەرووبوونەوەدان لەگەڵ نیزامی ئاخوندیدا. سەرەڕای هەوڵەکان سەرژمێرییەکی ورد و دروست لە ئیعدامەکانی چالاکانی ئەو نەتەوانە نەدۆزرایەوە، بەڵام ئەگەر مەبەست ئەوە بێ کە هاوسەنگیەکی سەرژمێریی لە نێو رێ٠‘ژەی ئیعدامەکانی کۆماری خەڵقی چین لەگەڵ یەکێک لە نەتەوەکانی وەک عەرەب یان بەلووچ و کورد لە جوغرافیای ئێران دروست بکەین، دەردەکەوێ‌ کە رێژەی ئیعدامەکان لە نێو ئەو نەتەوانە بە سەرەنج دان بە رێژەی حەشیمەت نەتەنیا رێژەی ئیعدامی ئەو نەتەوانە زۆر لەسەرترە بەڵکو دەیان جار زیاترە.

ئامار و ژمارەی رەسمی حکوومەت و چالاکانی مافەکانی مرۆڤـ بەرێوەبردنی حوکمی ئیعدام لە ئێران دەریدەخات کە هەموو ساڵیک لەچاو ساڵی رابردوو، بە تایبەتی لە ماوەی 2 ساڵی رابردوو، رێ٠‘ژەی سزای ئیعدام پەرەی سەندووە، بەڵام بۆ? هۆی جیاواز بۆ شی کردنەوەی ئەو بابەتە بوونی هەیە لە هۆی سیاسی و عەقیدەتی تا هۆی دروونناسانە، لە پەرەگرتنی هەژاری و پەرەسەندنی رێژەی تاوان و جینایەت تا قەیرانی روحی و خەمۆکی لە نێو جیلی لاو و پەلکێش بوون بەرەو توندتێژی... و هتد. حوکمی ئیعدام وەکوو کردەوە و سزایێکی بێ بەزییانە، نائەخلاقی و پڕ لە سووکایەتی ناوەندە. هەل و مەرجی ترسێنەری لە چاوەروانی مانەوە بۆ مردن دەبێتە هۆی سەپانی ئێش و ئازارێکی زۆری روحی و دەروونی و بەرێوەبردنی حوکمی ئیعدام تەعدا بۆسەر روح و جەستەیە.

نەتەنیا زیندانیان لە هەل و مەرجی جەستەیی بێ بەزییانە و نائینسانی دا رادەگیرێن، بەڵکو بیر و زەینیشان بە توندی دەکەوێتە ژێر کاریگەری، بە شێوەیێک کە زۆرێک لە زیندانیان لە چاوەروانی مردن بە دەست نەخۆشی روحی و رەوانی و لاوازیی زەینی کە لە ئاکامی دەرکردنی حوکمی ئیعدامەکەیانە دەناڵێنن.

بێگومان ئەگەر رژیم بیتوانیبا و هەل و مەرجی نێودەوڵەتی رێگەی پێبدایە زیندانیانی سیاسی لەبەرچاوی گشتی دا ئیعدام دەکرد، بەڵام ئیعدامی زیندانیانی سیاسی بە هۆی سیاسی و نێونەتەوەیی بۆ رژیم تێچوویەکی زۆری دەبێ. هەر بەو هۆیەوە بە ئامانجی دروست کردنی کەشی ترساندن و خەفەقان، زیندانیانی ئاسایی ئیعدام دەکەن و دیسان ئەگەر لەقاودانەکانی ئۆپۆزسیۆن نەدەبوو، پێیان باشتر بوو کە هەموو ئیعدامەکان لەبەرچاوی گشتی بەرێوە ببەن کە بتوانن بە خەیاڵی خۆیان خەڵکی زیاتری پێ چاوترسێن بکەن.

هەروەها زۆرێک لەو کەسانەی کە لەو شەپۆڵەی ماوەێک لەمەوبەر کەوتنە بەر شاڵاوی ئیعدامەکانی رژیمی ئاخوندی تەنانەت لە چوارچێوەی یاساکانی خودی رژیمیش بێ تاوان ئەژمار دەکران یان خود سزاکەیان ئیعدام نەبووە. بە پێی زانیارییەکان هێندێک لەو کەسانەی کە ئیعدام کراون، تاوانەکەیان تەنیا نارەزایەتی لە دژی ئیعدامی هاوزیندانی و هاوبەندییەکانیان بووە.

بەڵام بە هۆی ئەو زەرورەتەی کە رژیم بۆ دروست کردنی کەشی ترس پێویستیەتی، چەندەش قەیران دەوربەری داگرتبێ زیاتر و زیاتر روو دەکاتە ئیعدام، چەندەی ئەو بازنەیەی ناو ملی دەسەڵاتداران تەنگ تر ببێتەوە زیاتر حوکمی لەسێدارەدان بەرێوە دەچێ، چوونکە بە خەیاڵی دەسەڵات و بە رواڵەت ئیعدام خێراترین ئامرازی دەستی دەسەڵات بۆ دروست کردنی ترس و تۆقاندنە. بێگومان بارودۆخ و ئەو بازنە شوومە هەروەک چارەنووسی دیکتاتۆرەکانی مێژوو دەریخستووە سەرئەنجام لە شوێنێک دا دەشکێ و ئەو راستیە کاتێکە کە بتواندرێ‌ وەک ئیعدامی زیندانیانی سیاسی تێچووی ئیعدامی زیندانیانی ئاسایش بۆ دەسەلات بەرز بکرێتەوە و ئەو دەسەڵاتە هەست بکات کە ئیعدامەکان تێچووی زۆر گەورەی بۆ بەدی دێنێ‌ و لەوانەیە ببێتە هۆی تەقینەوەی کۆمەلایەتی.
دۆخی خۆکوژیی لە ئیلام قەیراناویە
بەرپرسانی رژیمی ئاخوندی لە پارێزگای ئیلام رایانگەیاندووە ئاماری خۆکوژی لەو پارێزگایە جێگای نیگەرانییە و لەئاستێکی مەترسیدار دایە.بارودۆخی کۆمەڵایەتی ئێران لەجیهاندا لەئاستێکی خراپ دایه و لێپرسروانی حکومەتیش هیچ بەرنامەیەکیان سەبارەت بە چارەسەری کێشەکۆمەڵایەتییەکاندا نییه.بە پێی راپۆرتی سەرچاوە هەواڵنێرییە حکومەتییەکان، رۆژی شەممە رێکەوتی ١٤ی خەرمانانی ١٣٩٤ی هەتاوی بڵاویان کردەوە، ئامارەکانی خۆکوژی لەپارێزگای ئیلام بە بەراوردلەگەڵ ساڵانی پێشوو کەمتر بووەتەوە بەڵام دیسان دۆخی خۆکوژی لەو پارێزگایە زۆر جێگای نیگەرانییە.ئەوەش لەکاتێک دایە کە بەرپرسانی حکومەت ئاماری راستی لەبارەی خۆکوژی و زیانە کۆمەڵایەتییەکان بڵاو ناکەنەوە.بەپێی ئامارەکانی وەزارەتی رفاەی ئێران، پارێزگای ئیلام پلەی یەکەمی لەبواری بێکاریدا هەیە و حەشیمەتی ئەو پارێزگایە لەژێر هێڵی هەژاری وڵات دان.پارێزگای ئیلام سەرجەم 585 هەزار کەس حەشیمەتی هەیە کە لەئاستی ئێراندا پلەی یەکەمی خۆکوژی هەیە و تەنیا لەماوەی یەک ساڵدا 2 هەزار کەس لەو پارێزگایە خۆکوژیان کردووە.تەمەنی خۆکوژی لە ئیلام کەمتر لە 30 ساڵ راگەیەندراوە و ژنان زیاتر دەست بۆ خۆکوژی دەبەن.ئاماری خۆکوژییەکان لە ئێران بۆ بێکاری، جیابوونەوەی ژن ومێرد، دابڕان لەشوناس “ێ‌نومی”، خەمۆکی، هەژاری و چەندین هۆکاری دیکە دەگەڕێتەوە.بەپێی ئاماری پزشکی دادوەری ئێران لە ماوەی ساڵەکانی 1380 هەتا 91١ی هەتاوی زیاتر لە 30 هەزار کەس لە ئێران بەهۆی خۆکوژی گیانیان داوە.
پارێزگای کرماشان زیاتر لە 90 هه‌زار بێکاری هه‌یه‌
بە پێی وتەی بەرپرسێکی رژێمی ئاخوندی لەپارێزگای کرماشان،/ ئەو پارێزگایە زیاتر لە 90 هەزار بێکاری هەیە.بە پێی راپۆرتی هەواڵدەرییەکان"، سه‌رپه‌رشتی کاروباری ئابووری و گه‌شه‌ی ناوچه‌یی ئیدارەی پارێزگای کرماشان "هیدایه‌ت حاته‌می" له‌ کۆبوونه‌وه‌ی شۆڕای ئیداریی پارێزگا به‌ ئاماژه‌دان به‌ پێگه‌ی تایبه‌تی جوگرافیایی پارێزگا و هه‌ڵکه‌وتنی له‌ ناوه‌ندی رۆژئاوای وڵات و دراوسێیه‌تیی له‌گه‌ڵ وڵاتی عێراق و بوونی بازارێکی بەرفراوانی سنووری هاوبه‌ش له‌گه‌ڵ وڵاتی عێراق رایگەیاند کە، زیاتر لە 90 هەزار بێکار لەم پارێزگایە بوونیان هەیە.حاته‌می ئه‌وه‌شی راگه‌یاند: له‌گه‌ڵ هه‌بوونی ئه‌م دەفرایەتییە به‌ داخه‌وه‌ پێوه‌ر و تایبه‌تمه‌ندییه‌ ئابوورییەکانی گه‌شه‌ی پارێزگا بارودۆخێکی شیاو و گونجاویان نییه‌. له‌ دوو میلیۆن که‌س جه‌ماوه‌ری پارێزگا به‌ رێژه‌ی 612 هه‌زار که‌س جه‌ماوه‌ری چالاکن که‌ به‌ رێژه‌ی 523 هه‌زار که‌سی ئه‌وانه‌ کار و پیشه‌یان هه‌یه‌ و به‌ رێژه‌ی 90 هه‌زار که‌س بێکار له‌ پارێزگادا هه‌یه‌.
لەسێدارەدانی لاوانی کورد محکوم دەکەین
بەداخەوە رۆژی چوارشەمە 4ی خەرمانانی 1394 جارێکیتر رژێمی ئاخوندی دژە مرۆڤ یەکێکی تر لە لاوانی نەتەوەکەمانی بە ناوی بێهرووز ئاڵخانی خەلکی شاری سەڵماس بە تاوانی هاوکاری کردن لەگەل یەکێک لە حیزبە نەیارەکانی رژێمی ئاخوندی لە زیندانی دەریا لە شاری ورمێ‌ لە سێدارە درا.
لە سێدارەدانی ئەم لاوە کوردە لەکاتێکدایە کە لەلایەن ناوەندە نێودەوڵەتیەکانەوە داواکرابوو کە حکومی ئەو زیندانیە سیاسیە راگیرێت، بەڵام رژێم گوێی بۆ ئەو داواکاریانە نەدا و بە لە سێدارەدانی بێهروز ئالخانی تاوانێکی دیکەی خستە پاڵ تاوانە قێزەون و گەورەکانی نیزامی ئاخوندییەوە . رژێمی ئاخوندی لە ماوەی چەند سالی رابردوودا زۆرترین رێژەی لە سێدارەدانی لاوانی کوردی تۆمارکردووە کە بۆتە هۆی نیگەرانی بەشێکی زۆری ناوەند و رێکخراوە جیهانیەکان بەگشتی و هەوەرها بیزاری و تورەیی زیاتری خەلکی کوردستانی . هەرچەندە تاوانەکانی رژێم رۆژبەرۆژ زیاد دەکەن و بە خەیالی خاوی خۆی دەتوانێت لە رێگای لەسێدارەدان و شکەنجە و زیندانی کردن و دانانی تۆمەتی نارەوا و دور لە راستی لاوانی کورد لە داوا و تێکۆشان بۆ گەیشتن بە مافەکانیان رابگرێ‌ بەڵام بە دڵنیاییەوە نەتەوەکەمان تا رزگاری یەکجارەکی دەست لە هەوڵ و ماندووبوون لەو پێناوەدا هەڵناگرن .
رێکخراوی لاوانی خەباتی کوردستانی ئێران وەک رێکخراوێکی سنفی و سیاسی تایبەت بە توێژی لاوان بە هەستکردن بە بەرپرسیارێتی لەسەر ئەرک و چالاکیەکانی خۆی لە دژی رژێمی ئاخوندی بەردەوام دەبێ و هەروەها سەرجەم تاوانەکانی رژێمی ئاخوندی دەرهەق بە لاوان و گەلەکەمان محکوم دەکات.
رێکخراوی لاوانی خەباتی کوردستانی ئێران
دەستەیی بەرێوەبەری
5ی خەرمانانی 1394
پەیامی رێکخراوی لاوانی خەبات بە بۆنەی رۆژی جیهانی لاوان
لاوانی ئازادیخوازی کوردستان
لاوانی تێکۆشەری ریزەکانی رێکخراوی لاوان و سازمانی خەبات
رێکخراوی لاوانی خەباتی کوردستانی ئێران بەبۆنەی 12 ی ئۆگۆست ، رۆژی جیهانی لاوان پیرۆزبایی خۆی پێشکەش دەکات بە هەموو لاوانی شۆڕشگێڕ و زەحمەتکێشی کوردستان و ئێران و هیوادارین بە لە ناوچوونی رژێمی دیکتاتۆری ئاخوندی مافی خەڵکی ئێران و چینی لاوان بە تایبەتی دەستەبەر ببێت.
لاوانی ئازادیخوازی کوردستان ،ڕۆژی جیهانی لاوان بیرۆکەی کۆمەڵێک لاوی وڵاتی ئۆتریشە و لە ساڵی 1991 کۆڕی جیهانی لاوان داوایکرد ڕۆژەکە رابگەیەنرێت و دوای هەشت ساڵ لە 1999 دا 12 ئۆگۆست بە فەرمی وەک رۆژی جیهانی لاوان دیاریکرا و ئەمەش رۆژێکی مێژوویی بوو بۆ گشت لاوانی جیهان.
لاوان لە گشت وڵاتانی دونیا هێزی لە بن نەهاتوون و چینێکی گرینگ و هەڵسووڕی کۆمەڵگاکەیانن و داینەمۆ و وزەی گەڕان و بەردەوام بوونی ژیانن ، بەڵام بەداخەوە لە کوردستانی ئێران بە هۆی سیاسەتە دواکەوتووەکانی رژێمی داگیرکەری ئاخوندی دژ بە لاوان زۆربەی لاوان بە لاڕێدا دەبرێن و ئاسمیلە دەکرێن و رژێم بە سیاسەتە چەپەلەکانی خۆی هەوڵی لەبار بردنی ئەو وزە و پوتانسیلە لەبن نەهاتووەی گۆران لە ناو کۆمەڵگا دەدا. لە کوردستان و ئێران بە هەزاران لاوان گیرۆدەی ئیعتیاد و فەساد و بێکاری و هەلاوسانی ئابووری و دەیان نەهامەتی دیکە بوونەتەوە.. . ، رێکخراوی لاوان لە بڕوایەدایە بە بێ لە ناوچوونی رژێمی دیکتاتۆری ئاخوندی ئەستەمە لاوان بگەنە مافەکانیان.
رێکخراوی لاوانی خەباتی کوردستانی ئێران جارێکی تر پیرۆزبایی خۆی پێشکەش بە سەرجەم لاوانی جیهان و ئێران بەگشتی و کوردستان بەتایبەتی دەکات و داواکاری یەکڕیزی و یەک دەنگین لە گشت رێکخراوەکانی لاوانی کوردستانی ئێران بۆ گەیشتن بە مافەکانمان و هیوادارین کە لە داهاتوویەکی نزیکدا ئەم یادە لە خاک و نیشتمانی خۆمان بکەینەوە.
رێکخراوی لاوانی خەبات ی کوردستانی ئێران
دەستەی بەرێوەبەری
12ی ئۆگۆستی 2015
یاریزانێکی مێرمنداڵی کورد پێشەنگی تۆرنۆمنتی ٢٠ ١٥ی نوروێژ
مێرمنداڵێکی کوردلە تۆرنۆمێنتی( یاری چەند لایەن) کاپی ٢٠ ١٥ کە لە وڵاتی نوروێژ بەڕێوەدەچێت، وەکوو باشترین یارێزان دەست نیشان کرا. بەپێی راپۆرتی هەواڵدەریی کوردپا،تیمی مێرمنداڵانی تەمەن ژێر ١١ ساڵی ئێران لەگەڵ دوو تیم لە کاپی نوروێژ بەشداری کردبوو، توانی لە دوو یاری جیاوازدا لە بەرامبەر تیمی نوروێژ سەرکەوتن بە دەست بهێنێت. تیمی مێرمنداڵانی ئێران لە یاری یەکەم توانی ١٦گوڵ و لە یاری دووهەم ١٥گوڵ تۆمار بکات. لە کۆتایی ئەو یارییانەدا، یادگار رۆستەمی یاریزانی کوردی خەڵکی شاری مەریوان بە تۆمارکردنی ٨گوڵ وەکوو یەکێک لە باشترین گوڵکارەکانی ئەو کێبڕکێیە هەڵبژێردرا. یارییەکانی کاپی نوروێژ ، بە گەوەرترین تۆرنۆمێنت فووتباڵ دونیا دێتە ئەژمار، بەبەشداری ٥٢وڵات، ١٦٣٩تیم ٣٢هەزار تماشاچی بەشدرابووی هەیە ئێستا لە وڵاتی نوروێژ بەرێوە دەچێت. مێهدی مەهدەوی‌کیا بەپرسی هەڵبژاردنی مێرمنداڵانی ژێر ١١ ساڵی ئێران، نازناوی "مێسیی ئاسیا'ی بە یادگار رۆستەمی بەخشی. یادگار رۆستەمی قوتابیی قۆناخی پێنجەمی سەرەتایی و خەڵکی گوندی "ساواجێ" سەربە ناوچەی خاومیرئاوای مەریوانە.
پەیامی رێکخراوی لاوانی خەباتی کوردستانی ئێران بەبۆنەی 30ی پووشپەر پێنجەمین ساڵڕۆژی کۆچی دوایی مامۆستا سید جەلال حوسێنی
پەیامی رێکخراوی لاوانی خەباتی کوردستانی ئێران بەبۆنەی 30ی پووشپەر پێنجەمین ساڵڕۆژی کۆچی دوایی مامۆستا سید جەلال حوسێنی
جەماوەری خۆشەویستی کوردستان
لاوانی نیشتیمان پەروەر
ئەندام و لایەنگرانی سازمانی خەبات
30ی پوشپەری ئەمساڵ پێنج ساڵ بەسەر کۆچی دوایی رێبەری ماندوویی نەناس و دامەزرێنەری سازمانی خەبات مامۆستا سید جەلال حوسێنی تێپەر دەبێت مامۆستا دوای تێک‌وشانێکی بێ ووچان و خزمەتێکی بەرچاو بە بزوتنەوەی رزگاریخوازانەی گەلەکەمان لە تەمەنی 82 ساڵی دا بۆ هەمیشە ماڵئاوایی لێکردین و خەمێکی بێکۆتایی خستە ناو دڵی سەرجەم رێبواران رێبازەکەی . مامۆستا سەیید جەلالی هەمیشە زیندوو لەسەرەتای پێگەیشتن و لاوێتیدا هەستی نیشتیمانپەروەری تێدا دروست دەبێت و دەبێتە یەکێک لە سوێندخواردو و شوێنکەوتووانی کۆمەڵەی ژیانەوەی کوردستان و لەساتەوە بەڵێنی وەفاداری بە ئامانجە رەواکانی گەل و نیشتیمان دەدات و وەک بینیمان تا دواهەمین هەناسەکانیشی بەو بەڵێنەی وەفادار مایەوە. لە پاش ژیکاف مامۆستا لە حوجرەکاندا وانەی شۆڕشی دەوتەوە و بەشیکی بەرچاو لە هێز و توانای بۆ باسکردن لەسەر ماف و ئازادی گەلەکەی تەرخان دەکرد کە لەو پێناوەشدا توشی چەندین کێشە و گرفت بوویەوە . لە سەرهەڵدانەکەی ساڵەکانی 46 و 47 دەوری دەبێ هەتا ئەو کاتەی سەرەتای شۆڕشێکی بەرفراوان لە دژی رژیمی پاشایەتی زەمینەکانی دەرخسێ.مامۆستا لەو قۆناغەدا وەک رێبەری راپەرینەکانی خەڵک دیاریی دەکرێ‌ و لە ناوچەی ژێر دەسەڵاتی خۆی گەورەترین دەور دەگێرێ‌ بۆ سەرخستنی راپەرین و داماڵینی هێزەکانی شا و پاراستنی هێمنی و ئاسایش .
لەدوای رووخانی سیستەمی پاشایەتی و هاتنە سەرکاری رژێمی ئاخوندی نەک ماف و داواکاریەکانی کورد جێبەجێ نەکرا بەڵکو زیاتر لەجاران کورد سەرکوتکرا ، هەربۆیە لەپاش قۆناغی دانووستان و ووتووێژ کە لە لایەن دەسەڵاتدارانی تازە بە دەسەڵات گەیشتوو شکستی پێهێندرا، زەرورەتی تێهەڵچوونەوە و گەرمداهێنانی کورەی خەبات لە دژی ستەمکارانی نوێ سەری هەڵدایەوە و لەو پێوەندییەش مامۆستا کۆتایی بە ریساڵەتەکەی نەهێنا و بەڵکو لە چوارچێوە و شکلێکی نوێ تاوی دایە خەبات دژی ستەم و چەوسانەوە و بە دامەزراندنی سازمانی خەبات ی کوردستانی ئێران سەرەتایێکی نوێی لە خەبات بۆ ئازادی گەل و نیشتمان دەست پێکرد.
لە هەموو ئەو قۆناغانەی ژیانی خەباتگیرانەی دا سداقەت و راستگۆیی و فیداکاریی بەشێکی دانەبراو لە پێکهاتەی کەسایەتی مامۆستای رێبەر و زانای گەلەکەمان بووە و بە هەموو وزە و توانا و هەست و بوونیەوە لە خزمەتی شۆڕش و بزووتنەوەی رەوای گەلی کورد بووە و لەو پێناوەشدا خاوەنی قوربانی پڕ بایەخە کە نمونەی ئەو قوربانیدانانە لە ناوی مێژووی رێبەرانی سیاسی دا کەم وێنە و دەگمەن بووە.
ژیانی سیاسی و خەباتکارانەی مامۆستا پڕ لە وانەی ژیانی راستەقینە و سەربەرزانەیە کە دەکرێ‌ بە پەیرەوی کردن و شوینکەوتنی جەوهەری بە نەمری مانەوەی تیدا بدۆزریتەوە و بەختەوەری و ژیانی سەربەستانەی بۆ گەل تێدا وەدی بهێندری.
بێگومان بە کۆچی دوایی رێبەری ماندوویی نەناسی گەلەکەمان مامۆستا سید جەلال زیانێکی زۆر بە گەلی کورد لە کوردستانی ئێران بەگشتی و سازمانی خەبات کەوت، بەڵام هێشتنەوەی یاد و ناو و بیر و ئەندێشەکانی مامۆستای هەمیشە زیندوو دەتوانێ‌ قەرەبووی بەشێک لە زیانەکان بکاتەوە و گەل بەرەو کەنارەکانی ئۆقرەیی و هێمنی رێنوێنی بکاتت. ئێمە وەک رێکخراوی لاوانی خەبات ی کوردستان لەو یادە دا بەلیچن دووپات دەکەینەوە کە تا سەرکەوتنی یەکجاریی رێبوارێکی دڵسۆزی ریبازە بێ خەوشەکەی مامۆستای نەمر بین و وەفادار بین بە ئامانجەکانی مامۆستا و گەلی کورد لە کوردستانی ئێران.
رێکخراوی لاوانی خەباتی کوردستانی ئێران
دەستەیی بەرێوەبەری
30ی پوشپەری 1394
راگەیاندراوی هاوبەشی رێکخراوەکانی لاوانی کوردستانی رۆژهەڵات لە هەمبەر رووداوەکانی پێوەندیدار بە پەکەکە و حدکا
کۆمەڵانی ماف ویستی کوردستان
لاوانی گیان لەسەر دەستی نیشتمان
حیزب و رێکخراو و NGOکانی کوردستان
لە بارودۆخی هەستیاری ئێستای نەتەوەکەمان یەکریزی و یەکگرتووی دەبێ لەپێش هەموو قازانج و بەرژەوەندییە تایبەتییەکانەوە بێت. لە پێناو درووست بوونی ئەو یەکریزییە پێویستە هەموو لایەک لە پەیوەندییەکانیاندا هەست بە بەرپرسیاریەتی بکەن و وەکوو دۆست مامەڵە لەگەڵ یەکتردا بکەن و قەدەغە بوونی شەری براکوژی دەبێ لانی کەمی ئاستی پێوەندیی نێوان هەموو حیزب و لایەنە سیاسیەکانی هەر چوار پارچەی کوردستان بێ.
ئەوەی جێگەی نیگەرانییە لەماوەی چەند رۆژی رابردوودا بەشێک لە پێشمەرگەکانی حدکا بە مەبەستی تێکۆشانی سیاسی و تەشکیلاتی، روویان لە سنوورەکانی کوردستانی رۆژهەڵات کردووە، بەڵام بەداخەوە لە ئەنجامی درووست بوونی سێجار گرژی و ئاڵۆزی لە نێوان هێزەکانی حیزبی دێموکراتی کوردستانی ئێران و پارتی کرێکارانی کوردستان شەڕ روویداوە و پێشمەرگەیەکی حدکا شەهید و چەند بریندارێکی لێ کەوتوەتەوە.
بە باوەری ئێمە نابێت هیچ حیزب و لایەنێک خۆی بە خاوەندار و دەسەڵات داری هیچ ناوچەیەکی کوردستان بزانێ و دەبێت خەبات لە چوار چێوەی سنووری کوردستان بۆ هەموو هێزێکی تێکۆشەری کوردستان ئازاد و ئاوەڵە بێ.
ئێمە وەکوو رێکخراوەکانی لاوان ئیدانەی هەرجۆرە شەڕێکی کورد بە دەستی کورد دەکەین و بە دڵنیاییەوە هەر کەس و لایەنێک هۆکاری سەرهەڵدانی شەڕی براکوژی بێ، ئەوا دەبێ لە بەرانبەر سەروەرییەکانی نەتەوەی کورد وەڵامدەر بێت.
ئێمە وەک لاوانی رۆژهەڵات هەردوو لایەنی "حدکا و پەکەکە" بە تێکۆشەری کورد دەزانین و داوا دەکەین بە زووترین کات کۆتایی بەو رەوشە بێنن و دەستی برایەتی بخەنە ناو دەستی یەکترەوە.
ئومێد دەکەین هەموو لایەنەکان بە هەستی بەرپرسیارەتیەوە رووبەرووی ئەو تەنگەژەیە ببنەوە و رێگەی روودانی هەر چەشنە رووداێکی دڵتەزێنی دیکە بگرن و کۆتایی بە کێشە و ناکۆکیەکان بە گرتنە بەری رێگەی ئاشتیانە بێنن.
بەرەو یەکڕیزی نەتەوەی کورد بۆ بە دەستهێنانی ئازادی لە هەرچوار پارچەی کوردستان.
لیژنەی هاوئاهەنگی رێکخراوەکانی لاوانی کوردستانی رۆژهەڵات
٤ی جۆزەردانی ٢٧١٥ی کوردی
راگەیەندراوی هاوبەشی رێکخراوەکانی لاوانی رۆژهەڵات، بۆ پشتیوانی له‌ بانگه‌وازی چالاکانی مه‌ده‌نی کوردستانی رۆژهەڵات بۆ مانگرتنی سه‌رانسه‌ری ٢٤ی بانه‌مه‌ر٠.
هاونیشتمانانی خۆشەویست
جه‌ماوه‌ری به‌شه‌ره‌ف و به‌ هه‌ڵویستی کوردستانی ڕۆژهه‌ڵات
لاوانی خۆڕاگر و نیشتمانپەروەر
هه‌ر وه‌ک ئاگادارن له‌ ڕێکه‌وتی ١٤‌ی بانه‌مه‌‌ڕی ئه‌مساڵدا گه‌نجێکی مهابادی به‌ ناوی فه‌ریناز خوسره‌وانی به‌ شێوه‌یه‌کی گوماناوی له‌ هوتێل تارای شاری مهاباد و له‌ نهومی چواره‌م که‌وته‌ خواره‌وه‌ و به‌رپرسانی رژێم له‌ جیاتی ڕوون کردنه‌وه‌ی ڕوداوه‌که‌ و وڵام دانه‌وه‌ به‌ بیروڕای گشتی، ده‌ستیان کرد به‌ چه‌واشه‌ کاری و ئه‌وه‌ش له‌ ئه‌نجامدا ده‌نگی ناڕه‌زایه‌تی هه‌ڵبڕینی به‌رینی خه‌ڵکی به‌شه‌ره‌فی شاری مهاباد و دواتر هه‌ندێ شاری تری کوردستانی ڕۆژهه‌ڵات و هێڕشی نامرۆییانه‌ی هێزه‌کانی ڕژێم و برینداربوونی چه‌ند که‌س و گیرانی نزیک به‌ ١٧٠  که‌سی لێکه‌وته‌وه‌.
هه‌ر وه‌ک ئاگادارن هه‌تا ئیستاش به‌رپرسانی ڕژێم له‌ شاری مهاباد وئوستانی ورمێ له‌ جیاتی وڵامدانه‌وه‌ به‌ بیروڕای گشتی خه‌ریکی چه‌واشه‌کاری و گرتن و به‌ند کردن و بڕینه‌وه‌ی سزای ماددین بۆ که‌سانی گیراو له‌و ڕێپێوانانەدا.
هه‌ر بۆیه‌ش ئێمه‌ وه‌ک ڕێکخراوه‌کانی لاوانی کوردستانی رۆژهەڵات وێرای ده‌ربڕینی هاوخه‌می خۆمان بۆ بنه‌ماڵه‌ی کۆچ کردوو و خه‌ڵکی کوردستان به‌ گشتی، ڕایده‌گه‌یێنین که‌ زامنی مانه‌وه‌ و پاراستنی که‌رامه‌تی نه‌ته‌وه‌ی کورد ته‌نیا له‌ یه‌کگرتوویی و پێکه‌وه‌ بوون و هاوخه‌می دایه‌، هه‌ر بۆیه‌ش داواکارین هه‌ر وه‌ک له‌ ڕابردوودا و له‌ ڕووداو و کاره‌ساته‌ دڵته‌زێنه‌کانی گه‌له‌که‌ماندا نیشانمان داوه‌ یه‌ک ده‌نگ و هاوارین، له‌و کاره‌ساته‌ش دا به‌ هانای خه‌ڵکی مهاباد و هاواری خنکاوی گه‌له‌که‌مانه‌وه‌ بین.
ڕۆژی پێنج شەممە ٢٤ی بانەمەڕ، به‌ به‌شداری کردن و په‌یوه‌ست ىوون به‌ مانگرتنی گشتی له‌ کوردستانی رۆژهەڵاتدا، جارێکی تر ڕوو به‌ نه‌یارانی گه‌له‌که‌مان بیسه‌لمێنین که‌ نه‌ک مهاباد به‌ڵکو هیچ شار و به‌شێکی کوردستان به‌ ته‌نیا نییه‌ و هاوهه‌ڵویست و پشتیوان له‌ لای یه‌کتر ده‌ویستین.
گیان له‌ده‌ستدانی فه‌ریناز بووبه گڕکانی سه‌رهه‌ڵدانێکی نه‌ته‌وه‌یی له کوردستانی رۆژهەڵاتدا بۆبه‌ دروشمێک له‌ یه‌ک پارچه‌ بوونی کوردستان هه‌ر له "باشووره‌وه تا باکور و رۆژئاوا و رۆژهه‌ڵات" ده‌نگی ناره‌زایه‌تی و پشتگیری له سه‌رهه‌ڵدانی مهاباد، به‌ شێوه‌ی خوپێشاندان و هه‌ڵگرتنی دروشمی هه‌موومان فه‌رینازین و مه‌هاباد ته‌نیا نییه‌ پشتیوانی خۆیان ده‌ربڕی که‌ لاوان له‌م خوپێشاندانەدا رۆڵی سه‌ره‌کی گێڕا و دیسان سه‌لماندیان کە پێشه‌نگی خه‌بات هەر لاوانی کوردستانن.
هه‌ر له‌م پیوه‌ندیه‌ دا زوربه‌ی ولاتان له‌ رێگای مێدیاو راگەیاندنه‌ جۆراو جۆره‌کان، پشتیوانی خۆیان به‌رانبه‌ر به‌م روداووه‌ دڵته‌زێنه‌ ده‌ربڕی و ئێمه وه‌ک رێکخراوەکانی لاوانی رۆژهەڵات پشتیوانی له حه‌ره‌که‌تی ئێعتڕازی خه‌ڵکی کوردستانی رۆژهەڵات ده‌که‌ین و تا به سزاگه‌یشتنی بکه‌رانی ئه‌م تاوانه قێزه‌ونه ده‌ست له ناره‌زایه‌تی خۆمان هه‌ڵناگرین و ده‌نگی ناره‌زایه‌تی لاوانی کورد به کۆڕ و کۆمه‌ڵه نێونه‌ته‌وه‌ییه‌کان و مافی مرۆڤ ده‌گه‌یه‌نین .
له هه‌مانکاتدا داوا له هه‌موو خه‌ڵکی کوردستان به‌ تایبه‌ ت لاوانی شۆڕشگێڕ ومافخوازو پێشه‌نگی خەبات، و هەروەها سەرجەم چین و توێژه‌کانی دیکه‌ی کوردستانی رۆژهەڵات ده‌که‌ین که به‌شداریی له مانگرتنی سه‌رانسه‌ریی رۆژی ٢٤ی بانه‌مه‌‌ڕدا بکه‌ن. بۆ ئه‌وه‌ی کۆماری ئیسلامی و ده‌ست و پێوه‌ندییەکانی باش بزانن که نه‌ته‌وه‌ی کورد له خوینی به ناحه‌ق ڕژاوی فه‌رینازەکان خۆش نابن.
لیژنەی هاوئاهەنگی رێکخراوەکانی لاوانی کوردستانی رۆژهەڵات
٢٢ی بانەمەڕی ٢٧١٥ی کوردی
دوایین هەواڵەکان
photo
لاوانی خه‌بات
11 مانگ و 12 ڕۆژ و 21 کاتژمێر و 20 خوله‌ک له‌مه‌وپێش‌
photo
ڕێکخراوی لاوانی خەباتی کوردستانی ئێران

1 ساڵ و 25 ڕۆژ و 14 کاتژمێر و 36 خوله‌ک له‌مه‌وپێش‌
photo
ڕاگەیندراوی ڕێکخراوی لاوانی خەبات

1 ساڵ و 1 مانگ و 6 ڕۆژ و 14 کاتژمێر و 11 خوله‌ک له‌مه‌وپێش‌
photo
ڕاگەیندراوی ڕێکخراوی لاوانی خەبات بەبۆنەی ڕۆژی زمانی زگماگی

1 ساڵ و 1 مانگ و 23 ڕۆژ و 22 کاتژمێر و 15 خوله‌ک له‌مه‌وپێش‌
photo
لاوانی خه‌بات

1 ساڵ و 3 مانگ و 4 ڕۆژ و 21 کاتژمێر و 22 خوله‌ک له‌مه‌وپێش‌
photo
لاوانی خه‌بات

1 ساڵ و 5 مانگ و 13 ڕۆژ و 16 کاتژمێر و 46 خوله‌ک له‌مه‌وپێش‌
photo


1 ساڵ و 5 مانگ و 27 ڕۆژ و 17 کاتژمێر و 10 خوله‌ک له‌مه‌وپێش‌

ده‌رباره‌ی ئێمه به کورتی


لێره‌‌‌ ده‌‌‌رباره‌‌‌ی خۆتان بنووسن به کورتی

په‌یوه‌ندی


تۆڕە کۆمەڵایەتیەکان



٢/ لینکی یوتوب

٣/ لینکی تویته‌‌‌ر